ຄະນະວິຊາສະຖາປັດຕະຍະກໍາສາດ ມະຫາວິທະຍາໄລແຫ່ງຊາດລາວ ແລະພາກວິຊາການຈັດສັນອອກແບບສິ່ງແວດລ້ອມ ມະຫາວິທະຍາໄລທາມະ ປະເທດຍີ່ປຸ່ນ (Department of Environmental Design, Tama Art University) ໄດ້ດໍາເນີນການຈັດການສຳມະນາ ພາຍໃຕ້ຫົວຂໍ້ “Environment Design for Traditional Life of Laos” ເຊິ່ງຄັ້ງນີ້ແມ່ນໄດ້ຈັດຂຶ້ນເປັນຄັ້ງທີ III ແລ້ວ, ເຊິ່ງມີນັກສຶກສາເຂົ້າຮ່ວມທັງໝົດ 20 ຄົນ ໃນນີ້ເປັນນັກສຶກສາລະດັບປະລິນຍາໂທ 13 ຄົນ ແລະນັກສຶກສາລະດັບປະລິນຍາຕີ 7 ຄົນ ຈາກສອງພາກສ່ວນ.
ຈຸດປະສົງຂອງການຈັດງານດັ່ງກ່າວ ແມ່ນເພື່ອແລກປ່ຽນຄວາມຮູ້ທາງດ້ານວິຊາການກ່ຽວກັບການອອກແບບທີ່ມີຜົນຕໍ່ກັບການພັດທະນາສະພາບແວດລ້ອມທີ່ຢູ່ອາໄສຂອງຄົນໃນທ້ອງຖິ່ນ ໂດຍສະເພາະແມ່ນການສຶກສາເຖິງຮີດຄອງປະເພນີ ແລະວິຖີການດໍາລົງຊີວິດ, ນອກຈາກນີ້ແລ້ວຍັງແມ່ນການຮັດແໜ້ນ ສາຍພົວພັນລະຫວ່າງສອງສະຖາບັນອີກດ້ວຍ.
ການຈັດງານດັ່ງກ່າວນີ້ ແມ່ນໄດ້ແບ່ງອອກເປັນ 3 ພາກສ່ວນຫຼັກຄື:
ພາກສ່ວນການເກັບກໍາຂໍ້ມູນຄື: ແມ່ນມີການລົງເກັບກໍາຂໍ້ມູນໃນພື້ນທີ່ຕ່າງໆທັງໃນນະຄອນຫຼວງວຽງຈັນ ແລະພິເສດແມ່ນທີ່ບ້ານຫາດສວນ, ເມືອງທຸລະຄົມ, ແຂວງວຽງຈັນ ເຊິ່ງໄດ້ມີການພັກໂຮມສະເຕທີ່ບ້ານດັ່ງກ່າວເພື່ອສຶກສາເຖິງຮູບແບບຂອງການດໍາລົງຊີວິດໃນທ້ອງຖິ່ນ,
ພາກສ່ວນທີສອງ ແມ່ນການສັງລວມ, ວິເຄາະຂໍ້ມູນເພື່ອໃຊ້ການອອກແບບ ແລະສ່ວນສຸດທ້າຍແມ່ນການນໍາສະເໜີຜົນຂອງການດໍາເນີນງານດັ່ງກ່າວ ປະກອບດ້ວຍ 4 ຫົວຂໍ້ຫຼັກຄື:
1. ການອອກແບບກ່ຽວພື້ນທີ່ ແລະລະບົບຂົນສົ່ງເພື່ອການທ່ອງທ່ຽວ, 2. ການອອກແບບປະຍຸກເຮືອແພເພື່ອສົ່ງເສີມວັດທະນະທໍາ, 3. ການວາງແຜນ ແລະອອກແບບພື້ນທີ່ແຄມນໍ້າງື່ມ ແລະ 4. ການອອກແບບປັບປຸງເຮືອນທ້ອງຖິ່ນລາວ.
ຜ່ານການດໍາເນີນວຽກງານດັ່ງກ່າວ ເຮັດໃຫ້ນັກສຶກສາຈາກທັງສອງສະຖາບັນແມ່ນໄດ້ມີໂອກາດແລກປ່ຽນຄວາມຄິດເຫັນ, ມີການສ້າງສັນແນວຄວາມຄິດທີ່ແປກໃໝ່ ເຊິ່ງເປັນຈຸດເລີ່ມຕົ້ນທີ່ດີຂອງການດໍາເນີນວຽກງານໃນອະນາຄົດ.
ແຫຼ່ງຂໍ້ມູນ: ເວບໄຊ ມະຫາວິທະຍາໄລແຫ່ງຊາດ