ພິທີເປີດການບໍລິການຮັບຊຳລະ QR Code Union Pay ຄັ້ງທຳອິດໃນລາວ ລະຫວ່າງທະນາຄານການຄ້າຕ່າງປະເທດລາວມະຫາຊົນ (BCEL) ແລະ Union Pay International (UPI) ຈັດຂຶ້ນຢູ່ນະຄອນຫຼວງວຽງຈັນ ໂດຍມີທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ທ່ານ ພູຂົງ ຈັນທະຈັກ ຜູ້ອຳນວຍການໃຫຍ່ BCEL ທ່ານ ວິນເຊັນ ລິງ ຮອງຜູ້ອຳນວຍການໃຫຍ່ UPI ປະຈຳພາກພື້ນອາຊີຕາເວັນອອກສຽງໃຕ້ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
BCEL ແລະ UPI ໄດ້ຮ່ວມມືທຸລະກິດນຳກັນມາຫຼາຍກວ່າ 10 ປີ ເລີ່ມຈາກການຮ່ວມມືອອກບັດເອທີເອັມ Union Pay ບັດນັກສຶກສາ ບັດເຄຣດິດ Union Pay ໂຄຣແບນ ກ້າວເຖິງການອັບເດດຕູ້ເອທີເອັມໃຫ້ສາມາດຮັບບໍລິການບັດຊິບ Union Pay ແລະ ການອັບເດດເຄື່ອງຮັບບັດໃຫ້ສາມາດຮັບ Union Pay ໃນທົ່ວປະເທດ.
ເພື່ອສືບຕໍ່ພັດທະນາການບໍລິການ ໃຫ້ຮອງຮັບກັບການຂະຫຍາຍຕົວຂອງເຕັກໂນໂລຊີທາງການເງິນ ໃຫ້ຂະຫຍາຍຕົວນັບມື້ນັບສູງຂຶ້ນ ຈຶ່ງໄດ້ຮ່ວມມືກັນໃຫ້ການບໍລິການຮັບຊຳລະສະສາງດ້ວຍ QR Code Union Pay ເປັນຄັ້ງທຳອິດຂຶ້ນໃນລາວ BCEL ເປັນທະນາຄານທຳອິດທີ່ນຳເອົາເຕັກໂນໂລຊີການຊຳລະເງິນດ້ວຍ QR Code ເຊິ່ງໄດ້ຮັບຄວາມນິຍົມຫຼາຍທົ່ວປະເທດ ສຳລັບ App One Pay UPI ເປັນຜູ້ໃຫ້ບໍລິການທຳອິດທີ່ເປີດໃຫ້ບໍລິການຊຳລະສະສາງດ້ວຍ QR Code ໃນບັນດາປະເທດອາຊີຕາເວັນອອກສຽງໃຕ້.
ປັດຈຸບັນຜູ້ໃຊ້ແອັບມືຖື Union Pay ສາມາດໃຊ້ບໍລິການຊຳລະຜ່ານມືຖືໄດ້ຫຼາຍກວ່າ 11 ລ້ານຮ້ານຄ້າຢູ່ຈີນ ແລະ ອີກ 32 ປະເທດ ເພື່ອນຳມາດຕະຖານສາກົນມາໃຊ້ໃຫ້ເກີດປະໂຫຍດຮ່ວມກັນ ຍົກລະດັບການບໍລິການຊຳລະສະສາງລະຫວ່າງປະເທດ ດ້ວຍລະບົບທັນສະໄໝ ເຮັດໃຫ້ການພັດທະນາການເຊື່ອມໂຍງລະບົບການເງິນ ລາວ-ຈີນ ງ່າຍ ວ່ອງໄວ ເພີ່ມຊ່ອງທາງການຊຳລະເງິນທີ່ສະດວກປອດໄພ ຕົ້ນທຶນທີ່ຕ່ຳ ແລະ ສາມາດຕອບສະໜອງຄວາມຕ້ອງການຂອງລູກຄ້າ ໂດຍສະເພາະກຸ່ມທີ່ນຳໃຊ້ Union Pay QR ເຊິ່ງຮ້ານຄ້າສະມາຊິກ QR Code ຂອງ BCEL ນອກຈາກຈະສາມາດຮັບບໍລິການຊຳລະສະສາງຈາກ BCEL One Pay ແລ້ວ ຍັງສາມາດຮັບຊຳລະສະສາງຈາກລູກຄ້າຈີນທີ່ມີແອັບມືຖື Union Pay ໄດ້ອີກດ້ວຍ.
ການຮ່ວມມືຄັ້ງນີ້ ເປັນອີກບາດກ້າວໜຶ່ງທີ່ສຳຄັນໃນການຊ່ວຍຊຸກຍູ້ຮ້ານຄ້າ ແລະ ຫົວໜ່ວຍທຸລະກິດຕ່າງໆໃນລາວ ສາມາດດຶງເອົາການຈັບຈ່າຍໃຊ້ສອຍຈາກນັກທ່ອງທ່ຽວຈີນທີ່ເຂົ້າມາທ່ອງທ່ຽວລາວໄດ້ດີຍິ່ງຂຶ້ນ ຍ້ອນມີຊ່ອງທາງການຊຳລະທີ່ສະດວກ ເປັນການເປີດໂອກາດໃຫ້ຮ້ານຄ້າ ແລະ ຫົວໜ່ວຍທຸລະກິດຕ່າງໆສາມາດຮັບຊຳລະດ້ວຍລະບົບທັນສະໄໝ ແລະ ມີກຸ່ມລູກຄ້າກວ້າງຂວາງ ສາມາດເພີ່ມຍອດຂາຍ ສົ່ງເສີມການຄ້າ ແລະ ສະໜັບສະໜູນການຊຳລະເງິນລະຫວ່າງສອງປະເທດ.