ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ (ນວ) ຮ່ວມກັບບໍລິສັດ ເວີນຟອງໃໝ່ຮັກສາພືດກະສິກຳ ຈຳກັດ ຈັດສຳມະນາເຜີຍແຜ່ ແລະ ສາທິດການນຳໃຊ້ໂດຣນ ໃນວຽກງານກະສິກຳ ຂຶ້ນ ຢູ່ພະແນກດັ່ງກ່າວ ໂດຍມີທ່ານ ວາດສະໜາ ສີຈະເລີນ ຮອງຫົວໜ້າພະແນກກະສິກຳ ແລະ ປ່າໄມ້ ນວ ທ່ານ ສີສະຫວັດ ສິນທະວີ ຮອງຫົວໜ້າພະແນກກະສິກຳ ແລະ ປ່າໄມ້ ນວ ທ່ານ ຫວັງຕົ້ງ ປະທານບໍລິສັດ ເວີນຟອງໃໝ່ ຮັກສາພືດກະສິກຳ ຈຳກັດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ທ່ານ ວາດສະໜາ ສີຈະເລີນ ກ່າວວ່າ:
ການສາທິດພົ່ນຢາຂ້າຫຍ້າດ້ວຍການນ້ຳໃຊ້ໂດຣນ ສາມາດພົ່ນຢາຂ້າຫຍ້າໄດ້ເນື້ອທີ່ກວ້າງໃນເວລາສັ້ນ ເຊິ່ງຕິດພັນກັບການຫັນປ່ຽນໄຮ່ນານ້ອຍເປັນໄຮ່ນາໃຫຍ່ ທີ່ນອນໃນແຜນງານການຄ້ຳປະກັນສະບຽງອາຫານ ແລະ ຜະລິດເປັນສິນຄ້າລະດັບຊາດ.
ຈຸດປະສົງເພື່ອເລັ່ງໃສ່ໃຫ້ການປູກເຂົ້າດ້ວຍວິທີການນຳໃຊ້ເຄື່ອງມືທີ່ທັນສະໄໝ ໃນການຜະລິດພົ່ນຢາກຳຈັດແມງໄມ້ ສັດຕູພືດ ແລະ ຢາຂ້າຫຍ້າທີ່ທັນສະໄໝ ແລະ ສາທິດເຕັກນິກການນຳໃຊ້ໃນວຽກງານກະສິກຳ ໂດຍສະເພາະ ເຂົ້າ ພືດພັນທັນຍາຫານຊະນິດຕ່າງໆ.
ການສາທິດນຳໃຊ້ໂດຣນ ພົ່ນຢາຂ້າຫຍ້າເປັນວຽກງານໜຶ່ງທີ່ມີຄວາມສະດວກ ວ່ອງໄວ ປ້ອງກັນ ແລະ ຢຸດຢັ້ງການຈະເລີນເຕີບໂຕຫຍ້າໃນໄຮ່ນາ ເພື່ອໃຫ້ຜູ້ເຂົ້າຮ່ວມໄດ້ເຂົ້າໃຈກ່ຽວກັບວຽກງານການນຳໃຊ້ໂດຣນ ພົ່ນຢາຂ້າຫຍ້າ ແລະ ປ້ອງກັນຜົນກະທົບດ້ານສິ່ງແວດລ້ອມ ແລະ ສັງຄົມ ສາມາດນຳໄປໝູນໃຊ້ໃນກິດຈະກຳດ້ານສິ່ງແວດລ້ອມ ແລະ ສັງຄົມ ການນຳໃຊ້ໂດຣນ ໃນວຽກງານກະສິກຳ ກໍຄື ພົ່ນຂ້າຫຍ້າ ສາມາດປະຢັດແຮງງານ ເວລາ ແລະ ຫຼຸດຜ່ອນຄວາມສ່ຽງສານພິດຕໍ່ສຸຂະພາບຮ່າງກາຍ ເຊິ່ງໂດຣນ ຍັງສາມາດພົ່ນສີດໄດ້ທົ່ວເຖິງທຸກສະຖານທີ່.
ແຫຼ່ງຂໍ້ມຸນ: ໜັງສືພິມວຽງຈັນໃໝ່
