ບັນດາສຳມະນາກອນສື່ຈາກລາວ ໃນຊຸດຝຶກອົບຮົມບົດຮຽນການຄຸ້ມຄອງສື່ມວນຊົນຢູ່ຫວຽດນາມ ຈຳນວນ 17 ຄົນ, ນຳໂດຍທ່ານ ທອງວັນ ບຸນບົວທອງ ຮອງຜູ້ອຳນວຍການສະຖານີໂທລະພາບແຫ່ງຊາດລາວ ໄດ້ໄປຢ້ຽມຢາມແລກປ່ຽນບົດຮຽນ ຢູ່ສຳນັກງານໜັງສືພິມຜູ້ແທນປະຊາຊົນ ຫວຽດນາມ, ໂດຍໄດ້ຮັບການຕ້ອນຮັບຈາກ ທ່ານ ໂດ໊ ຈີ ເຫງຍ ບັນນາທິການໃຫຍ່ ໜັງສືພິມຜູ້ແທນປະຊາຊົນ ຫວຽດນາມ ພ້ອມດ້ວຍຄະນະ.
ທ່ານ ໂດ໊ຈີເຫງຍ ແຈ້ງໃຫ້ຊາບວ່າ:
ໜັງສືພິມຜູ້ແທນປະຊາຊົນຫວຽດນາມ ເນັ້ນໜັກໃສ່ໂຄສະນາເຜີຍແຜ່ການເຄື່ອນໄຫວຂອງສະພາແຫ່ງຊາດ, ສະພາທ້ອງຖິ່ນ, ຜູ້ມີສິດເລືອກຕັ້ງໃນທົ່ວປະເທດ, ລວມທັງການພັດທະນາເສດຖະກິດ-ສັງຄົມ(ຫວຽດນາມ ແລະຕ່າງປະເທດ), ລົງເລິກເຫດການພົ້ນເດັ່ນໃນການເຄື່ອນໄຫວໃນຂົງເຂດນິຕິບັນຍັດ.
ທ່າມກາງສະພາບແຫ່ງການຫັນປ່ຽນຢ່າງກະໂດດຂັ້ນຂອງສື່ອອນລາຍ ໃນຊຸມປີມໍ່ມານີ້ ອັນໄດ້ເຮັດໃຫ້ການພິມຈໍາໜ່າຍໜັງສືພິມເຈ້ຍຢູ່ໃນໂລກນັບມື້ຫລຸດລົງນັ້ນ, ແຕ່ໜັງສືພິມຜູ້ແທນປະຊາຊົນຫວຽດນາມ ຍັງສາມາດຮັກ ສາລະດັບຈຳນວນການພິມຈຳໜ່າຍ ແລະ ການໂຄສະນາ ໄດ້ເປັນຢ່າງດີ ບໍມີການປ່ຽນແປງ ເຊິ່ງປັດໄຈສຳຄັນແມ່ນການປັບຕົວ ຫັນປ່ຽນດ້ານເນື້ອໃນ ທີ່ສາມາດດຶງດູດຜູ້ອ່ານກຸ່ມເປົ້າໝາຍໄດ້, ພ້ອມທັງນໍາໃຊ້ຊ່ອງທາງ ການເຜີຍແຜ່ຜ່ານສື່ເອເລັກໂຕຣນິກ ສະໜັບສະໜູນໄດ້ຢ່າງສອດຄ່ອງ.
ໜັງສືພິມຜູ້ແທນປະຊາຊົນຫວຽດນາມ ພັດທະນາຍົກລະດັບມາຈາກວາລະສານຜູ້ແທນປະຊາຊົນ ທີ່ເລີ່ມພິມຈຳໜ່າຍນັບແຕ່ປີ 1988 , ຮອດປີ 2002 ໄດ້ຫັນມາເປັນ ໜັງສືພິມລາຍອາທິດ ແລະເລີ່ມພິມຈໍາໜ່າຍເປັນລາຍວັນໃນປີ 2006, ພ້ອມທັງໄດ້ສ້າງເປັນໜັງສືພິມເອເລັກໂຕນິກ ຄຽງຄູ່ກັນຕື່ມອີກ.
ປັດຈຸບັນ ສຳນັກງານໜັງສືພິມຜູ້ແທນປະຊາຊົນ ຫວຽດນາມ ມີພະນັກງານທັງໝົດ 100 ກວ່າຄົນ, ພິມຈຳໜາຍໜັງສືພິມ 25.000 ສະບັບຕໍ່ວັນ . ພ້ອມກັນນີ້ ຍັງໄດ້ຮັບສິດໃນການພິມຈຳໜ່າຍໜັງສືພິມລາຍອາທິດສະບັບພິເສດ ເພື່ອໃຫ້ປະຊາຊົນ ຄົນຊົນເຜົ່າສ່ວນນ້ອຍ ຢູ່ເຂດພູດອຍຫ່າງໄກສອກຫລີກ ໄດ້ອ່ານລ້າ ຕາມນະໂຍບາຍຂອງລັດຖະບານຫວຽດນາມ.
ແຫຼ່ງຂໍ້ມູນ: ຂປລ