ພິທີປິດຊຸດເຝິກອົບຮົມພະນັກງານນຳທ່ຽວລະດັບຊາດ ຄັ້ງທີ 26 ຈັດຂຶ້ນທີ່ສະຖາບັນວິທະຍາສາດສັງຄົມແຫ່ງຊາດ ເປັນກຽດເຂົ້າຮ່ວມຂອງທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວັດທະນະທຳ ແລະ ທ່ອງທ່ຽວ ມີຫົວໜ້າສະຖາບັນສື່ມວນຊົນວັດທະນະທຳ ແລະ ທ່ອງທ່ຽວ ພ້ອມດ້ວຍຂະແໜງການກ່ຽວຂ້ອງ.
ທ່ານນາງ ດາລະນີ ພົມມະວົງສາ ຮອງຫົວໜ້າສະຖາບັນສື່ມວນຊົນ ໄດ້ຜ່ານບົດສະຫຼຸບການຈັດເຝິກອົບຮົມຄັ້ງນີ້ວ່າ ຫຼັກສູດການເຝິກອົບຮົມພະນັກງານນຳທ່ຽວລະດັບຊາດໄດ້ສ້າງຂຶ້ນ ແລະ ເລີ່ມຈັດຕັ້ງປະຕິບັດມາແຕ່ປີ 1990 ມາຮອດປີ 2013 ເຝິກອົບຮົມໄດ້ 25 ຄັ້ງ ສ້າງບຸຄະລາກອນໄດ້ 1.300 ຄົນ ມາຮອດປີ 2013 ໄດ້ຈັດຕັ້ງປະຕິບັດທົດລອງນະໂຍບາຍ 3 ສ້າງ.
ຫຼັກສູດດັ່ງກ່າວໄດ້ມອບໃຫ້ບັນດາແຂວງນຳໄປຈັດຕັ້ງປະຕິບັດ ປີ 2014-2018 ໄດ້ມີການປັບປຸງຫຼັກສູດດັ່ງກ່າວເພື່ອຍົກລະດັບພະນັກງານນຳທ່ຽວທີ່ຈະຕໍ່ບັດໃໝ່ ສ້າງເນື້ອໃນຫຼັກສູດໃຫ້ໄດ້ມາດຕະຖານສູງຂຶ້ນ ໂດຍສອດຄ່ອງກັບມາດຕະຖານອາຊຽນ ທັງນີ້ ກໍເພື່ອບັນລຸວິໄສທັດການສ້າງພະນັກງານນຳທ່ຽວລະດັບຊາດ ໃຫ້ມີຄວາມຮູ້ ຄວາມສາມາດດ້ານການນຳທ່ຽວ ມີຄວາມຮັກມັກ ແລະ ອະນຸຮັກວັດທະນະທຳ ຮີດຄອງປະເພນີ ຄຸນນະທຳ ຈາລິຍະທຳ ແລະ ຈັນຍາບັນ.
ຊຸດເຝິກອົບຮົມຄັ້ງນີ້ ມີຜູ້ເຂົ້າຮ່ວມ 66 ທ່ານ ຍິງ 35 ທ່ານ ທີ່ມາຈາກບັນດາແຂວງ ທົ່ວປະເທດ ເຊິ່ງໄດ້ເນັ້ນໃສ່ 3 ພາກ ຄື: ພາກຄວາມຮູ້ທົ່ວໄປ ມີ 6 ວິຊາ ຄວາມຮູ້ພື້ນຖານ ມີ 5 ວິຊາ ແລະ ພາກວິຊາຄວາມຮູ້ສະເພາະອາຊີບ ມີ 13 ວິຊາ ມີທັງພາກທິດສະດີ ແລະ ປະຕິບັດຕົວຈິງ ຜ່ານການເຝິກອົບຮົມບັນດາສຳມະນາກອນ ສາມາດຍາດໄດ້ຄະແນນປະເພດດີຫຼາຍ ຈຳນວນ 30 ຄົນ ຄະແນນດີ 35 ຄົນ ໃນຕອນທ້າຍຂອງພິທີ ໄດ້ມອບໃບຢັ້ງຢືນໃຫ້ສຳມະນາກອນ ພ້ອມທັງຮັບຟັງການໂອ້ລົມຈາກຂັ້ນເທິງ ຊຸດເຝິກອົບຮົມດັ່ງກ່າວເລີ່ມມາແຕ່ວັນທີ 27 ພຶດສະພາ ຫາວັນທີ 9 ສິງຫາ 2019.
ແຫຼ່ງຂໍ້ມູນ: ໜັງສືພິມວຽງຈັນໃໝ່