ບໍລິສັດໄຟຟ້ານໍ້າເທີນ 02 ໄດ້ຢຸດຕິການຜະລິດກະແສໄຟຟ້າ ແລະ ປ່ອຍນໍ້າລົງຄອງເໝືອງສົ່ງນໍ້າລົງສູ່ແມ່ນ້ຳເຊບັ້ງໄຟຊົ່ວຄາວ (ທາງຂື້ນລົງຂອງປາ).
ໂດຍຕ້ອງໄດ້ປະຕິບັດຕາມສັນຍາສຳປະທານລະຫວ່າງບໍລິສັດໄຟຟ້ານໍ້າເທີນ 02 ແລະ ລັດຖະບານລາວ ທີ່ກໍານົດໄວ້ຄື: ໂຄງການໄຟຟ້ານໍ້າເທີນ 02 ຕ້ອງລຸດອັດຕາການປ່ອຍນໍ້າລົງສູ່ນໍ້າເຊບັ້ງໄຟ ເມື່ອອັດຕາການໄຫລຂອງນໍ້າເຊຢູ່ເມືອງມະຫາໄຊຂຶ້ນຮອດລະດັບ 14,4 ແມັດ.
ວັນທີ 04 ກັນຍາ 2019, ເຮືອນຈັກບໍລິສັດ ໄຟຟ້ານໍ້າເທີນ 02 ບ້ານສ້າງແກ້ວ ເມືອງຍົມມະລາດ ບໍລິສັດໄຟຟ້າເທີນ 02 ໄດ້ຈັດກອງປະຊຸມປຶກສາຫາລືກ່ຽວກັບການຢຸດການປ່ອຍນໍ້າ ແລະ ຢຸດທຳການຜະລິດກະແສໄຟຟ້າຊົ່ວຄາວ ເນື່ອງຈາກລະດັບນໍ້າເຊບັ້ງໄຟເພີ່ມຂຶ້ນສູງ.
ປະຕິບັດຕາມຂໍ້ຕົກລົງເຫັນພ້ອມຂອງສັນຍາສຳປະທານ, ເພື່ອແນໃສ່ເຮັດໃຫ້ຜູ້ມີສ່ວນຮ່ວມໄດ້ກຳນົດ ແລະ ຢັ້ງຢືນວ່າທາງບໍລິສັດໄຟຟ້ານໍ້າເທີນ 02 ໄດ້ຢຸດຕິການປ່ອຍນໍ້າທັງນໍາໄປເຜີຍແຜ່ໂຄສະນາໃຫ້ປະຊາຊົນບ້ານເປົ້າໝາຍລຽບຕາມແຄມນໍ້າເຊບັ້ງໄຟໄດ້ຮູ້ສະພາບລວມກ່ຽວກັບອຸປະກອນຕ່າງໆ ທີ່ຕິດຕັ້ງໃນແຕ່ລະຈຸດຂອງລະບົບການວັດແທກນໍ້າການບໍລິຫານຈັດເກັບນໍ້າໃນໄລຍະລະດູຝົນ ແລະ ລະດູແລ້ງ.
ເນື່ອງຈາກທ້າຍເດືອນສິງຫາ ຫາຕົ້ນເດືອນກັນຍາ 2019, ໄດ້ມີພາຍຸເຂົ້າມາເຂດພາກາງເຊິ່ງໄດ້ມີຝົນຕົກໜັກຢູ່ເຂດອ່າງນໍ້າເທີນ 02 ແລະ ອ່າງຕອນເທິງເຊບັ້ງໄຟປະມານ 175 ມິລີແມັດພາຍໃນມື້ດຽວເຮັດໃຫ້ລະດັບນໍ້າເຊບັ້ງໄຟສູງຮອດລະດັບເຕືອນໄພ (ເຂດອັນຕະລາຍ) ດັ່ງນັ້ນທາງບໍລິສັດໄຟຟ້ານໍ້າເທີນ 02 ເພື່ອປະຕິບັດຕາມສັນຍາສຳປະທານແມ່ນໄດ້ມີການປິດປະຕູນໍ້າຈາກເຮືອນຈັກໂດຍເລີ່ມປິດຈັກແຕ່ 01 ໂມງແລງຂອງວັນທີ 03 ກັນຍາ 2019 ແລະ ເລີ້ມປິດສົມບູນ 11 ໂມງທ່ຽງຄືນ ກ່ອນລະດັບນໍ້າເຊບັ້ງໄຟຈະສູງນີ້, ແມ່ນເປັນການປະຕິບັດຕາມສັນຍາສຳປະທານ ແລະ ອີກຢ່າງໜຶ່ງແມ່ນເພື່ອຮັບປະກັນວ່ານໍ້າຢູ່ເຊບັ້ງໄຟຈະບໍ່ມີນໍ້າເທີນ 02 ໄປສົມທົບ, ເພື່ອເຮັດໃຫ້ນໍ້າຢູ່ເຊບັ້ງໄຟງສູງກວ່າລະດັບນໍ້າທຳມະຊາດ ທັງເພື່ອຮັບປະກັນຄວາມປອດໄພຂອງປະຊາຊົນ.
ເປັນໂອກາດອັນດີທີ່ທາງຄະນະຂອງເມືອງ ແລະ ໝູ່ບ້ານ ໄດ້ມາຢ້ຽມຊົມເຮືອນຈັກເຮົາ, ເຄື່ອງຈັກທຸກເຄື່ອງເເມ່ນໄດ້ຢຸດທຳການຜະລິດ, ນໍ້າທີ່ສົ່ງໄປຕາມຄ່ອງສົ່ງນໍ້າແມ່ນໄດ້ປິດ, ໃຫ້ໜັ້ນໃຈໄດ້ວ່ານໍ້າເທີນ 02 ແມ່ນໄດ້ຕິດຕາມລະດັບນໍ້າຕະຫລອດເວລາ ແລະ ນໍ້າທີ່ຂຶ້ນແມ່ນນໍ້າມາຈາກທຳມະຊາດ.
ຕາມສະຖານີແທກນໍ້າປະຈຸບັນນໍ້າຢູ່ເຊບັ້ງໄຟແມ່ນຍັງຈະສືບຕໍ່ຂຶ້ນອີກ ປະມານ 02 – 03 ວັນ, ເພາະນໍ້າທາງເໜືອເຂົ້າມາສົມທົບຍັງບໍ່ເມິດ ດັ່ງນັ້ນຢາກໃຫ້ພໍ່ແມ່ປະຊາຊົນຈົ່ງໄດ້ຕິດຕາມຂໍ້ມູນຂ່າວສານ ແລະ ກຽມພ້ອມທີ່ຈະຮັບມືກັບນໍ້າທີ່ຈະເກີດຂຶ້ນໃນຂ້າງໜ້ານີ້.
ຄາດວ່າຈະເລີ່ມແລ່ນເຄື່ອງຈັກຜະລິດໄຟໄຟ້າ ແລະ ປ່ອຍນໍ້າກໍ່ຕໍ່ເມືອແມ່ນໍ້າເຊບັ້ງໄຟໄດ້ລຸດລົງ.
ແຫຼ່ງຂໍ້ມູນ: Sourioudong Sundara
