Sunday, February 16, 2025

ນັກທ່ອງທ່ຽວເຂົ້າເມືອງວັງວຽງ ເພີ່ມຂຶ້ນ ເກືອບ 24%

ໃນ 10 ເດືອນ ປີ 2019 ຈຳນວນນັກທ່ອງທ່ຽວມາທ່ຽວເມືອງວັງວຽງ ເພີ່ມຂຶ້ນ 23,68% ທຽບໃສ່ໄລຍະດຽວກັນຂອງປີຜ່ານມາ.

ທ່ານ ບຸນມີ ພົມມະວົງສາ ຫົວໜ້າຫ້ອງການ ຖວທ ເມືອງວັງວຽງ ໃຫ້ສຳພາດໃນວັນທີ 12 ທັນວາ 2019 ວ່າ: ເນື່ອງຈາກວ່າ ປີ 2019 ເປັນປີທ່ອງທ່ຽວ ລາວ – ຈີນ. ສະນັ້ນ, ເພື່ອເປັນການໂຄສະນາດຶງດູດນັກທ່ອງທ່ຽວໃຫ້ຫຼາຍຂຶ້ນ ຖວທ ເມືອງຈຶ່ງໄດ້ຈັດກິດຈະກຳເພື່ອສົ່ງເສີມການທ່ອງທ່ຽວ ເຊັ່ນ: ແຫ່ທຽນພັນສາ, ງານມະຫະກຳຄອນເສີດ, ງານປະກວດນາງສັງຂານຕິດພັນກັບຕະຫຼາດນັດ ເພື່ອສົ່ງເສີມການຜະລິດກະສິກຳ ແລະ ອື່ນໆ.

ນອກນັ້ນ, ຍັງໄດ້ເລັ່ງປັບປຸງບັນດາພື້ນຖານໂຄງລ່າງ ແລະ ສະຖານທີ່ທ່ອງທ່ຽວ ເປັນຕົ້ນ: ປັບປຸງບັນດາເສັ້ນທາງໃນເມືອງ, ເສັ້ນທາງຫາແຫຼ່ງທ່ອງທ່ຽວ, ກໍ່ສ້າງຂົວຂ້າມນໍ້າຊອງແຫ່ງໃໝ່ ຫ່າງຈາກຂົວເກົ່າຂຶ້ນໄປ 500 ແມັດ ພ້ອມທັງສ້າງເສັ້ນທາງຈາກຂົວແຫ່ງໃໝ່ຫາບ້ານຫ້ວຍແຍ້ ທາງທິດຕາເວັນຕົກ ເພື່ອອຳນວຍຄວາມສະດວກແກ່ນັກທ່ອງທ່ຽວໃນການໄປ – ມາ, ປັບປຸງສະໜາມຂີ້ເຫຍື້ອໃຫ້ໄດ້ມາດຕະຖານ ແລະ ຊຸກຍູ້ບັນດາຫົວໜ່ວຍທຸລະ ກິດເປັນຕົ້ນ ໂຮງແຮມ, ເຮືອນພັກ, ຮ້ານອາຫານ, ຍົກລະດັບສະຖານທີ່ທ່ອງທ່ຽວໃຫ້ໄດ້ມາດຖານອາຊຽນ ແລະ ໃຫ້ມີຄວາມຍືນຍົງ.

ຜ່ານການປັບປຸງສິ່ງທີ່ກ່າວມານັ້ນເຫັນວ່າມີບັນຍາກາດຟົດຟື້ນຂຶ້ນ ໂດຍສະເພາະໃນ 10 ເດືອນ ປີ 2019 ນີ້ ເຫັນວ່ານັກທ່ອງທ່ຽວເຂົ້າມາທ່ຽວເມືອງວັງວຽງ ຈຳນວນ 204.642 ຄົນ ທຽບໃສ່ 10 ເດືອນ ປີ 2018 ເພີ່ມຂຶ້ນ 23,68% ( 165.453 ຄົນ ) ທຽບໃສ່ໝົດປີ 2018 ເພີ່ມຂຶ້ນ 1,85% ( 200.912 ຄົນ ). ໃນນັ້ນ, ນັກທ່ອງທ່ຽວທີ່ເຂົ້າມາຫຼາຍທີ່ສຸດແມ່ນ ສ.ເກົາຫຼີ, ສປ ຈີນ ແລະ ໄທ.

