ພິທີທຳລາຍຢາສູບນອກລະບົບ (ຢາສູບເຖື່ອນ) ຈັດຂຶ້ນບໍ່ດົນມານີ້ ຢູ່ສູນບຳບັດຂີ້ເຫຍື້ອ ຫຼັກ 32 ນະຄອນຫຼວງວຽງຈັນ ໂດຍມີຕາງໜ້າຈາກກົມຕຳຫຼວດສິ່ງແວດລ້ອມ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ຢາສູບທີ່ນຳມາທຳລາຍຄັ້ງນີ້ ແມ່ນຢາສູບນອກລະບົບ ເຊິ່ງນຳເຂົ້າບໍ່ຖືກຕ້ອງຕາມກົດໝາຍ ບໍ່ໄດ້ຜ່ານການເສຍພາສີ-ອາກອນ ບໍ່ມີສະຫຼາກເປັນພາສາລາວ ບໍ່ມີຄຳເຕືອນສຸຂະພາບດ້ວຍຮູບພາບ ຂະໜາດ 75% ແລະ ສະແຕັມພາສີ ທີ່ເຈົ້າໜ້າທີ່ຕຳຫຼວດສິ່ງແວດລ້ອມ ໄດ້ລົງກວດກາຢູ່ຕາມຫ້າງຮ້ານຕ່າງໆ ແຕ່ວັນທີ 16 ກັນຍາ-9 ຕຸລາ 2019 ສາມາດພົບເຫັນຜູ້ລະເມີດ 7 ຄົນ ກັກຢາສູບນອກລະບົບ ໄດ້ 48 ແກັດ ແລະ 62 ຕຸດ ມູນຄ່າເກືອບ 200 ລ້ານກີບ.
ເພື່ອຜັນຂະຫຍາຍເນື້ອໃນນິຕິກຳທີ່ກ່ຽວຂ້ອງ ກັບການຄວບຄຸມຢາສູບໃຫ້ຜູ້ປະກອບການ ພະນັກງານ ປະຊາຊົນທຸກພາກສ່ວນໃຫ້ຮັບຮູ້ ແລະ ເຂົ້າໃຈກ່ຽວກັບຜະລິດຕະພັນຢາສູບຜິດກົດໝາຍ ໂດຍສະເພາະຢາສູບທີ່ລັກລອບນຳເຂົ້າໂດຍບໍ່ໄດ້ເສຍພາສີ-ອາກອນ ແລະ ບໍ່ມີຄຳເຕືອນສຸຂະພາບຢູ່ຊອງຢາສູບ ເຊິ່ງການລະເມີດດັ່ງກ່າວ ເປັນການລະເມີດກົດໝາຍ ລັດຖະດຳລັດ ແລະ ລະບຽບການຕ່າງໆ ທີ່ຕິດພັນກັບວຽກງານການຄວບຄຸມຢາສູບ ເຊິ່ງຢາສູບທີ່ນຳເຂົ້າທີ່ຖືກຕ້ອງຕາມກົດໝາຍຕ້ອງຕິດສະແຕັມພາສີ-ອາກອນ ມີຄຳເຕືອນສຸຂະພາບດ້ວຍຮູບພາບກວມ 75% ມີສະຫຼາກເປັນພາສາລາວໃສ່ວັດຖຸຫຸ້ມຫໍ່ຜະລິດຕະພັນຢາສູບ ແລະ ຢາສູບທີ່ລັກລອບນຳເຂົ້າຜິດກົດໝາຍ ໂດຍທີ່ບໍ່ໄດ້ເສຍພາສີ-ອາກອນ ແລະ ບໍ່ໄດ້ຮັບອະນຸຍາດ ຈາກພາກສ່ວນກ່ຽວຂ້ອງ ເປັນການກະທຳຜິດຕໍ່ປະມວນກົດໝາຍອາຍາ ເລກທີ 118/ປປທ ລົງວັນທີ 26 ມິຖຸນາ 2015 ມາດຕາ 248 ຜູ້ກະທຳຜິດຈະຖືກລົງໂທດຕັດອິດສະລະພາບ 3 ເດືອນ-3 ປີ ແລະ ຈະຖືກປັບໃໝ 1-10 ລ້ານກີບ ໃນກໍລະນີທຳຜິດເປັນອາຈີນ ມີການຈັດຕັ້ງເປັນກຸ່ມ ຈະຖືກຕັດອິດສະລະພາບ 1-5 ປີ ແລະ ຈະຖືກປັບໃໝ 3-20 ລ້ານກີບ.
ສຳລັບຜູ້ຈຳໜ່າຍຜະລິດຕະພັນຢາສູບທີ່ນຳເຂົ້າໂດຍຜິດກົດໝາຍ ຢາສູບທີ່ບໍ່ຕິດສະແຕມພາສີ-ອາ ກອນ ແລະ ບໍ່ມີຕຳເຕືອນສຸຂະພາບ ເປັນການລະເມີດກົດໝາຍ ວ່າດ້ວຍການຄວບຄຸມຢາສູບ ດຳລັດວ່າດ້ວຍການພິມຄຳເຕືອນສຸຂະພາບໃສ່ວັດຖຸຫຸ້ມຫໍ່ຜະລິດຕະພັນຢາສູບ ຈະໄດ້ຖືກນຳໃຊ້ມາດຕະການຕາມດຳລັດວ່າດ້ວຍການປັບໃໝ ແລະ ນຳໃຊ້ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບການຄວບຄຸມຢາສູບ ຈິ່ງຮຽກຮ້ອງມາຍັງທຸກພາກສ່ວນມີສະຕິ ເຄົາລົບກົດໝາຍ ແລະ ບໍ່ສົ່ງເສີມຊົມໃຊ້ຜະລິດຕະພັນທີ່ນຳເຂົ້າໂດຍບໍ່ຖືກຕ້ອງຕາມກົດໝາຍ.
ແຫຼ່ງຂໍ້ມູນ: Vientiane Mai