ຍັບຈໍ້ມໍ່ເຂົ້າມາແລ້ວສໍາລັບງານບຸນຊ່ວງເຮືອວຽງຈັນ ປະຈຳປີ 2019 ທີ່ທ່າວັດຈັນ ເຊິ່ງແຕ່ລະປີຈະມີການຄົບງັນ ມີຊາວຄ້າຂາຍນໍາສິນຄ້າເຂົ້າມາວາງຂາຍ ເຊິ່ງປີນີ້ມື້ອອກພັນສາແມ່ນກົງກັບວັນອາທິດ ວັນທີ 13 ຕຸລາ 2019 ຜູ້ສໍາປະທານສະຖານທີ່ຄ້າຂາຍເຜີຍ ເປີດໃຫ້ຈັບຈອງພື້ນທີ່ແລ້ວ ສ່ວນລາຄາເລີ່ມແຕ່ 1,5 ລ້ານກີບຕໍ່ລັອກ ຄ່າຝາກລົດ 5 ພັນກີບ.
ທ່ານ ຄໍາເສັງ ສູນດາລາ ຜູ້ອຳນວຍການ ບໍລິສັດ ຄຳເສັງ ຈຳກັດ ໄດ້ກ່າວວ່າ:
ງານບຸນອອກພັນສາ ປະຈຳປີ 2019 ນີ້ທີ່ທ່າວັດຈັນ ເຊິ່ງລາຄາເລີ່ມແຕ່ 1,5 ລ້ານກີບຕໍ່ລັອກ ປັດຈຸບັນມີຜູ້ມາຈັບຈອງພື້ນທີ່ຄ້າຂາຍແລ້ວ 10% ເຊິ່ງຖ້າທຽບໃສ່ກັບແຕ່ລະປີຖືວ່າຍັງບໍ່ທັນຄຶກຄື້ນ ສະເລ່ຍ 10 ຄົນຕໍ່ມື້ ສໍາລັບລັອກທີ່ພວກເຮົາໄດ້ຈັດສັນເພື່ອໃຫ້ຊາວຄ້າຂາຍໄດ້ເຂົ້າມາຈັບຈອງກໍແບ່ງອອກເປັນ 2 ປະເພດ ຄື:
ລັອກສໍາລັບຂາຍສິນຄ້າຫັດຖະກໍາ ອຸດສາຫະກໍາ ຈາກບັນດາບໍລິສັດຕ່າງໆ ເຊິ່ງຈະໄດ້ຈັດແບ່ງເປັນເຕັ້ນຕາມຄວາມຕ້ອງການຂອງລູກຄ້າ ຫຼື ລູກຄ້າສາມາດເຂົ້າມາຕົກແຕ່ງເອງກໍໄດ້ນອກນັ້ນ ແມ່ນລັອກສໍາລັບຄ້າຂາຍສິນຄ້າປະເພນີ ເປັນຕົ້ນແມ່ນ ຂາຍເຂົ້າຫຼາມ ປີ້ງໄກ່ ການບໍລິການອາຫານ ແລະ ອື່ນໆ.
ໃນວຽກງານປະກອບສ່ວນເພື່ອສ້າງບັນຍາກາດ ແລະ ສີສັນຂອງງານປີນີ້ ບໍລິສັດ ຄໍາເສັງ ໄດ້ປະກອບສ່ວນຕັ້ງເວທີກາງ ເພື່ອສະ ແດງສິລະປະພື້ນເມືອງ (ເປົ່າແຄນ ) ການປະກອບເຮືອໄຟ ບັ້ງໄພພຸ ບັງໄພລະໄລ ກີລາຕີມວຍ ໃນວັນທີ 12 ຕຸລາ 2019 ມີ 12 ຄູ່ ສ່ວນວັນທີ 13 ມີການຖ່າຍທອດສົດທັງ 6 ຄູ່ ເນັ້ນນັກມວຍ ລາວ-ໄທ ສ່ວນວຽກງານຮັກສາຄວາມປອດໄພໄດ້ຕິດຕັ້ງດອກໄຟ ປະກອບສ່ວນຕິດຕັ້ງກ້ອງວົງຈອນປິດ ຈໍານວນ 16 ໜ່ວຍ ສ່ວນການອະນາໄມກໍໄດ້ຮ່ວມກັບຫ້ອງການ ຄບຕ ໃນການຮັກສາຄວາມສະອາດໃຫ້ສໍາເລັດໃນມື້ນັ້ນເລີຍ.
ທ່ານ ຄໍາເສັງ ສູນດາລາ ກ່າວຕື່ມອີກວ່າ: ສໍາລັບການບໍລິການຝາກລົດຂອງປະຊາຊົນໃນປີນີ້ ຍັງບໍ່ທັນໄດ້ລົງເລິກລາຍລະອຽດ ຄາດວ່າຈະມີຫຼາຍພາກສ່ວນເຂົ້າຮ່ວມນໍາ ໂດຍສະເພາະບ້ານ ເຊິ່ງຈຸດນີ້ກໍຍາກໃນການຄຸ້ມຄອງ ໂດຍສະເພາະການເກັບເກີນລາຄາ ສ່ວນການເກັບຄ່າປີ້ຝາກລົດກໍຄືກັບປີຜ່ານໆມາ ຄືລົດຈັກເກັບ 5 ພັນກີບ ລົດໃຫຍ່ 15 ພັນກີບ ຢ່າງໃດກໍຕາມ ກໍຂໍເຊີນຊວນຊາວຄ້າຂາຍຜູ້ທີ່ຍັງບໍ່ທັນມີພື້ນທີ່ຄ້າຂາຍໃຫ້ເຂົ້າມາຈັບຈອງໄດ້ແລ້ວ ເຊິ່ງພວກເຮົາມີພະນັກງານອໍານວຍຄວາມສະດວກໃນຈຸດຕ່າງໆ.
ແຫຼ່ງຂໍ້ມູນ: ໜັງສືພິມເສດຖະກິດ-ການຄ້າ
Hits: 11
