ລັດຖະບານ ກໍຄື ນະຄອນຫຼວງວຽງຈັນ (ນວ) ໄດ້ນຳເອົາເຂົ້າຄັງແຮລັດຖະບານ 2.000 ໂຕນ ອອກມາແຊກແຊງ ແລະ ດັດສົມຕະຫຼາດເພື່ອແນໃສ່ໃຫ້ຜູ້ມີລາຍໄດ້ຕ່ຳສາມາດຊື້ເຂົ້າກິນປ້ອງກັນການຂາດແຄນເຂົ້າ ແລະ ການເກງກຳໄລ ເຊິ່ງໃນໄລຍະຜ່ານມາໄດ້ມີຜູ້ສວຍໂອກາດປັບຂຶ້ນລາຄາເຂົ້າອັນເນື່ອງຈາກຫຼາຍແຂວງໄດ້ປະສົບໄພພິບັດນ້ຳຖ້ວມ.
ທີ່ຕະຫຼາດສະອາດ ບ້ານດົງຄຳຊ້າງ ເມືອງຫາດຊາຍຟອງ ນວ ພະແນກອຸດສາຫະກຳ ແລະ ການຄ້າ ນວ ຮ່ວມກັບ ບໍລິສັດ ຄຳແພງເພັດແຈ້ງສະຫວ່າງສົ່ງເສີມການກະເສດ ຂາອອກ-ຂາເຂົ້າ ຈຳກັດຜູ້ດຽວ ໄດ້ຈັດພິທີເປີດຈຸດຈຳໜ່າຍເຂົ້າສານເພື່ອແຊກແຊງລາຄາ ແລະ ດັດສົມຕະຫຼາດເຂົ້າໜຽວປະເພດ 2 ໃນລາຄາ 6.500 ກີບຕໍ່ກິໂລ ມີທ່ານ ເບີລິນ ເພັດຈັນທະຣາດ ຫົວໜ້າພະແນກອຸດສາຫະກຳ ແລະ ການຄ້າ ນວ ທ່ານ ນາງ ຈັນເພັງ ແສງທະວີ ອຳນວຍການບໍລິສັດ ຄຳແພງເພັດ ແຈ້ງສະຫວ່າງສົ່ງເສີມການກະເສດ ຂາອອກ-ຂາເຂົ້າ ຈຳກັດຜູ້ດຽວ ພ້ອມດ້ວຍຕາງໜ້າເມືອງ ແລະ ພະແນກການກ່ຽວຂ້ອງເຂົ້າຮ່ວມ.
ປັດຈຸບັນ ພະແນກອຸດສາຫະກຳ ແລະ ການຄ້າ ນວ ໄດ້ມອບໝາຍໃຫ້ບໍລິສັດ ຄຳແພງເພັດ ແຈ້ງສະຫວ່າງສົ່ງເສີມການກະເສດ ຂາອອກ-ຂາເຂົ້າ ຈຳກັດຜູ້ດຽວ ທີ່ມີສັນຍາກັບລັດຖະບານເຮັດຄັງແຮເຂົ້າແຊກແຊງລາຄາ ແລະ ດັດສົມຕະ ຫຼາດໄດ້ພ້ອມຮັບມືກັບບັນຫາເຂົ້າກິນເໜັງຕີງຂຶ້ນລາຄາເກີນ 20% ຂອງລາຄາຕະຫຼາດໃນ ນວ ແລະ ບໍລິສັດໄດ້ມີຄວາມພ້ອມ ແລະ ມີຄວາມຮັບປະກັນເຂົ້າແຮໄວ້ຢູ່ໃນສາງຂອງຕົນ 40% ຕາມວົງເງິນທີ່ຍັງເຫຼືອ ນຳເອົາເຂົ້າຄັງແຮມາຈຳໜ່າຍໂດຍສະເພາະ ເຂົ້າສານໜຽວປະເພດ 2 ຈຳນວນ 2.000 ໂຕນ ໃນລາຄາ 6.500 ກີບຕໍ່ກິໂລ ຖ້າສົມທຽບໃສ່ລາຄາຕາມຕະຫຼາດໃນ ນວ ປັດຈຸບັນ 8.500 ກີບຕໍ່ກິໂລ ເຫັນວ່າຫຼຸດລົງກວ່າ 2.000 ກີບ ຫຼື ເທົ່າກັບ 23,53% ນອກນີ້ ບໍລິສັດຍັງມີຜະລິດຕະພັນເຂົ້າສານຈ້າວມາວາງຈຳໜ່າຍ ຄື: ເຂົ້າຈ້າວຫອມມະລິປະເພດ 1 ລາຄາ 8.000 ກີບ ປະເພດ 2 ແລະ ເຂົ້າຈ້າວຂາວ ລາຄາ 7.000 ກີບຕໍ່ກິໂລ.
ສຳລັບຈຸດຈຳໜ່າຍເຂົ້າດັ່ງກ່າວໄດ້ແບ່ງອອກເປັນ 5 ຈຸດ ຄື:
ຈຸດຕະຫຼາດສະອາດບ້ານດົງຄຳຊ້າງ ເມືອງຫາດຊາຍຟອງ ຈຸດບໍລິສັດ ລັດວິສາຫະກິດສະບຽງອາຫານນະຄອນຫຼວງ ຈຸດສູນການຄ້າ ລາວ-ໄອເຕັກ ຈຸດຕະຫຼາດອົດຊີ ເມືອງສີໂຄດຕະບອງ ຈຸດໂຮງສີເຂົ້າຂອງບໍລິສັດ ຄຳແພງເພັດແຈ້ງສະຫວ່າງສົ່ງເສີມການກະເສດ ຂາອອກ-ຂາເຂົ້າ ຈຳກັດຜູ້ດຽວ ບ້ານນາສ້ຽວ ເມືອງນາຊາຍທອງ ໄລຍະເວລາຈຳໜ່າຍຈະເລີ່ມແຕ່ວັນທີ 23-30 ກັນຍາ 2019 ຍົກເວັ້ນແຕ່ຈຸດສູນການຄ້າ ລາວ-ໄອເຕັກ ທີ່ຈຳໜ່າຍວັນທີ 21 25 ແລະ 28 ກັນຍານີ້ ເຊິ່ງໃນການຈຳໜ່າຍຜູ້ໜຶ່ງຈະຊື້ໄດ້ບໍ່ເກີນ 36 ກິໂລ.
ການຈັດຕັ້ງປະຕິບັດການແຊກແຊງເຂົ້າຄັ້ງນີ້ ເປັນການສະໜອງເຂົ້າກິນໃຫ້ປະຊາຊົນ ນວ ຢ່າງພຽງພໍກັບຄວາມຕ້ອງການ ທັງຈະສົ່ງຜົນດີໃຫ້ລາຄາເຂົ້າມີສະຖຽນລະພາບໃນລາຄາປົກກະຕິເພື່ອສ້າງຄວາມສະຫງົບຮຽບຮ້ອຍໃຫ້ແກ່ສັງຄົມ.
ແຫຼ່ງຂໍ້ມູນ: ໜັງສືພິມວຽງຈັນໃໝ່