ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາພັກ ແຂວງເຈົ້າແຂວງໆອຸດົມໄຊ ພ້ອມດ້ວຍການນຳແຂວງ ແລະ ເມືອງຫຼາໄດ້ລົງພົບປະພໍ່ແມ່ປະຊາຊົນຢູ່ ບ້ານອາໂນ ແລະ ບ້ານ ແສນຫຼວງ ເມືອງຫຼາ ແຂວງອຸດົມໄຊ.
ໃນການພົບປະໂອ້ລົມຄັ້ງນີ້, ທ່ານເຈົ້າແຂວງ ໄດ້ຮັບຟັງການລາຍງານສະພາບການພັດທະນາຂອງບ້ານ ຈາກອົງການປົກຄອງບ້ານ ຈາກນັ້ນ, ກໍໄດ້ໃຫ້ທິດຊີ້ນຳ ແລະ ເນັ້ນໃຫ້ອຳນາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນພາຍໃນສອງບ້ານ ຈົ່ງພ້ອມກັນສືບຕໍ່ຮັກສາມູນເຊື້ອດ້ານຕ່າງໆ
ໂດຍສະເພາະແມ່ນຄວາມສາມັກຄີ, ການພັດທະນາ, ຮີດຄອງປະເພນີອັນດີງາມຂອງເຜົ່າ, ພ້ອມກັນຮັກສາສຸຂະ ພາບໃຫ້ແຂງແຮງຢູ່ສະເໝີ, ຊຸກຍູ້ລູກຫຼານໃຫ້ໄດ້ຮັບການສັກຢາ, ຢອດຢາເພື່ອປ້ອງກັນພະຍາດ ຕ່າງໆໃຫ້ຄົບ ຖ້ວນ ແລະ ໄດ້ຮັບການສຶກສາຕາມເກນອາຍຸຢ່າງທົ່ວເຖິງ.
ໂອກາດດັ່ງກ່າວ ທ່ານເຈົ້າແຂວງ ພ້ອມດ້ວຍການນຳຂອງແຂວງ ແລະ ເມືອງຫຼາ ກໍໄດ້ຮ່ວມກັນຢອດຢາໃຫ້ແກ່ເດັກນ້ອຍທີ່ມີອາຍຸແຕ່ 1 ຫາ 5 ປີ.
ພ້ອມທັງໄດ້ນຳເອົາເຄື່ອງນຸ່ງຫົ່ມ ຈຳນວນໜຶ່ງມອບໃຫ້ແກ່ຊາວບ້ານ.
ພ້ອມດຽວກັນ, ທ່ານ ອາ ຈູງ ເຊັງເຊີນ ປະທານບໍລິສັດລືໄຊການຄ້າຈຳກັດ ກໍໄດ້ມອບເງິນສົດຈຳນວນ 5 ລ້ານກີບ ເພື່ອຊຸກຍູ້ວຽກງານສາທາລະນະສຸກຕື່ມອີກ.
ແຫຼ່ງຂໍ້ມູນ: Lao people’s Army News