ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ວ່າການລັດຖະມົນຕີກະຊວງແຜນ ການ ແລະ ການລົງທຶນ, ທັງເປັນປະທານຄະນະສະເພາະກິດເພື່ອແກ້ໄຂໄພພິບັດລະດັບຊາດ ໄດ້ສະແດງຄວາມຊົມເຊີຍຕໍ່ທຸກພາກສ່ວນ, ລວມທັງອຳນາດການປົກຄອງ ເມືອງສະໜາມໄຊ ແຂວງອັດຕະປື ແລະ ບັນດາບ້ານທີ່ກ່ຽວຂ້ອງ.
ທີ່ໄດ້ເອົາໃຈໃສ່ໃນການແກ້ໄຂ ແລະ ຟື້ນຟູ ພາຍຫລັງເກີດໄພພິບັດນ້ຳຖ້ວມ ຢູ່ເມືອງສະໜາມໄຊ ຕະຫລອດໄລຍະ 1 ປີທີ່ຜ່ານມາ ເຊິ່ງມີຜົນສຳເລັດໃນຫລາຍໆດ້ານ ແລະ ຊີວິດການເປັນຂອງປະຊາຊົນ ດີຂຶ້ນເທື່ອລະກ້າວ.
ທ່ານ ສອນໄຊ ສີພັນດອນ ກ່າວໃນກອງປະຊຸມລາຍງານຄວາມຄືບໜ້າໃນການແກ້ໄຂ ແລະ ຟື້ນຟູຫລັງໄພພິບັດ ເຊິ່ງຈັດຂຶ້ນໃນວັນທີ 1 ພະຈິກ 2019 ທີ່ແຂວງອັດຕະປື ວ່າ:
ນັບຕັ້ງແຕ່ເກີດເຫດຄູກັ້ນນ້ຳຂອງສັນເຂື່ອນໄຟຟ້າ ເຊປຽນ-ເຊນ້ຳນ້ອຍແຕກ ໃນວັນທີ 23 ກໍລະກົດ 2018 ເປັນຕົ້ນມາ ທຸກຄົນ, ທຸກພາກສ່ວນທີ່ກ່ຽວຂ້ອງ ກໍໄດ້ພ້ອມກັນເອົາໃຈໃສ່ສຸມທຸກກຳລັງເຫື່ອແຮງ ແລະ ສະຕິປັນຍາ ເພື່ອແກ້ໄຂບັນຫາຕ່າງໆຈົນໄດ້ຮັບຜົນສຳເລັດ ເປັນຕົ້ນແມ່ນ ການຈັດສັນທີ່ຢູ່ອາໄສຊົ່ວຄາວ, ວຽກງານນະໂຍບາຍ, ການຊ່ວຍເຫລືອບັນເທົາທຸກ, ການສົງເຄາະ, ການຈັດສັນອາຊີບ ແລະ ການຊົດເຊີຍຕ່າງໆ.
ແຫຼ່ງຂໍ້ມູນ: Medialaos