ກະຊວງອຸດສາຫະກຳ ແລະ ການຄ້າ ຮ່ວມກັບສະພາອຸດສະຫະກຳ ແລະ ການຄ້າແຫ່ງຊາດລາວ ໄດ້ຈັດກອງປະຊຸມປຶກສາຫາລື ລະຫວ່າງຂະແໜງການກ່ຽວຂ້ອງຂອງພາກລັດ ແລະ ພາກທຸລະກິດ ບັນຫາທີ່ຕິດພັນກັບການກໍ່ຕັ້ງ ແລະ ດຳເນີນທຸລະກິດຢູ່ລາວ ຂຶ້ນທີ່ໂຮງແຮມແລນມາກລີເວີໄຊ ນະຄອນຫຼວງວຽງຈັນ ເປັນປະທານຮ່ວມຂອງທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານນາງ ວາລີ ເວດສະພົງ ຮອງປະທານສະພາອຸດສາຫະກຳ ແລະ ການຄ້າແຫ່ງຊາດລາວ ມີຕາງໜ້າພາກລັດ ແລະ ພາກທຸລະກິດເຂົ້າຮ່ວມ.
ກອງປະຊຸມໄດ້ຈັດເປີດໂອກາດໃຫ້ພາກລັດ ແລະ ພາກທຸລະກິດ ໄດ້ປຶກສາຫາລືສຳລັບບັນຫາທີ່ຍັງຄົງຄ້າງ ຄົ້ນຄວ້າ ແລະ ແກ້ໄຂບັນຫາຂໍ້ຂ້ອງໃຈ ຕິດພັນກັບບັນຫາການສ້າງຕັ້ງທຸລະກິດໃນລາວ ທີ່ພາກທຸລະກິດໄດ້ຍົກຂຶ້ນຜ່ານກົນໄກກອງປະຊຸມພາກທຸລະກິດ ຄັ້ງທີ 11 ຜ່ານມາ ແລະ ກອງປະຊຸມຄັ້ງນີ້ ຍັງໄດ້ສະຫຼຸບສັງລວມ ແລະ ກຽມຂໍ້ມູນເພື່ອລາຍງານໃນກອງປະຊຸມພາກທຸລະກິດ ຄັ້ງທີ 12 ທີ່ຈະຈັດຂຶ້ນໃນຕໍ່ໜ້າ.
ສຳລັບກອງປະຊຸມຄັ້ງນີ້ ພາກທຸລະກິດໄດ້ສະເໜີ 3 ບັນຫາຫຼັກ ຄື:
ບັນຫາການສ້າງຕັ້ງທຸລະກິດມີຂັ້ນຕອນຫຍຸ້ງຍາກ ບັນຫາການດຳເນີນທຸລະກິດຄ້າຂາຍ ແລະ ບໍລິການທີ່ບໍ່ຖືກຕ້ອງຕາມລະບຽບກົດໝາຍ ຫຼື ບໍ່ມີໃບອະນຸຍາດດຳເນີນທຸລະກິດ ແລະ ບັນຫາການບໍລິການຂໍ້ມູນວິສາຫະກິດໂດຍໄດ້ສະເໜີໃນພາກລັດແກ້ໄຂ.
ທ່ານນາງ ວາລີ ເວດສະພົງ ໄດ້ກ່າວວ່າ:
ໃນໄລຍະຜ່ານມາລັດຖະບານໄດ້ເພີ່ມທະວີການປັບປຸງການດຳເນີນທຸລະກິດໃນລາວ ແຕ່ກໍຍັງພົບຂອດຂັ້ນທີ່ອຸດຕັນໃນການດຳເນີນທຸລະກິດ ຄື ການເຜີຍແຜ່ລະບຽບການຕ່າງໆຍັງບໍ່ທົ່ວເຖິງ ສະແດງອອກໃຫ້ເຫັນບາງຫົວໜ່ວຍທຸລະກິດຍັງບໍ່ຮັບຮູ້ລະບຽບການ.
ດັ່ງນັ້ນ ຈຶ່ງຕາງໜ້າພາກທຸລະກິດສະ ເໜີໃຫ້ລັດຖະບານເອົາໃຈໃສ່ກົນໄກປະສານງານ ລະຫວ່າງ ພາກລັດ ແລະ ພາກທຸລະກິດໃຫ້ສອດຄ່ອງເຊື່ອມຈອດກັນ ແລະ ເອົາໃຈໃສ່ເຜີຍແຜ່ລະບຽບການໃຫ້ທົ່ວເຖິງ ພ້ອມທັງສະເໜີໃຫ້ພາກລັດຕັ້ງຄະນະກຳມະການໜຶ່ງຂຶ້ນ ໂດຍໃຫ້ພາກທຸລະກິດ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວມີສ່ວນຮ່ວມ ຄົ້ນຄວ້າສ້າງຂໍ້ກຳນົດຕ່າງໆເພື່ອໃຫ້ສອດຄ່ອງໃນການດຳເນີນທຸລະກິດ ໂດຍສະເພາະ ການຜັນຂະຫຍາຍນິຕິກຳລຸ່ມກົດໝາຍຂອງການສົ່ງເສີມການລົງທຶນ ຕ້ອງແຍກອອກຢ່າງຊັດເຈນແຕ່ລະຂະແໜງການລົງທຶນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່