ບໍລິສັດ Mitsubishi Electric ມອບໃຫ້ບໍລິສັດ ມິດຊູບິຊິ ເອລເລເວເຕີ ປະເທດໄທຈຳກັດ (MET) ເປັນຕົວແທນສ້າງຕັ້ງບໍລິສັດ ເມລໂກ້ເອລເລເວເຕີລາວໂຊລ ຈຳກັດ (MLAO) ເພື່ອນຳສະເໜີທຸລະກິດລິບ ແລະ ຂັ້ນໄດເລື່ອນໃນລາວ ໂດຍເນັ້ນເຈາະຕະຫຼາດເຂດລຸ່ມແມ່ນ້ຳຂອງ.
ກຽມຮອງຮັບການເຕີບໂຕທາງເສດຖະກິດທົ່ວອາຊຽນ ທີ່ເຊື່ອມຕໍ່ກັນແບບໄຮ້ພົມແດນ ໂດຍໄຂໃຫ້ບໍລິການເຕັມຮູບແບບ ວັນທີ 1 ກໍລະກົດ 2019 ຢູ່ນະຄອນຫຼວງວຽງຈັນ ໂດຍມີທ່ານ ພອນໄຊ ສຸດທິພົງ ປະທານສະມາຄົມສະຖາປານິກ ແລະ ວິສະວະກຳກໍ່ສ້າງລາວ ທ່ານ Yasuyuki Ito ປະທານບໍລິສັດ Mitsubishi Corporation ທ່ານ ມຸເນະຮິສະ ໂອກະໂມະໂຕະ ກຳມະການຜູ້ຈັດການ MET ທ່ານ ສົນທິ ປ່ຽມສະຫວັດ ຜູ້ຈັດການທົ່ວໄປ MLAO ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ມຸເນະຮິສະ ໂອກະໂມະໂຕະ ກ່າວວ່າ: MET ເລີ່ມເຮັດທຸລະກິດຈຳໜ່າຍລິບ ແລະ ຂັ້ນໄດເລື່ອນຢູ່ລາວແຕ່ປີ 2010 ໂດຍມອບໃຫ້ບໍລິສັດ ສຸວັນນີໂຮມເຊັນເຕີ ເປັນຕົວແທນຈຳໜ່າຍ ເຊິ່ງໄດ້ຮັບການຕອບ-ຮັບນັບມື້ເພີ່ມຂຶ້ນ ບໍລິສັດ Mitsubishi Corporation ເຊິ່ງເປັນບໍລິສັດແມ່ຢູ່ປະເທດຍີ່ປຸ່ນ.
ຈຶ່ງໄດ້ມອບໃຫ້ MET ດຳເນີນການຈົດທະບຽນສ້າງຕັ້ງ MLAO ເພື່ອດຳເນີນທຸລະກິດ ແລະ ໃຫ້ບໍລິການລິບ ແລະ ຂັ້ນໄດເລື່ອນໃນປະເທດລາວ ເຊິ່ງຈະເສີມຄວາມແຂງແກ່ນໃຫ້ Mitsubishi Electric ໃຫ້ຫຼາຍຂຶ້ນ ແລະ ຄາດວ່າ MLAO ຈະສ້າງລາຍໄດ້ ປະມານ 3,82 ລ້ານໂດລາສະຫະລັດ ຫຼື ລາຍໄດ້ໃຫ້ເຕີບໂຕເພີ່ມຂຶ້ນຫຼາຍກວ່າ 50% ພາຍໃນໄລຍະ 5 ປີ.
ລວມຍອດຜະລິດຕະພັນພາຍໃນຂອງລາວ ມີການເຕີບໂຕປະມານ 7% ຕິດຕໍ່ກັນຫຼາຍປີ ສະແດງໃຫ້ເຫັນທ່າແຮງການເຕີບໂຕຂອງເສດຖະກິດ ລວມເຖິງຕະຫຼາດລິບ ແລະ ຂັ້ນໄດເລື່ອນ ທີ່ມີຄວາມຕ້ອງການເພີ່ມຂຶ້ນ ໂດຍ Mitsubishi Electric ຄາດວ່າສະເພາະ ສປປ ລາວ ມີຄວາມຕ້ອງການໃຊ້ລິບ ແລະ ຂັ້ນໄດເລື່ອນເຖິງ 290 ເຄື່ອງ ໃນ 5 ປີຕໍ່ໜ້າ.
ໂດຍກຸ່ມລູກຄ້າສ່ວນໃຫຍ່ແມ່ນທຸລະກິດໂຮງແຮມລະດັບຊັ້ນນຳ ແລະ ອາຄານສຳນັກງານຕ່າງໆ ເນື່ອງຈາກລິບ ແລະ ຂັ້ນໄດເລື່ອນ ຍີ່ຫໍ້ Mitsubishi ເປັນທີ່ຮູ້ຈັກ ແລະ ໄດ້ຮັບການຍອມຮັບຢ່າງດີໃນລາວ ເຊິ່ງມີສ່ວນແບ່ງຕະຫຼາດ 30% ໃນນີ້ MLAO ຈະຈຳໜ່າຍ ແລະ ໃຫ້ບໍລິການລິບ ແລະ ຂັ້ນໄດເລື່ອນ ທີ່ເນັ້ນຄວາມປອດໄພ ສ່ວນ MET ຈະສະໜັບສະໜູນດ້ານການຕິດຕັ້ງ ແລະ ບໍລິການຫຼັງການຂາຍ ເຊິ່ງປັດຈຸບັນ Mitsubishi Electric ມີຕົວແທນຈຳໜ່າຍລິບ ແລະ ຂັ້ນໄດເລື່ອນຢູ່ທຸກປະເທດໃນອາຊຽນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່