ທ່ານ ບຸນມີ ພົມມະວົງສາ ຍັງໃຫ້ຮູ້ຕື່ມວ່າ: ໃນເດືອນພະຈິກຜ່ານມາ ຖວທ ເມືອງ ໄດ້ສົມທົບກັບບໍລິສັດທ່ອງທ່ຽວ ຄຣິນແອັດແວນເຈີ ຈັດກິດຈະກຳແລ່ນວີເທລ ຄັ້ງທີ 2 ໃນວັນທີ 9 – 10 ພະຈິກ, ບຸນກິນຈຽງເຜົ່າມົ້ງ ແລະ ງານແຂ່ງລົດຝອມໂມລາມົ້ງ ທີ່ຕາດຫ້ວຍສ້ານ ໃນວັນທີ 22 – 30 ພະຈິກ 2019 ເຊິ່ງມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຈຳນວນຫຼາຍ. ພິເສດໃນລະຫວ່າງວັນທີ 13 – 14 ທັນວາ 2019 ນີ້ ເມືອງຍັງຈະຈັດງານບຸນເທດສະການດົນຕີ ຄັ້ງທີ 5 ເຊິ່ງເຫັນວ່າປັດຈຸບັນມີນັກທ່ອງທ່ຽວຈາກພາຍໃນ ແລະ ຕ່າງປະເທດເຂົ້າມາທ່ຽວເມືອງວັງວຽງ ເປັນຈຳນວນຫຼວງຫຼາຍ, ໂຮງແຮມ – ເຮືອນພັກແມ່ນເຕັມໄປດ້ວຍບັນຍາກາດຄຶກຄັກ ເພື່ອກຽມເຂົ້າຊົມທ່ຽວໃນງານເທດສະການດັ່ງກ່າວ.

ແຫຼ່ງຂໍ້ມູນ: ຂ່າວ: ກາວຊົ່ງ, ເສດຖະກິດການຄ້າ

InsideLaos
InsideLaoshttp://insidelaos.com
Online Journalists at insidelaos.com.

More from author

Related posts

Latest posts

VietJet ໄດ້ຮັບກຽດເປັນ “ສາຍການບິນທີ່ມີລາຄາຕໍ່າສຸດໃນໂລກ” ອີກຄັ້ງໜຶ່ງໃນປີ 2025

(ນະຄອນຫຼວງວຽງຈັນ, ວັນທີ 13 ກຸມພາ 2025) – VietJet ໄດ້ຮັບການສະເໜີຊື່ອີກຄັ້ງໜຶ່ງໃຫ້ເປັນຜູ້ຊະນະລາງວັນສາຍການບິນລາຄາປະຢັດພິເສດສຳລັບປີ 2025 ໂດຍລາງວັນນີ້ຖືເປັນໝວດໝູ່ລາງວັນສາຍການບິນທີ່ດີທີ່ສຸດຂອງໂລກຈາກ AirlineRatings.com, ເວັບໄຊຄວາມປອດໄພ ແລະ ການຈັດອັນດັບຜະລິດຕະພັນຂອງສາຍການບິນທີ່ໄດ້ຮັບການຍອມຮັບທົ່ວໂລກ.

ປະຢັດຄ່າປີ້ໂດຍສານໄປທ່ຽວປະເທດຫວຽດນາມ ດ້ວຍສ່ວນຫຼຸດ 50% ຂອງ Vietjet.

(ນະຄອນຫຼວງວຽງຈັນ, ວັນທີ 10 ກຸມພາ 2025) – ເລີ່ມຕົ້ນການເດີນທາງທີ່ໜ້າຕື່ນຕາຕື່ນໃຈຂອງລະດູໃບໄມ້ປົ່ງສຳລັບສາຍການບິນ Vietjet ທີ່ເປີດຕົວໂປຣໂມຊັນໃນອາທິດທອງ ເຊິ່ງມີສ່ວນຫຼຸດເຖິງ 50% ທຸກເສັ້ນທາງໃນລະຫວ່າງວັນທີ 10 – 16 ກຸມພາ 2025 ສຳລັບນັກທ່ອງທ່ຽວຈາກລາວທີ່ກຳລັງວາງແຜນຈະມາທ່ຽວຫວຽດນາມ ເພື່ອສຳຜັດທຳມະຊາດທີ່ງົດງາມ, ປະຫວັດສາດອັນຍາວນານ ຫຼື ເມືອງທີ່ມີຄວາມໜ້າຕື່ນຕາຕື່ນໃຈ ເຊິ່ງເໝາະກັບຊ່ວງເວລານີ້ທີ່ຈະວາງແຜນໄປທ່ອງທ່ຽວ.

VietJet ລາຍງານຜົນປະກອບການທຸລະກິດສູງສຸດນັບແຕ່ Covid-19 ໃນປີ 2024

(ນະຄອນຫຼວງວຽງຈັນ, ວັນທີ 07 ກຸມພາ 2025) – VietJet ສໍາເລັດການເຕີບໂຕທາງທຸລະກິດທີ່ໜ້າປະທັບໃຈໃນປີ 2024, ຂະຫຍາຍເຄື່ອຂ່າຍການບິນສາກົນ ແລະ ຝູງເຮືອບິນທີ່ທັນສະໄໝ ຂະນະດຽວກັນກໍ່ຍັງສ້າງລາຍໄດ້ ແລະ ກໍາໄລໃນລະດັບສູງສຸດເປັນປະຫວັດສາດ. ຄວາມສໍາເລັດຢ່າງຕໍ່ເນື່ອງຂອງສາຍການບິນແມ່ນ ບາດກ້າວອັນສໍາຄັນໃນການຟື້ນຕົວ ແລະ ຂະຫຍາຍໂຕຫຼັງຈາກໂລກລະບາດ Covid-19.