ເພື່ອເຮັດໃຫ້ງານບຸນນະມັດສະການພະທາດຫຼວງວຽງຈັນ ປະຈຳປີ 2019 ແລະ ສະຫຼຸບໂຄງການປະຕິສັງຂອນພະທາດຫຼວງ ຄັ້ງທີ 4 ທີ່ຈັດຂຶ້ນວັນທີ 5-11 ພະຈິກ 2019 ໃຫ້ມີຄວາມເປັນລະບຽບຮຽບຮ້ອຍ ແລະ ສະອາດງາມຕາ ປາສະຈາກຂີ້ເຫຍື້ອຖິ້ມຊະຊາຍ.
ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ໄດ້ມີການວາງແຜນຢ່າງລະອຽດໃນການຮັກສາຄວາມສະອາດ ໂດຍໄດ້ຈັດກອງປະຊຸມປຶກສາຫາລືຮ່ວມກັບຄະນະກຳມະການຈັດງານ ແລະ ຜູ້ສຳປະທານງານບຸນທີ່ໄດ້ເນັ້ນໃຫ້ຜູ້ສຳປະທານແຕ່ລະເຂດເອົາໃຈໃສ່ກັບຊາວຄ້າຂາຍແຕ່ລະຮ້ານໃຫ້ມີຖັງຖິ້ມຂີ້ເຫຍື້ອຂອງຕົນ ເພື່ອສະດວກໃນການເກັບມ້ຽນ.
ພ້ອມທັງເຮັດສັນຍາຮ່ວມກັບຊາວຄ້າຂາຍເປັນອັນລະອຽດ ພ້ອມທັງປຸກລະດົມໃຫ້ຜູ້ທີ່ເຂົ້າມາທ່ຽວຊົມກໍໃຫ້ມີສ່ວນຮ່ວມນຳກັນໃນການຖິ້ມຂີ້ເຫຍື້ອຕ້ອງຖິ້ມໃສ່ຖັງ ຫຼື ຖົງຂີ້ເຫຍື້ອທີ່ວາງໄວ້ແຕ່ລະຈຸດ..
ທ່ານ ບຸນຈັນ ແກ້ວສີທຳມະ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໃຫ້ສຳພາດວ່າ:
ການເກັບມ້ຽນຂີ້ເຫຍື້ອຢູ່ສະໜາມຫຼວງ ແລະ ເດີ່ນກົມມະລຽນພະທາດຫຼວງ ກໍຄື ເຂດບໍເວນອ້ອມຂ້າງນັ້ນ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນໄດ້ຮັບຜິດຊອບ ໂດຍແຕ່ລະວັນຈະມີຖົງສະເພາະຖິ້ມຂີ້ເຫຍື້ອຢູ່ 160 ຈຸດ.
ມາຮອດປັດຈຸບັນການວາງແຜນແບ່ງຄວາມຮັບຜິດຊອບຢ່າງຈະແຈ້ງໃຫ້ແຕ່ລະພາກສ່ວນກ່ຽວຂ້ອງຢ່າງລະອຽດ ເພື່ອຮັບປະກັນໃຫ້ງານບຸນມີຄວາມສະອາດຈົບງາມ ພ້ອມນັ້ນ ເພື່ອເຮັດໃຫ້ງານບຸນນະມັດສະການພະທາດຫຼວງວຽງຈັນປີນີ້ຮັກສາໄດ້ຄວາມສະອາດຈົບງາມ ນອກຈາກພາກສ່ວນທີ່ກ່ຽວຂ້ອງອະນາໄມເກັບມ້ຽນແລ້ວກໍຮຽກຮ້ອງມາຍັງຊາວຄ້າຂາຍ ແລະ ຜູ້ປະກອບການຕ່າງໆ.
ລວມໄປເຖິງຜູ້ທີ່ມາທ່ຽວງານບຸນຕ້ອງໄດ້ພ້ອມກັນເປັນເຈົ້າການເອົາໃຈໃສ່ ແລະ ມີສະຕິຕື່ນຕົວສູງ ຈົ່ງພ້ອມກັນຖິ້ມຂີ້ເຫຍື້ອໃສ່ບ່ອນທີ່ກຳນົດໄວ້ ເພື່ອຮັບປະກັນບໍ່ໃຫ້ຂີ້ເຫຍື້ອຖິ້ມແບບຊະຊາຍ ທັງນີ້ ກໍເພື່ອເຮັດໃຫ້ງານບຸນພະທາດຫຼວງປີນີ້ມີຄວາມສະອາດຈົບງາມ ເວົ້າລວມແລ້ວ ຖ້າທຸກຄົນຮ່ວມກັນໃນການຮັກສາໄດ້ຄວາມສະອາດກໍຈະປາສະຈາກຂີ້ເຫຍື້ອ ແລະ ຈະເຮັດໃຫ້ງານບຸນມີຄວາມສະອາດຈົບງາມ ພ້ອມທັງເປັນການປະຕິບັດ 6 ສ ຂອງນະຄອນຫຼວງວຽງຈັນວາງອອກ ໂດຍສະເພາະ ສ ສະອາດໃຫ້ປາກົດຜົນເປັນຈິງ.
ແຫຼ່ງຂໍ້ມູນ: ໜັງສືພິມວຽງຈັນໃໝ່