– ຄວນຫລີກເວັ້ນການດື່ມກາເຟໃນຊ່ວງເປັນປະຈຳເດືອນ : ກາເຟອີນໃນກາເຟຈະກະຕຸ້ນໃຫ້ຫລອດເລືອດຫົດໂຕລົງ ເຊິ່ງສົ່ງຜົນໃຫ້ມົດລູກບີບໂຕຫລາຍຍິ່ງຂຶ້ນ ແລະ ນັ້ນກໍເປັນສາເຫດທີ່ຈະເຮັດໃຫ້ທ່ານມີອາການເຈັບທ້ອງຮຸນແຮງຂຶ້ນຫລັງຈາກການດື່ມກາເຟ ຫລື ເຄື່ອງດື່ມທີ່ມີກາເຟອີນ.
– ອາຫານລົດຊາດເຜັດໆ : ການກິນອາຫານເຜັດໆ ຫລື ອາຫານໃສ່ໝາກເຜັດຫລາຍ ອາດຈະເຮັດໃຫ້ເກີດອາການຍື່ງທ້ອງໄດ້ ເຊິ່ງຈະຍິ່ງເຮັດໃຫ້ທ່ານຮູ້ສຶກຢູ່ຍາກຫລາຍຂຶ້ນ ເມື່ອເກີດອາການຍື່ງທ້ອງພ້ອມກັບການເປັນປະຈຳເດືອນ.
– ເຂົ້າໜົມອົມ ແລະ ເຂົ້າໜົມທີ່ມີນຳ້ຕານຫລາຍ : ການກິນເຂົ້າໜົມອົມ ແລະ ເຂົ້າໜົມທີ່ມີນຳ້ຕານຫລາຍ ສາມາດເຮັດໃຫ້ເກີດອາການຍື່ງທ້ອງໄດ້, ແຕ່ບັນຫາຢູ່ບ່ອນຫລາຍຄົນມັກຈະຢາກກິນຂອງຫວານໃນຊ່ວງກ່ອນປະຈຳເດືອນຈະມາ ຫລື ໃນຂະນະທີ່ພວມເປັນປະຈຳເດືອນ ຈຶ່ງແນະນຳໃຫ້ກິນໝາກໄມ້ແທນ ເມື່ອເກີດຄວາມຢາກອາຫານຫວານໆ ເພື່ອຫລຸດຄວາມສ່ຽງໃນການເກີດບັນຫາຍື່ງທ້ອງ.
– ອາຫານເຄັມລົດຊາດເຄັມ : ເຂົ້າໜົມກິນຫລິ້ນ, ອາຫານຈານດ່ວນ ຫລື ອາຫານສຳເລັດຮູບ ມັກຈະມີປະລິມານໂຊດຽມຫລາຍ ເຊິ່ງໂຊດຽມເຮັດໃຫ້ຮ່າງກາຍເກີດອາການບວມນຳ້ໄດ້ ເຮັດໃຫ້ທ່ານຮູ້ສຶກວ່າຮ່າງກາຍບວມຂຶ້ນກ່ວາປົກກະຕິ ເຊິ່ງປົກກະຕິແລ້ວ ທ່ານມັກຈະມີອາການບວມນຳ້ໃນຊ່ວງກ່ອນຈະເປັນປະຈຳເດືອນ ຫລື ກຳລັງເປັນປະຈຳເດືອນຢູ່ແລ້ວ ເນື່ອງຈາກການປ່ຽນແປງຂອງຮໍໂມນ.
– ຜະລິດຕະພັນທີ່ມີສ່ວນປະສົມຂອງນົມ : ໃນຂະນະເປັນປະຈຳເດືອນ ຄວນຫລີກເວັ້ນການກິນ ຫລື ດື່ມຜະລິດຕະພັນທີ່ມີສ່ວນປະສົມຈາກນົມ ເຊັ່ນ : ນົມສົດ, ຊີສ ຫລື ໂຢເກິດ ເພາະໃນອາຫານເຫລົ່ານີ້ມີໄຂມັນອີ່ມໂຕທີ່ອາດຈະເຮັດໃຫ້ທ່ານເຈັບທ້ອງປະຈຳເດືອນໄດ້.
– ເຮັດແນວໃດເມື່ອພຶດຕິກຳການກິນອາຫານປ່ຽນ ? ບໍ່ຢາກອາຫານ ຫລື ກິນຫລາຍກ່ວາປົກກະຕິ.
1. ດື່ມນຳ້ຫລາຍໆ.
2. ດື່ມຊາສະໝຸນໄພ.
3. ອອກກຳລັງກາຍເບົາໆ.
4. ກິນອາຫານປະລິມານເທົ່າທີ່ເຄີຍກິນ ພຽງແຕ່ຫລີກເວັ້ນອາຫານທີ່ກ່າວໄປຂ້າງເທິງ.
5. ກິນໝາກໄມ້ ຫລື ຖົ່ວແທນ ເພື່ອຫລຸດອາການຢາກເຂົ້າໜົມ.
ແຫຼ່ງຂໍ້ມູນ: ໜັງສືພິມລາວພັດທະນາ