ທ່ານ ສົມນຶກ ສິດທິລາດ ຫົວໜ້າຫ້ອງການອຸດສາຫະກຳ ແລະການຄ້າເມືອງໄຊ ລາຍງານຕໍ່ກອງປະຊຸມອົງຄະນະພັກເມືອງໄຊ ຄັ້ງທີ 13 ນີ້ວ່າ:
ການຈັດເກັບລາຍຮັບເຂົ້າງົບປະມານຢູ່ເມືອງໄຊ ແຂວງ ອຸດົມໄຊ ຕະຫຼອດໄລຍະ5 ປີທີ່ຜ່ານມາ ມີລາຍຮັບເຖິງ 45ຕື້ 613 ລ້ານກີບ ເຊິ່ງໄດ້ຊຸກຢູ່ແຕ່ລະຂະແໜງການໃຫ້ມີຄວາມຮັບຜິດຊອບໃນການປະຕິບັດການຈັດເກັບລາຍຮັບພາຍໃນເມືອງໃຫ້ໄດ້ຕາມແຜນທີ່ຕັ້ງໄວ້.
ອັນທີ່ພົ້ນເດັ່ນແມ່ນໄດ້ເອົາໃຈໃສ່ປະສານສົມທົບກັບຂະແໜງການທີ່ກ່ຽວຂ້ອງພາຍໃນເມືອງ ແລະ ຊຸກຍູ້ປຸກລະດົມທຸກພາກສ່ວນຫົວໜ່ວຍທຸລະກິດຖອກງົບປະມານໃຫ້ລັດຕາມກຳນົດໃນລະບຽບການຈົນສາມາດຂຸດຄົ້ນລາຍຮັບພາຍໃນ ໄດ້ທັງໝົດ 45 ຕື້ 613 ລ້ານກີບ,
ໃນນີ້: ຮັບຫຼາຍກວ່າໝູ່ແມ່ນສ່ວຍສາອາກອນ 37 ຕື້ 928 ລ້ານກີບ, ຖັດມາແມ່ນຮັບຈາກທີ່ດິນ 4ຕື້ 247 ລ້ານກີບ ແລະ ຮັບຈາກຊັບສິນຂອງລັດ 3 ຕື້ 437 ລ້ານກີບນອກຈາກນີ້ເມືອງໄຊ ຍັງໄດ້ລາຍຮັບຈາກທີ່ແຂວງດຸນໃຫ້ປະຕິບັດໄດ້ 173 ຕື້ 437 ລ້ານກີບ, ລວມຍອດລາຍຮັບທັງໝົດໄດ້ 221 ຕື້ 693 ລ້ານກີບ.
ເພື່ອເຮັດໃຫ້ການປະຕິບັດລາຍຮັບສອດຄ່ອງກັບແຜນພັດທະນາເສດຖະກິດສັງຄົມ 5 ປີຄື 2020-2024 ຂອງເມືອງໄຊວາງອອກຄືຈະຕ້ອງສູ້ຊົນສ້າງລາຍຮັບງົບປະມານພາຍໃນໃຫ້ໄດ້ 60ຕື້ 770 ລ້ານກີບ,
ໃນນີ້: ລາຍຮັບຈາກສ່ວຍສາອາກອນໃຫ້ໄດ້ 51ຕື້ກວ່າກີບ, ລາຍຮັບຈາກທີ່ດິນໃຫ້ໄດ້ 5 ຕື້ກວ່າກີບແລະລາຍຮັບຈາກຊັບສິນຂອງລັດໃຫ້ໄດ້ 4 ຕື້ກວ່າກີບ.
ທ່ານ ສົມນຶກ ສິດທິລາດ ຫົວໜ້າຫ້ອງການອຸດສາຫະກຳ ແລະການຄ້າເມືອງໄຊກ່າວໃນທີ່ປະຊຸມຕື່ມວ່າ:
ເພື່ອຜັນຂະຫຍາຍຕາມບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ຄັ້ງທີ XIII ຂອງອົງຄະນະພັກເມືອງໄຊ ໃຫ້ບັນລຸຕາມລະດັບຄາດໝາຍທີ່ວາງໄວ້ນັ້ນຕ້ອງ ເອົາໃຈໃສ່ພັດທະນາລະບົບການເງິນໃຫ້ມີຄວາມເຂັ້ມແຂງ, ມີຖານການເຕີບໂຕທີ່ໝັ້ນຄົງ, ເປັນເຈົ້າຕົນເອງ, ສະໜອງຕາມຄວາມຮຽກຮ້ອງຕ້ອງ ການດ້ານງົບປະມານທີ່ຈຳເປັນໃນການພັດທະນາ ແລະ ການບໍລິຫານ.
ແນໃສ່ປະຕິບັດນະໂຍບາຍເສດຖະກິດມະຫາພາກໃຫ້ມີປະສິດທິຜົນ ແລະ ມີສະຖຽນລະພາບເພີ່ມທະວີການຂຸດ ຄົ້ນລາຍຮັບພາຍໃນຢ່າງແຂງແຮງ, ຕາມຄວາມອາດສາມາດ, ນໍາໃຊ້ລາຍຮັບຢ່າງປະຢັດ ແລະຄຸ້ມຄອງລາຍຈ່າຍໃຫ້ມີປະສິດທິຜົນສູງ, ສູ້ຊົນຫຼຸດຜ່ອນການຂາດດຸນງົບປະມານເທື່ອລະກ້າວ
ແຫຼ່ງຂໍ້ມູນ: ສຸລະສັກ ແສງຫຼ້າ ຂ່າວປະຈຳວັນ Daily News Oudomxay