ກະຊວງວິທະຍາສາດ ແລະ ເຕັກໂນໂລຊີ (ກວຕ) ແລະ ມະຫາວິທະຍາໄລສັບພະວິຊາຮ່າໂນ້ຍ ສສ ຫວຽດນາມ ຮ່ວມກັນລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໃນຂົງເຂດຄອມພິວເຕີ ແລະ ເອເລັກໂຕຣນິກ ທີ່ ກວຕ ຮ່ວມລົງນາມຂອງທ່ານ ຄຳເພັດ ວົງດາລາ ຫົວໜ້າກົມແຜນການ ແລະ ການຮ່ວມມື ແລະ ທ່ານ ຫວຽນ ວັນ ຄ໋າງ ຮອງຜູ້ອຳນວຍການມະຫາວິທະຍາໄລສັບພະວິຊາຮ່າໂນ້ຍ ມີທ່ານ ບໍ່ວຽງຄຳ ວົງດາລາ ລັດຖະມົນຕີ ກວຕ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ບົດບັນທຶກສະບັບນີ້ ສອງຝ່າຍເຫັນດີຈະຮ່ວມມືກັນໃນຫຼາຍດ້ານ ເຊັ່ນ: ການພັດທະນາອິນເຕີເນັດແຫ່ງຊັບພະສິ່ງ (IoT) ຮ່ວມກັນຄົ້ນຄວ້າ ແລະ ພັດທະນາລະບົບການຄົມມະນາຄົມອັດສະລິຍະ ເພື່ອຮັບໃຊ້ການຄົມມະນາຄົມຂົນສົ່ງ ບົນພື້ນຖານເຕັກໂນໂລຊີອິນເຕີເນັດແຫ່ງຊັບພະສິ່ງ ຂົງເຂດປັນຍາປະດິດ (AI) ທັງສອງຝ່າຍຈະຮ່ວມກັນໃນການຄົ້ນຄວ້າ ແລະ ພັດທະນາລະບົບແປພາສາ ລາວ-ຫວຽດນາມ ແລະ ຫວຽດນາມ-ລາວ ດ້ວຍສຽງເວົ້າ (Lao-Vietnam Vietnam-Lao Speech translation system) ລະບົບຂໍ້ມູນພູມສາດ (GIS) ທັງສອງຝ່າຍຈະຮ່ວມກັນຄົ້ນຄວ້າ ແລະ ພັດທະນາເວັບໄຊ GIS ເພື່ອການວາງແຜນ ແລະ ພັດທະນາການຈັດສັນບ້ານລະບົບການບໍລິການສາທາລະນະ (Public service) ຈະໄດ້ຮ່ວມກັນຄົ້ນຄວ້າ ແລະ ພັດທະນາການຫັນການໃຫ້ບໍລິການວຽກງານວິທະຍາສາດ ແລະ ເຕັກໂນໂລຊີຂອງກະຊວງໃຫ້ສັງຄົມດ້ວຍລະບົບອອນລາຍ ພ້ອມນັ້ນ ຍັງຈະໄດ້ມີການແລກປ່ຽນບົດຮຽນ ແລະ ສ້າງຄວາມເຂັ້ມແຂງທາງດ້ານວິຊາການໃນລະດັບປະລິນຍາໂທ ປະລິນຍາເອກ ເຝິກອົບຮົມໄລຍະສັ້ນ ແລະ ໄລຍະຍາວໃຫ້ພະນັກງານ ກວຕ ແລະ ຂົງເຂດອື່ນໆທີ່ທັງສອງຝ່າຍມີຄວາມສົນໃຈໃນການຮ່ວມມື.
ແຫຼ່ງຂໍ້ມູນ: ໜັງສືພິມວຽງຈັນໃໝ່