ພິທີປິດຊຸດຝຶກອົບຮົມພັດທະນາສີມືແຮງງານ ສາຂາຊ່າງຕິດຕັ້ງໄຟຟ້າໃນອາຄານ ແລະສາຂາໄອທີ ທີ່ສູນພັດທະນາສີມືແຮງງານແຂວງສະຫວັນນະເຂດ ໄດ້ຈັດຂຶ້ນຢ່າງເປັນທາງການ ໂດຍພາຍໃຕ້ການເຂົ້າຮ່ວມຮ່ວມຂອງທ່ານ ນາງທຸມມີ ລາດສຸ ລິນ ຮອງຫົວໜ້າພະແນກແຮງງານ-ສະຫວັດດີການສັງຄົມແຂວງ. ຈາກນີ້ກໍ່ມີບັນດາທ່ານ ຜູ້ຕາງໜ້າພະແນກການຂອງແຂວງ, ສະຖາບັນ ແລະບັນດາເມືອງໃກ້ຄຽງເຂົ້າຮ່ວມ.
ໃນພິທີ ທ່ານ ພູຂົງ ຈັນທະວີໄລ ຮອງຫົວໜ້າສູນພັດທະນາສີມືແຮງງານ ແຂວງສະຫວັນນະເຂດ ໄດ້ລາຍງານຜົນການຈັດຝຶກອົບຮົມພັດທະນາສີມືແຮງງານ ສາຂາຊ່າງຕິດຕັ້ງໄຟຟ້າໃນອາຄານ ແລະສາຂາໄອທີ ທີ່ສູນພັດທະນາສີມືແຮງງານແຂວງສະຫວັນນະເຂດ ວ່າ:
ເພື່ອເປັນການພັດທະນາສີ ມືແຮງງານລາວ ໃນ 1-5 ລະດັບ ຕາມມາດຕະຖານສີມືແຮງງານແຫ່ງຊາດ ໃນຂະແໜງ ຊ່າງຕິດຕັ້ງໄຟຟ້າໃນອາຄານ ແລະ ຊ່າງສ້ອມແປງຄອມພິວເຕີ້.
ດັງນັ້ນ ທາງຄະນະຮັບຜິດຊອບ ແລະ ພາກ ສ່ວນທີ່ກ່ຽວຂ້ອງ ຈຶ່ງໄດ້ຈັດໂຄງການຝຶກອົບຮົມພັດທະນາສີມືແຮງງານ ສາຂາຊ່າງຕິດຕັ້ງໄຟຟ້າໃນອາຄານ ແລະ ສາຂາໄອທີ ຂຶ້ນທີ່ສູນພັດທະນາສີມືແຮງງານແຂວງສະຫວັນນະເຂດ ໃນລະຫວ່າງວັນທີ 5-9 ເດືອນສິງຫາ ປີ2019.
ໂດຍໄດ້ຄັດເລືອກເອົາປະຊາຊົນ ທີ່ມາຈາກບັນດາບ້ານ ຂອງເມືອງອຸທຸມພອນ ແລະ ເມືອງໄຊບູລີ ເຂົ້າຮ່ວມຝຶກອົບຮົມທັງໝົດ 50 ຄົນ, ຍິງ 7 ຄົນ. ໃນນັ້ນ ຝຶກອົບ ຮົມສາຂາຊ່າງຕິດຕັ້ງໄຟຟ້າໃນອາຄານ ມີ 30 ຄົນ, ຍິງ 2 ຄົນ ແລະ ອົບຮົມກ່ຽວກັບແກ້ໄຂ, ສ້ອມ ແປງ ແລະ ບໍາລຸງຮັກສາຄອມພິວເຕີ້ ມີ 20 ຄົນ, ຍິງ 5 ຄົນ.
ໃນການຝຶກແມ່ນໃຊ້ແບບສາທິດ ແລະ ເນັ້ນໃຫ້ນັກຝຶກອົບຮົມປະຕິບັດເຮັດຕົວຈິງເປັນສ່ວນຫຼາຍ ພາຍໃຕ້ການເອົາໃຈໃສ່ຕິດຕາມ, ຊີ້ແນະຂອງຄູຝຶກ ແລະ ທີມງານຮັບຜິດຊອບ. ຜ່ານການຝຶກອົບຮົມເຫັນວ່າ ຜູ້ເຂົ້າຮັບການຝຶກ ໄດ້ມີ ການພັດທະນາຄວາມຮູ້, ທັດສະນະຄະຕິໃນການເຮັດວຽກ, ມີຄວາມສາມາດ ໃນການກຳນົດວັດຖຸອຸ ປະກອນ-ເຄື່ອງມືທີ່ຈຳເປັນຂອງວຽກງານ ລວມທັງການໃຊ້ໄດ້ຢ່າງຖືກຕ້ອງປອດໄພ.
ດັ່ງນັ້ນ ເພື່ອເປັນການຢັ້ງຢືນ ການເຂົ້າຮ່ວມຝຶກອົບຮົມດັ່ງກ່າວ ທ່ານ ນາງທຸມມີ ລາດສຸລິນ ຮອງຫົວໜ້າພະ ແນກແຮງງານ-ສະຫວັດດີການສັງຄົມແຂວງ ກໍ່ໄດ້ມອບຢັ້ງຢືນ ການຝຶກອົບຮົມພັດທະນາສີມືແຮງງານ ໃຫ້ກັບຜູ້ເຂົ້າຮ່ວມຝຶກອົບຮົມທັງສອງສາຂາຢ່າງສົມກຽດ.
ແຫຼ່ງຂໍ້ມູນ: Midia Laos