ການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ມາຮອດປັດຈຸບັນ ການກໍ່ ສ້າງພື້ນຖານໂຄງລ່າງ ປະຕິບັດສໍາເລັດແລ້ວ 72,8%.ທ່ານ ລັດຕະນະມະນີ ຄູນນີວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ, ຫົວໜ້າ ຄະນະຄຸ້ມຄອງ ໂຄງການ ກໍ່ສ້າງທາງລົດໄຟ ລາວ-ຈີນ ໄດ້ລາຍງານໃຫ້ຮູ້ໃນວັນທີ 5 ກໍລະກົດ 2019 ນີ້ວ່າ:
ໂຄງການກໍ່ສ້າງທາງລົດໄຟ ລາວ-ຈີນ ໄດ້ລົງມືກໍ່ສ້າງ ທັງໝົດ 975 ຈຸດກໍ່ສ້າງ, ໃນນັ້ນ ຊີເຈາະອຸມົງທັງໝົດ 74 ອຸມົງ, ລວມ 229 ຈຸດກໍ່ສ້າງ, ສາມາດ ຊີເຈາະໄດ້ທັງໝົດ 168.799 ແມັດ, ເລີ່ມລົງມືກໍ່ສ້າງຂົວ 156 ແຫ່ງ, ໃນນັ້ນສ້າງຂົວສຳເລັດ 1.708 ເສົາ, ຊີເຈາະເຂັມເສົາຂົວໄດ້ ລວມຄວາມຍາວ 237.056 ແມັດ, ສໍາເລັດການວາງຂາງຂົວ 312 ຊ່ວງເສົາ.
ພ້ອມນັ້ນ, ຍັງໄດ້ສ້າງເສັ້ນທາງ ເພື່ອເຂົ້າຫາສະຖານທີ່ກໍ່ສ້າງ 922 ກິໂລແມັດ, ຂົວ 4.142 ແມັດ, ຕິດຕັ້ງສາຍສົ່ງໄຟຟ້າ860 ກິໂລແມັດ, ຕິດຕັ້ງໝໍ້ແປງໄດ້ 261 ໜ່ວຍ ແລະ ສ້າງລະບົບນ້ຳປະປາໄດ້ 128 ກິໂລແມັດ.
ສຳລັບການມອບພື້ນທີ່ເພື່ອກໍ່ສ້າງ ແຂວງຫລວງນ້ຳທາ ມາຮອດປັດຈຸບັນ ສາມາດມອບພື້ນທີ່ໃຫ້ຜູ້ຮັບເໝົາ ໄດ້ນຳເນີນການກໍ່ສ້າງແລ້ວ 16,6 ກິໂລແມັດ, ເທົ່າກັບ 98,2% ຂອງຄວາມຍາວທັງໝົດ 16,9 ກິໂລແມັດ, ແຂວງອຸດົມໄຊ ສາມາດມອບພື້ນທີ່ໃຫ້ຜູ້ຮັບເໝົາ ລວມທັງໝົດ 125,77 ກິໂລແມັດ, ເທົ່າກັບ 99,36% ຂອງຄວາມຍາວທັງໝົດ 126,6 ກິໂລແມັດ.
ແຂວງຫລວງພະບາງ ສາມາດມອບພື້ນທີ່ໃຫ້ຜູ້ຮັບເໝົາ ລວມທັງໝົດ 76,94 ກິໂລແມັດ, ເທົ່າກັບ 96,18% ຂອງຄວາມຍາວທັງໝົດ 80 ກິໂລແມັດ, ແຂວງວຽງຈັນ ສາມາດມອບພື້ນທີ່ໃຫ້ຜູ້ຮັບເໝົາ ລວມທັງໝົດ 144,5 ກິໂລແມັດ, ເທົ່າກັບ 99,2%, ຂອງຄວາມຍາວທັງໝົດ 145,5 ກິໂລແມັດ ແລະ ນະຄອນຫລວງວຽງຈັນ ສາມາດມອບພື້ນທີ່ໃຫ້ຜູ້ຮັບເໝົາ ລວມທັງໝົດ 34,35 ກິໂລແມັດ ເທົ່າກັບ 86,52% ຂອງຄວາມຍາວທັງໝົດ 39,7 ກິໂລແມັດ.
ແຫຼ່ງຂໍ້ມູນ: ສຳນັກຂ່າວສານປະເທດລາວ