ພິທີເປີດນຳໃຊ້ເສັ້ນທາງດິນແດງຍາວ 11 ກິໂລແມັດ ລະ ຫວ່າງ ບ້ານສົມສະອາດ – ຄໍາແຮ້ງ – ນາໂດນ ເມືອງໄຊພູທອງ ແຂວງສະຫວັນນະເຂດ ໄດ້ຈັດຂຶ້ນເມື່ອບໍ່ດົນຜ່ານມານີ້ ໂດຍການໃຫ້ກຽດເຂົ້າຮ່ວມຕັດແຖບຜ້າ ແລະ ລັ່ນຄ້ອງ 9 ບາດ ຂອງ ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງໄຊພູທອງ; ມີ ຍາທ່ານ ມະຫາສົມບູນ ເຈົ້າຄະນະ ອພສ ແຂວງ, ຍາທ່ານ ທອງດໍາ ຈັນທະວົງ ເຈົ້າຄະນະ ອພສ ເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ອໍານາດການປົກຄອງ, ຜູ້ຮັບເໝົາກໍ່ສ້າງ, ນັັກທຸລະກິດເຂົ້າຮ່ວມ.
ໃນພິທີ ທ່ານ ພູຄໍາ ຈັນທິລາດ ວິຊາການຫ້ອງການໂຍທາເມືອງ ໄດ້ຂຶ້ນລາຍງານໃຫ້ຮູ້ວ່າ: ໂຄງການກໍ່ສ້າງເສັ້ນທາງແຕ່ບ້ານສົມສະອາດ – ບ້ານຄໍາແຮ້ງ – ນາໂດນ ໄດ້ເລີ່ມກໍ່ສ້າງມາແຕ່ 21 ກໍລະກົດ 2019 ມາຮອດປັດຈຸບັນສໍາເລັດແລ້ວ 100% ມີຄວາມຍາວທັງໝົດ 11 ກິໂລແມັດ, ກວ້າງ 6 ແມັດ ແລະ ນັບແຕ່ໃຈກາງທາງອອກໄປເບື້ອງລະ 5 ແມັດ ລວມທັງໝົດ 10 ແມັດ, ລວມມູນຄ່າການກໍ່ສ້າງທັງໝົດ 194 ລ້ານກວ່າກີບ ງົບປະມານດັ່ງກ່າວແມ່ນໄດ້ມາຈາກການປະກອບສ່ວນຂອງພໍ່ແມ່ປະຊາຊົນໃນກຸ່ມບ້ານທີ 2 ແລະ ກຸ່ມບ້ານທີ 5 ບ້ານຄໍາແຮ້ງ ແລະ ນາໂດນ ເຫັນວ່າປະຊາຊົນມີຄວາມຕື່ນຕົວສູງທີ່ເຂົ້າແຜນການພັດທະນາຂອງຂັ້ນເທິງວາງອອກ ໂດຍແມ່ນ ທ່ານ ວາດສະໜາ ແລະ ທ່ານ ບຸນເລີດ ເປັນຜູ້ຮັບເໝົາກໍ່ສ້າງ.
ໂອກາດນີ້, ທ່ານ ຄໍາວິໃສ ຜຸຍຍະວົງ ເຈົ້າເມືອງໄຊພູທອງ ກໍໄດ້ມີຄໍາເຫັນກ່າວວ່າ: ການເປີດນໍາໃຊ້ເສັ້ນທາງຢ່າງເປັນທາງການເສັ້ນທາງດັ່ງກ່າວແມ່ນມີຄວາມສໍາຄັນຫຼາຍ ເພາະເປັນເສັ້ນທາງເຊື່ອມຈອດກັນລະຫວ່າງບ້ານຕໍ່ບ້ານ ເພື່ອອໍານວຍຄວາມສະດວກໃນການໄປ – ມາຫາສູ່ ແລະ ຂົນສົ່ງແລກປ່ຽນສິນຄ້າຂອງປະຊາຊົນ, ຊຸກຍູ້ການຜະລິດ, ການຄ້າ, ການລົງທຶນ ແລະ ການທ່ອງທ່ຽວຂອງເມືອງໄຊພູທອງ ໂດຍສະເພາະກໍແມ່ນປະຊາຊົນບັນດາເຜົ່າທີ່ດໍາລົງຊີວິດຢູ່ຕາມແລວທາງດັ່ງກ່າວ. ພ້ອມນັ້ນ, ທ່ານຍັງໄດ້ມອບເສັ້ນທາງດັ່ງກ່າວໃຫ້ອໍານາດການປົກຄອງບ້ານເປັນຜູ້ຄຸ້ມຄອງປົກປັກຮັກສາຕໍ່ໄປ.
ແຫຼ່ງຂໍ້ມູນ: ຂ່າວ – ຮູບ: ພັນທະມິດ ວົງສຸທິ, ເສດຖະກິດ-ການຄ້າ