ໄອຍະການເຂດນະຄອນຫລວງວຽງຈັນ ສັ່ງຟ້ອງວິສະວະກອນໄທ ທີ່ຈັບກຸມມາກວ່າ 11 ເດືອນ ຂໍ້ຫາໃນການສໍ້ໂກງຊັບພົນລະເມືອງ ໂດຍປ່ຽນຂໍ້ຫາໃຫມ່ ເປັນຄວາມຜິດໃນການບົກຜ່ອງ ໃນການປະຕິບັດຫນ້າທີ່ ເຮັດໃຫ້ເສຍຫາຍ ເຊິ່ງສານໄດ້ຮັບເລື່ອງໄວ້ແລ້ວ.
ຈາກກໍລະນີທີ່ເຈົ້າຫນ້າທີ່ ຕ.ມ ລາວ ຈັບກຸມ ທ້າວ ກິດຕິເດດ ສິດທິ ອາຍຸ 48 ປີ ວິສະວະກອນໄທທີ່ມາເຮັດວຽກກັບ ບໍລິສັດພົງຊັບທະວີ ໃນສປປ.ລາວ ຂໍ້ຫາສໍ້ໂກງຊັບພົນລະເມືອງ ເມື່ອວັນທີ 20 ຕຸລາ 2018 ແລະຄວບຄຸມຕົວໄວ້ ເປັນເວລາ 11 ເດືອນ ລະຫວ່າງຢູ່ໃນຂັ້ນຕອນຊັ້ນໄອຍະການ ເຊິ່ງມີອຳນາດຄວບຄຸມຕົວໄວ້ໄດ້ 1 ປີ.
ຄວາມຄືບຫນ້າໃນເລື່ອງນີ້ ຫນັງສືພິມໄທລັດ ສະເຫນີຂ່າວລາຍງານຂອງ ກະຊວງການຕ່າງປະເທດຂອງໄທວ່າ ໃນຂະນະນີ້ໄອຍະການເຂດໃນນະຄອນຫລວງວຽງຈັນ ໄດ້ສັ່ງຟ້ອງ ທ້າວ ກິດຕິເດດ ວິສະວະກອນໄທແລ້ວ ເມື່ອເດືອນກັນຍາຜ່ານມາ ໂດຍປ່ຽນຈາກຂໍ້ຫາສໍ້ໂກງຊັບພົນລະເມືອງ ເປັນຂໍ້ຫາໃຫມ່ຄື ຄວາມຜິດໃນຂໍ້ຫາບົກຜ່ອງໃນການປະຕິບັດຫນ້າທີ່ ເຮັດໃຫ້ມີຄວາມເສຍຫາຍ ໂດຍສານໄດ້ຮັບເລື່ອງໄວ້ແລ້ວ ເມື່ອຕົ້ນເດືອນຕຸລາ ຄາດ ວ່າຈະໃຊ້ເວລາພິຈາລະນາຄະດີ ພາຍໃນ 30 ວັນ.
ແຫຼ່ງຂໍ້ມູນ: ໜັງສືພິມໄທລັດ
