ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກປະຊາຊົນ ປະຕິວັດລາວ ປະທານອົງການກວດກາລັດຖະ ບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມຄະນະ ເດີນທາງໄປຢ້ຽມຢາມ ແລກປ່ຽນບົດ ຮຽນກັບຄະນະກຳມະການກວດກາສູນກາງພັກກອມມູນິດຫວຽດນາມ ເຊິ່ງນຳໂດຍສະຫາຍ ເຈີນເກີ້ມຕູ໋ ເລຂາ ທິການສູນກາງພັກ ປະທານຄະນະກຳມະການກວດກາສູນກາງພັກກອມມູນິດຫວຽດນາມ ຢູ່ແຂວງຮ່າຕິ່ງ ສສ ຫວຽດນາມ.
ໂອກາດດັ່ງກ່າວ ສະຫາຍ ເຈີນເກີ້ມຕູ໋ ແລະ ສະຫາຍ ເລ ມິ່ງ ຄາຍ ກຳມະການສູນກາງພັກ ປະທານອົງການກວດກາລັດຖະບານ ສສ ຫວຽດນາມ ກໍໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການມາຢ້ຽມຢາມ ແລກປ່ຽນບົດຮຽນຂອງຄະນະຜູ້ແທນ ສປປ ລາວ ຄັ້ງນີ້ ເຊິ່ງມີຄວາມໝາຍຢ່າງຍິ່ງປະກອບ ສ່ວນສຳຄັນໃນການເພີ່ມພູນຄູນສ້າງສາຍພົວພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບ ດ້ານ ລະຫວ່າງສອງພັກ ສອງລັດ ກໍຄື ປະຊາຊົນສອງຊາດ ຫວຽດນາມ-ລາວ ໃຫ້ຈະເລີນງອກງາມຍິ່ງຂຶ້ນ ເວົ້າສະເພາະການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນລະຫວ່າງຄະນະກວດກາສູນກາງພັກປະຊາຊົນປະຕິວັດລາວ ກັບຄະນະກຳມະການກວດກາສູນກາງພັກກອມມູນິດຫວຽດນາມ ໃຫ້ໝັ້ນຄົງຕະຫຼອດໄປ.
ການພົບປະແລກປ່ຽນບົດຮຽນຄັ້ງນີ້ ສອງຝ່າຍໄດ້ຜັດປ່ຽນກັນແຈ້ງສະພາບວຽກງານການນຳພາຂອງພັກ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຈັດຕັ້ງປະຕິບັດໜ້າທີ່ວຽກງານກວດກາພັກກວດກາລັດ ແລະ ວຽກງານຕ້ານການສໍ້ລາດບັງຫຼວງໃນໜຶ່ງປີຜ່ານມາໃຫ້ກັນຊາບ ພ້ອມທັງແລກປ່ຽນຄຳຄິດເຫັນກ່ຽວກັບບັນຫາທີ່ຕ່າງຝ່າຍໃຫ້ຄວາມສົນໃຈ ໃນນີ້ ສອງຝ່າຍເຫັນກົງກັນວ່າ ວຽກງານກວດກາພັກ-ກວດກາລັດ ແລະ ຕ້ານການສໍ້ລາດບັງຫຼວງ ເປັນວຽກງານໜຶ່ງທີ່ສຳຄັນ ແລະ ຈຳເປັນ ແມ່ນພາລະບົດບາດໜຶ່ງຂອງພັກ-ລັດໃນການຊີ້ນຳ-ນຳພາ ເພື່ອປະກອບສ່ວນໃນການພັດທະນາເສດຖະກິດ-ສັງຄົມ ໃຫ້ມີຄວາມສະຫງົບ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.
ໂອກາດໄປຢ້ຽມຢາມແລກປ່ຽນບົດຮຽນຢູ່ ສສ ຫວຽດນາມ ຄັ້ງນີ້ ຄະນະຜູ້ແທນລາວຍັງໄດ້ເຂົ້າຢ້ຽມຄຳນັບສະຫາຍ ຫງວຽນ ຊວນ ຟຸກ ນາຍົກລັດຖະມົນຕີ ສສ ຫວຽດນາມ ສະຫາຍ ເຈີນ ກັວກ ເຫວື່ອງ ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ຢູ່ນະຄອນຫຼວງຮ່າໂນ້ຍ ນອກນີ້ ຍັງໄດ້ຢ້ຽມຊົມສະຖານທີ່ສຳຄັນຂອງແຂວງຮ່າຕິ່ງ ເປັນຕົ້ນ ສະຖານທີ່ລະນຶກຂອງນັກກະວີຊື່ດັງ ຫວຽນຊູ ແລະ ສະຖານທີ່ສັກກະລະບູຊາ ດົ້ງລົກ ອີກດ້ວຍ.
ແຫຼ່ງຂໍ້ມູນ: ສຳນັກຂ່າວສານປະເທດລາວ