ປະຊາຊົນບ້ານຮົ່ມເຢັນ, ບ້ານດອນທາດ, ບ້ານດອນສະຫວັນ, ຫ້ອງການຖະແຫຼງຂ່າວ ແລະ ຫ້ອງການທີ່ກ່ຽວຂ້ອງ ພ້ອມກັນຈັດສະຖານທີ່ກະກຽມປະກອບພິທີທາງສາສະໜາ ເພື່ອບູລະນະ – ປະຕິສັງຂອນ ສ້າງວິຫານກວມພະເຈົ້າໃຫຍ່ເມືອງເກົ່າສຸວັນນະໂຄມຄໍາ, ເຊິ່ງຈະມີການນໍາຂອງແຂວງ – ເມືອງ , ພະແນກການອ້ອມຂ້າງແຂວງ, ບັນດາຫ້ອງການພ້ອມຂ້າງເມືອງ ແລະ ປະຊາຊົນຊາວເມືອງຕົ້ນເຜິ້ງ ກໍ່ຄືແຂວງບໍ່ແກ້ວເຂົ້າຮ່ວມ,
ສະນັ້ນ ທາງອົງການປົກຄອງເມືອງຕົ້ນເຜິ້ງ, ອຳນາດການປົກຄອງບ້ານ ແລະ ພໍ່ແມ່ປະຊາຊົນທັງ 3 ບ້ານກຸ່ມດອນທາດ ຄື:
ບ້ານຮົ່ມເຢັນ, ບ້ານດອນທາດ, ບ້ານດອນສະຫວັນ ຂໍແຈ້ງຂ່າວບຸນມາຍັງພຸດທະສາສະນິກະຊົນ ແລະ ຜູ້ທີ່ມີຈິດໃຈເຫຼື້ອມໃສສັດທາຢາກຮ່ວມກິນຮ່ວມທານທົ່ວໄປ ທັງພາຍໃນ ແລະ ຕ່າງປະເທດ ເຊີນຮ່ວມທໍາບຸນປະກອບວັດຖຸປັດໄຈເພື່ອບູລະນະ – ປະຕິສັງຂອນ,
ສ້າງວິຫານພະເຈົ້າໃຫຍ່ເມືອງເກົ່າສຸວັນນະໂຄມຄໍາ ເຊິ່ງເປັນພະປະຕິມາອົງເກົ່າແກ່ ແລະ ເປັນມິ່ງຂວັນຂອງຊາວເມືອງຕົ້ນເຜິ້ງ ກໍ່ຄືຊາວແຂວງບໍ່ແກ້ວ ໃນງານປະກອບພິທີທາງສາສະໜາເພື່ອກະກຽມບູລະນະ – ປະຕິສັງຂອນ, ສ້າງວິຫານກວມພະປະຕິມາອົງດັ່ງກ່າວບໍ່ໃຫ້ຊໍາລຸດຊຸດໂຊມຕາມການເວລາ ແລະ ສະພາບແວດລ້ອມ, ທັງເປັນການພັດທະນາໃຫ້ເປັນແຫຼ່ງທ່ອງທ່ຽວທາງດ້ານວັດທະນະທໍາ ແລະ ປະຫວັດສາດ,
ພິທີດັ່ງກ່າວຈະໄດ້ຈັດຂຶ້ນ ໃນວັນທີ 3 ພະຈິກ, ເວລາ 8 : 30 ນາທີ ເລີ້ມປະກອບພິທີທາງສາສະໜາ, ສະຖານທີ່ແຫຼ່ງປະຫວັດສາດຈຸດພະເຈົ້າໃຫຍ່ເມືອງເກົ່າສຸວັນນະໂຄມຄໍາ ກຸ່ມບ້ານດອນທາດ.
ພວກຂ້າພະເຈົ້າຂໍສະແດງຄວາມຂອບອົກຂອບໃຈລ່ວງໜ້າ ມາຍັງທ່ານຜູ້ມີຈິດໃຈເຫຼື້ອມໃສສັດທາຮ່ວມກິນຮ່ວມທານ, ຂໍອັນເຊີນຄຸນພະສີລັດຕະນະໄຕ ແລະ ສິ່ງສັກສິດທັງຫຼາຍທັງປວງຈົ່ງຄຸ້ມຄອງທ່ານພ້ອມຄອບຄົວ ໃຫ້ປະສົບແຕ່ພອນໄຊອັນປະເສີດສີ່ປະການ ຄື ອາຍຸ ວັນນະ ສຸກຂະ ພະລະ ຕະຫຼອດກາລະນານເທີ້ນ.
ພາບ: ອຸໄທ ພູມມາຂ່າວ: ສົມຄິດ ປັນຍາທອງ ຫ້ອງການ ຖວທ ຕົ້ນເຜິ້ງ