ລາຍງານ 7 ຕຸລາ 2019, ກອງບັນຊາການປ້ອງກັນຄວາມສະຫງົບ (ປກສ) ນະຄອນຫຼວງວຽງຈັນ ໄດ້ສົ່ງຕົວຜູ້ຕ້ອງຫາປຸ່ນຄຳ 437 ບາດ ທີ່ສູນການຄ້າບິກຊີ ຈັງຫວັດຂອນແກ່ນ ເມື່ອເດືອນກໍລະກົດ ທີ່ຜ່ານມາ ໃຫ້ທາງການໄທ ທີ່ດ່ານມິດຕະພາບລາວ-ໄທ 1 ເມື່ອເວລາ 10:15 ຂອງວັນຈັນນີ້.
ເຊິ່ງຜູ້ຕ້ອງຫາຄົນດັ່ງກ່າວຊື່ ສິບເອກເຣືອງສັກ ພັນທອງ ພາຍຫຼັງປຸ້ນຄຳແລ້ວ ໄດ້ຫຼົບໜີເຂົ້າມາໃນ ສປປ.ລາວ ທາງການໄທຈຶ່ງໄດ້ປະສານກັບເຈົ້າໜ້າທີ່ຕຳຫຼວດຂອງລາວ ເພື່ອຂໍໃຫ້ຊ່ວຍຕິດຕາມຈັບກຸມບຸກຄົນດັ່ງກ່າວ ເພື່ອນຳໄປດຳເນີນຄະດີຢູ່ໄທ.
ໂດຍເຈົ້າໜ້າທີ່ຕຳຫຼວດຂອງລາວໄດ້ຕິດຕາມຜູ້ຕ້ອງຫາ ຈົນຮູ້ວ່າໄດ້ມີຄວາມພະຍາຍາມຫຼົບຫຼີກເຈົ້າໜ້າທີ່ຫຼາຍຄັ້ງ ໂດຍການເດີນທາງໄປຍັງແຂວງຊຽງຂວາງ, ຫຼວງພະບາງ ແລະ ສຸດທ້າຍມາທີ່ເມືອງສີໂຄດຕະບອງ ນະຄອນຫຼວງວຽງຈັນ ກ່ອນທີ່ຈະຖືກເຈົ້າໜ້າທີ່ຄວບຄຸມຕົວໄປຂັງໄວ້ ແລ້ວປະສານໃຫ້ເຈົ້າໜ້າທີ່ໄທມາຮັບຕົວ.
ແຫຼ່ງຂໍ້ມູນ: KHAODUNK
