ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ (ນວ) ຕ້ອນຮັບການເຂົ້າຢ້ຽມຄຳນັບຂອງທ່ານນາງ ຣີຄາດາ ເຣເຈີ ຜູ້ຕາງໜ້າອົງການສະຫະປະຊາຊາດເພື່ອການພັດທະນາ (UNDP) ປະຈຳລາວ ຢູ່ຫ້ອງວ່າການປົກຄອງ ນວ ໃນໂອກາດທີ່ມາດຳລົງຕຳແໜ່ງເປັນຜູ້ຕາງໜ້າອົງການ UNDP ປະຈຳລາວ ຄົນໃໝ່.
ທ່ານ ສິນລະວົງ ຄຸດໄພທູນ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ທ່ານນາງ ຣີຄາດາ ເຣເຈີ ທີ່ຖືກແຕ່ງຕັ້ງໃຫ້ມາດຳລົງຕຳແໜ່ງເປັນຜູ້ຕາງໜ້າອົງການ UNDP ຄົນໃໝ່ ປະຈຳລາວ ເຊິ່ງເປັນການປະກອບ ສ່ວນສຳຄັນໃນການເສີມຂະຫຍາຍສາຍພົວພັນ ການຮ່ວມມືສອງຝ່າຍ ໂດຍສະເພາະການຊຸກຍູ້-ສົ່ງເສີມການຮ່ວມມືການພັດທະນາວຽກງານຕ່າງໆ ລະຫວ່າງອົງການຈັດຕັ້ງທີ່ກ່ຽວຂ້ອງຂອງ ນວ ແລະ ອົງການ UNDP ໃຫ້ກ້າວເຂົ້າສູ່ລວງເລິກຍິ່ງຂຶ້ນ.
ສອງຝ່າຍໄດ້ປືກສາຫາລືກ່ຽວກັບວຽກງານການຮ່ວມມືທີ່ອົງການ UNDP ຈະໃຫ້ການສະໜັບສະໜູນວຽກງານພັດທະນາຂອງ ນວ ໃນຕໍ່ໜ້າ ເປັນຕົ້ນ ການຊຸກຍູ້-ສົ່ງເສີມການຫຼຸດຜ່ອນນຳໃຊ້ປຼາສຕິກພາຍໃນອົງກອນ ການຊຸກຍູ້ໃນລະດັບຊຸມຊົນໃຫ້ເຮັດກິດຈະກຳກັບໂຮງຮຽນ ມະຫາວິທະຍາໄລ ແລະ ຊາວໜຸ່ມເຂົ້າຮ່ວມໂຄງການດັ່ງກ່າວຫຼາຍຂຶ້ນ ແລະ ສະໜັບສະໜູນການຈັດການລະບົບຂີ້ເຫຍື້ອໃນ ນວ ໂດຍຜ່ານການເຝີກອົບຮົມໃຫ້ໄວ ໜຸ່ມຮູ້ຈັກຮັກສາສິ່ງແວດລ້ອມ ແລະ ຮ່ວມມືກັບອົງການແມ່ນ້ຳຂອງ ເພື່ອເຮັດກິດຈະກຳປູກຈິດສຳນຶກກ່ຽວກັບການປ່ຽນແປງດິນຟ້າອາກາດ ແລະ ອື່ນໆ.
ທ່ານນາງ ຣີຄາດາ ເຣເຈີ ໄດ້ລາຍງານກ່ຽວກັບໂຄງການທີ່ພົ້ນເດັ່ນທີ່ UNDP ຈະໄດ້ເລັ່ງໃຫ້ການຊ່ວຍເຫຼືອ ສປປ ລາວ ໃນປີນີ້ ເຊັ່ນ:
ການຊ່ວຍເຫຼືອໄພນ້ຳຖ້ວມ ແລະ ບັນຫາປະຊາຊົນທີ່ໄດ້ຮັບເຄາະຮ້າຍຈາກເຫດການອ່າງເກັບນ້ຳ ເຂື່ອນເຊປຽນ-ເຊນ້ຳນ້ອຍ ແຕກ ການສືບຕໍ່ກິດຈະກຳເກັບກູ້ລະເບີດບໍ່ທັນແຕກ ບັນຫາການບັນລຸເປົ້າໝາຍການຫຼຸດພົ້ນອອກຈາກປະເທດດ້ອຍພັດທະນາຂອງລາວ ແລະ ການກະກຽມແຜນ 9th NSEDP ໃຫ້ສຳເລັດຕາມຄາດໝາຍທີ່ວາງໄວ້.
ແຫຼ່ງຂໍ້ມູນ: ໜັງສືພິມວຽງຈັນໃໝ່
