ພິທີພົບປະແລກປ່ຽນບົດຮຽນກ່ຽວກັບວຽກງານແມ່ຍິງ ລະຫວ່າງສະຫະພັນແມ່ຍິງນະຄອນຫຼວງວຽງຈັນ (ນວ) ແລະ ສະມາຄົມແມ່ຍິງອາຊຽນເທສະບານນະຄອນຂອນແກ່ນ ແຂວງຂອນແກ່ນ ລາຊະອານາຈັກໄທ ຈັດຂຶ້ນຢູ່ຫ້ອງວ່າການປົກຄອງ ນວ ເຊິ່ງຝ່າຍລາວນຳໂດຍທ່ານນາງ ຄຳໄພ ລັດສະໝີ ປະທານສະຫະພັນແມ່ຍິງ ນວ ແລະ ຝ່າຍໄທນຳໂດຍທ່ານນາງ ອໍລະນຸດ ສິຣິສະຫວັດ ປະທານສະມາຄົມແມ່ຍິງອາຊຽນເທສະບານຂອນແກ່ນ ມີທ່ານ ບຸນທ່ຽງ ຂຸນສີ ປະ ທານແນວລາວສ້າງຊາດ ນວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານນາງ ຄຳໄພ ລັດສະໝີ ກ່າວວ່:
ສະຫະພັນແມ່ຍິງ ນວ ເປັນເສນາທິການໃຫ້ຄະນະພັກ-ອົງ ການປົກຄອງ ນວ ແລະ ສູນກາງສະຫະພັນແມ່ຍິງລາວ ໃນການຄົ້ນຄວ້າ ຜັນຂະຫຍາຍມະຕິກອງປະ ຊຸມໃຫຍ່ອົງຄະນະພັກ ນວ ແລະ ມະຕິກອງປະຊຸມໃຫຍ່ຜູ້ແທນແມ່ຍິງທົ່ວປະເທດ ເຂົ້າໃນແຜນພັດ ທະນາແມ່ຍິງໃນຄວາມຮັບຜິດຊອບຂອງຕົນ ເພື່ອສົ່ງເສີມຄວາມກ້າວໜ້າຂອງແມ່ຍິງ ປະຕິບັດສິດສະເໝີພາບລະຫວ່າງຍິງ-ຊາຍ ໃນຄອບຄົວ ແລະ ສັງຄົມ ສຶກສາອົບຮົມ ປຸກລະດົມສະມາຊິກສະຫະພັນແມ່ຍິງ ແລະ ແມ່ຍິງບັນດາເຜົ່າໃນ ນວ ເຊື່ອມຊຶມ ແລະ ປະຕິບັດຕາມແນວທາງນະໂຍບາຍຂອງພັກ ລັດຖະທຳມະນູນ ກົດໝາຍ ແຜນພັດທະນາເສດຖະກິດ-ສັງຄົມຂອງ ນວ ກົດລະບຽບຂອງສະຫະພັນແມ່ຍິງລາວ ແຜນພັດທະນາແມ່ຍິງ ສົນທິສັນຍາສາກົນ ແລະ ເອກະສານອື່ນໆທີ່ພົວພັນເຖິງແມ່ຍິງ ແລະ ເດັກນ້ອຍ.
ທ່ານນາງ ອໍລະນຸດ ສິຣິສະຫວັດ ກ່າວວ່າ:
ສະມາຄົມແມ່ຍິງອາຊຽນເທສະບານຂອນແກ່ນ ເປັນອົງກອນພາກເອກະຊົນ ເຮັດວຽກບໍ່ຫວັງຜົນກຳໄລ ເນັ້ນເຮັດວຽກເພື່ອຄວາມເທົ່າທຽມ ສ້າງຄວາມຮັກຄວາມສາມັກຄີ ແລກປ່ຽນວັດທະນະທຳຮ່ວມກັບປະເທດສະມາຊິກອາຊຽນ ເອົາໃຈໃສ່ຊ່ວຍເຫຼືອຜູ້ດ້ອຍໂອກາດ ຕໍ່ຕ້ານຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຕ້ານປາກົດການຫຍໍ້ທໍ້ ເຊັ່ນ: ບັນຫາຢາເສບຕິດ ນອກນີ້ ຍັງໄດ້ໃຫ້ການຊ່ວຍເຫຼືອບັນເທົາທຸກແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດຕ່າງໆ ລວມທັງຊ່ວຍເຫຼືອຜູ້ອາຍຸສູງ ທີ່ບໍ່ມີຜູ້ເບິ່ງແຍງ.
ການພົບປະຄັ້ງນີ້ ເປັນການເສີມຂະຫຍາຍສາຍພົວພັນມິດຕະພາບ ຄວາມສາມັກຄີ ແລະ ການຮ່ວມມື ລາວ-ໄທ ເວົ້າສະເພາະສະຫະພັນແມ່ຍິງ ນວ ແລະ ສະມາຄົມແມ່ຍິງອາຊຽນເທສະບານຂອນແກ່ນ ໃຫ້ໄດ້ຮັບການພັດທະນາ ແລະ ເສີມຂະຫຍາຍທັງລວງກວ້າງ ແລະ ລວງເລິກ.
ແຫຼ່ງຂໍ້ມູນ: ໜັງສືພິມວຽງຈັນໃໝ່