ພາຍຫລັງທີ່ ບໍລິສັດນໍ້າຕານອ້ອຍ TTC ແຂວງອັດຕະປື ໄດ້ລົງເຜີຍແຜ່ຄວາມເຂົ້າໃຈ ກ່ຽວກັບນະໂຍບາຍ ແລະ ວິທີການປູກອ້ອຍ ໃຫ້ປະຊາຊົນຜູ້ປະສົບໄພຢູ່ ເມືອງສະໜາມໄຊ ກ່ຽວກັບການນະໂຍບາຍຕ່າງໆຂອງບໍລິສັດ ນ້ຳຕານອ້ອຍ TTC ຕາມແຜນໂຄງການ 2+3 ໃນການຮ່ວມມື ຜະລິດກະສິກຳລະຫວ່າງ ປະຊາຊົນ ແລະ ບໍລິສັດ ໂດຍທີ່ທາງບໍລິສັດ ເປັນຜູ້ສະໜອງທຶນ, ເຕັກນິກ, ການຕະລາດ ແລະ ຊາວບ້ານ ເປັນຜູ້ສະໜອງດິນ ແລະ ແຮງ ງານ ເຊັ່ນວ່າ: ບໍລິສັດຈະຊ່ວຍໃນການບຸກເບີກເນື້ອທີ່, ໄຖດິນ, ສະໜອງແນວພັນອ້ອຍ, ມີວິຊາການຊ່ວຍລົງຕິດຕາມແນະນໍາ ແລະ ຮັບຊື້ໃນລາຄາທີ່ເໝາະສົມ ປະເມີນໄດ້ວ່າ ປະຊາຊົນ ມີຄວາມສົນໃຈທີ່ຈະຮ່ວມມືໃນການຜະລິດຮ່ວມກັບບໍລິສັດດັ່ງກ່າວຫລາຍຂຶ້ນ.
ທ່ານ ເລັດ ໄຊຍະພອນ ເຈົ້າແຂວງ ອັດຕະປື ໄດ້ມີຄໍາເຫັນໂອ້ລົມ ຄະນະທີ່ປະຊາຊົນ ຜູ້ປະສົບໄພເຂົ້າຮ່ວມຮັບຟັງຢ່າງຫລວງຫລາຍໃນຄັ້ງວັນທີ 3 ກໍລະກົດ 2019 ນັ້ນວ່າ: ການປູກອ້ອຍ ທີ່ມີນະໂຍບາຍທີ່ເໝາະສົມນີ້ ເປັນໂອ ກາດທີ່ດີ, ທັງເປັນການລົງທຶນທີ່ຮັບປະກັນດ້ານຄວາມໝັ້ນຄົງ ຮັບປະກັນດ້ານຜົນຜະລິດ ແລະ ລາຄາການຊື້-ຂາຍຕາມ ໂຄງການ 2+3 ຂາຍໃຫ້ ບໍລິສັດ ນ້ຳຕານອ້ອຍນັ້ນ ແນ່ນອນວ່າແຕ່ລະຄອບຄົວຈະມີລາຍຮັບເພີ່ມ, ສິ່ງສຳຄັນໃນທີ່ນີ້ ແມ່ນແນ່ໃສ່ສົ່ງເສີມ ປະຊາຊົນມີອາຊີບເຮັດ, ມີລາຍຮັບ ເພື່ອພັດທະນາຄອບຄົວຕົນເອງ ໃຫ້ມີຊີວິດການເປັນຢູ່ທີ່ດີຂຶ້ນ.
ດັ່ງນັ້ນ ຮຽກຮ້ອງໃຫ້ພໍ່ແມ່ປະຊາຊົນ ມີຄວາມເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ພະຍາມລີກລຽງການທໍາມາຫາກິນແບບອາໃສທໍາມະຊາດ ແລ້ວຫັນແນວຄິດ ສົ່ງເສີມ ແລະ ພັດທະນາການປູກ-ການລ້ຽງ ຫັນແນວຄິດໃຫ້ມີ ຄວາມດຸໝັ່ນອອກແຮງງານ ປູກຝັງ-ລ້ຽງສັດ ເລົ່ານີ້ເປັນຕົ້ນ ຈະຊ່ວຍ ກະຈາຍລາຍຮັບ ໃຫ້ປະຊາຊົນ ໄດ້ດີເທື່ອລະກ້າວ
ແຫຼ່ງຂໍ້ມູນ: ໂດຍ ມາລາທິບ
Hits: 16
