ຜະລິດຕະພັນ Goteddy ຄອງຊະນະເລີດ ທີມໝວດທົ່ວໄປ, ໃນຂະນະທີ່ ຜະລິດຕະພັນ Lao Emergency Rescue ຄອງຊະນະເລີດທີມໝວດນັກສຶກສາ ໃນການແຂ່ງຂັນ Lao ICT Award 2019 ພ້ອມໄດ້ສິດໄປແຂ່ງຂັນລະດັບອາຊຽນ.
ກະຊວງໄປສະນີ ໂທລະຄົມມະນາຄົມ ແລະ ການສື່ ສານ (ປທສ) ຮ່ວມກັບສະມາຄົມ ໄອຊີທີລາວ (LICA) ຈັດ ງານແຂ່ງຂັນ ໄອຊີທີລາວອະວອດ 2019 ຫຼື Lao ICT Award 2019 ຂຶ້ນໃນວັນທີ 30 ມິຖຸນາຜ່ານມານີ້ ທີ່ໂຮງແຮມດອນຈັນພາເລດ. ງານດັ່ງກ່າວ ເປັນກິດຈະກໍາໜຶ່ງຂອງງານວາງສະແດງ Lao ICT Expo 2019 ໂດຍມີທ່ານ ທອງໃສ ຊານໄຊຍະ ຮອງລັດຖະມົນຕີກະຊວງ ປທສ, ມີພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງການແຂ່ງ ຂັນຄັ້ງນີ້, ເພື່ອສົ່ງເສີມໃຫ້ນັກຮຽນ-ນັກສຶກສາ, ນັກຄົ້ນຄວ້າ ຕະຫຼອດຮອດທຸກຂະ ແໜງການທັງພາກລັດ-ເອກະຊົນ ໃນທົ່ວສັງຄົມລາວ ໄດ້ມີໂອກາດສະແດງຄວາມສາມາດໃນການພັດທະນາເຕັກໂນໂລຊີ ດ້ານໄອຊີທີ ບໍ່ວ່າຈະເປັນຜະລິດຕະພັນ, ການບໍລິການ ແລະ ນະວັດຕະກໍາດ້ານ ໄອຊີທີ.
ພ້ອມນັ້ນ ກໍເປັນການສ້າງຊື່ສຽງໃຫ້ຜະລິດຕະພັນຂອງຕົນ ໃຫ້ສາມາດບໍລິການອອກສູ່ສັງຄົມ ແລະ ສາກົນໄດ້, ທັງເປັນການສົ່ງເສີມໃຫ້ຄົນລາວໄດ້ນໍາໃຊ້ການບໍລິການໄອຊີທີຂອງຄົນລາວ; ການແຂ່ງຂັນດັ່ງກ່າວ ໄດ້ແບ່ງ ອອກເປັນ 2 ໝວດໃຫຍ່ຄື:
ໝວດທົ່ວໄປ ແລະ ໝວດນັກສຶກສາ. ຜົນການແຂ່ງຂັນປະກົດວ່າ: ທີມຊະນະເລີດ Lao ICT Award 2019 ໝວດທົ່ວໄປ ຊື່ຜະລິດຕະພັນ Goteddy; ໃນຂະນະທີ່ທີມຊະນະເລີດ Lao ICT Award 2019 ໝວດນັກສຶກສາ ຊື່ຜະລິດຕະພັນ Lao Emergency Rescue.
ການແຂ່ງຂັນຄັ້ງນີ້, ເປັນການແຂ່ງຂັນລະດັບປະເທດ ຄັ້ງທີ 3 ຊຶ່ງ (ຄັ້ງທໍາອິດ ແມ່ນໄດ້ຈັດຂຶ້ນໃນປີ 2016 ແລະ ຄັ້ງທີ 2 ປີ 2018) ທີ່ຜ່ານມາບັນດາຜູ້ໄດ້ຮັບລາງວັນຈາກເວທີດັ່ງກ່າວ ແມ່ນໄດ້ເປັນຕົວແທນໃຫ້ແກ່ ປະເທດລາວ ໄປເຂົ້າຮ່ວມແຂ່ງຂັນລະດັບອາຊຽນ ຫຼື ASEAN ICT Award.
ແຫຼ່ງຂໍ້ມູນ: ໜັງສືພິມປະຊາຊົນ