ສະຖາບັນການທະນາຄານ ຈັດພິທີສະຫຼຸບການເຄື່ອນໄຫວ ສົກສຶກສາ 2018-2019 ແລະ ເປີດສົກສຶກສາ 2019-2020 ຂຶ້ນຢູ່ສະຖາບັນດັ່ງກ່າວ ໂດຍມີທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ ທ່ານ ສັນຕິ ພົນເມືອງລາວ ຫົວໜ້າສະຖາບັນການທະນາຄານ ຜູ້ຕາງໜ້າຈາກກະຊວງສຶກສາທິການ ແລະ ກີລາ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ສົກສຶກສາ 2018-2019 ສະຖາບັນການທະນາຄານໄດ້ສ້າງນັກວິຊາການລະດັບຊັ້ນສູງ ຮຸ່ນ 16 ແລະ ຕໍ່ເນື່ອງປະລິນຍາຕີ ຮຸ່ນ 17 ສາຂາການທະນາຄານ ການເງິນ ການບັນຊີ ແລະ ການເງິນຈຸລະພາກ ປະກອບມີ 15 ຫຼັກສູດ ໃນນີ້ ຫຼັກສູດຊັ້ນສູງ 3 ສາຂາ ອະນຸປະລິນຍາ 4 ສາຂາ ປະລິນຍາຕີ 4 ສາຂາ ຕໍ່ເນື່ອງປະລິນຍາຕີ 4 ສາຂາ ປີ 2019 ສະຖາບັນການທະນາຄານໄດ້ຮັບອະນຸມັດຫຼັກສູດຕໍ່ເນື່ອງປະລິນຍາຕີພາກປົກກະຕິ 4 ສາຂາ ເລີ່ມຈັດຕັ້ງໃນສົກສຶກສາ 2019-2020 ເປັນຕົ້ນໄປ.
ສຳລັບສົກສຶກສາ 2018-2019 ສະຖາບັນການທະນາຄານໄດ້ເປີດການຮຽນ-ການສອນ ແຕ່ເດືອນຕຸລາເປັນຕົ້ນມາ ປັດຈຸບັນມີຄູ-ອາຈານປະຈຳ 84 ຄົນ ແລະ ອາຈານຮັບເຊີນ 30 ຄົນ ມີນັກສຶກສາ 3.244 ຄົນ ຍິງ 2.195 ຄົນ ໃນນີ້ ນັກສຶກສາຊັ້ນສູງ ຮຸ່ນ 16 ມີ 647 ຄົນ ຮຸ່ນ 17 ມີ 1.182 ຄົນ ຮຸ່ນ 18 ມີ 1.415 ຄົນ ໃນສົກສຶກສາ 2019-2020 ໄດ້ຮັບນັກສຶກສາໃໝ່ 1.575 ຄົນ ເພີ່ມຂຶ້ນຈາກສົກຜ່ານມາ 8,99%.
ນັບແຕ່ສົກສຶກສາ 2016-2017 ເປັນຕົ້ນມາ ມີນັກສຶກສາທີ່ຄົບເງື່ອນໄຂຮັບໃບປະກາສະນີຍະບັດ1.059 ຄົນ ໃນນີ້ ຊັ້ນສູງ 639 ຄົນ ຕໍ່ເນື່ອງປະລິນຍາຕີ 362 ຄົນ ໃນນີ້ ໄດ້ຮັບໃບປະກາສະນີຍະບັດກຽດນິຍົມ 18 ຄົນ ຊັ້ນສູງ 4 ຄົນ ແລະ ຕໍ່ເນື່ອງປະລິນຍາຕີ 14 ຄົນ ນອກນີ້ ຍັງປະກອບສ່ວນເຄື່ອນໄຫວຂະບວນການຕ່າງໆຢ່າງຕັ້ງໜ້າ ເຮັດໃຫ້ມີຜູ້ໄດ້ຮັບໃບຍ້ອງຍໍ ໃບຊົມເຊີຍ 83 ຄົນ ນັກສຶກສາທີ່ຮຽນດີ-ຮຽນເກ່ງສາມາດຍາດໄດ້ຮັບທຶນການສຶກສາປະເພດ II ຈຳນວນ 25 ຄົນ ໃນນີ້ ນັກສຶກສາປະລິນຍາຕີ ຮຸ່ນ 17 ມີ 5 ຄົນ ແລະ ປະລິນຍາຕີ ຮຸ່ນ 18 ມີ 20 ຄົນ.
ແຫຼ່ງຂໍ້ມູນ: ໜັງສືພິມວຽງຈັນໃໝ່
