ກອງປະຊຸມວຽກງານກວດກາທົ່ວປະເທດ ປະຈຳປີ 2019 ໄດ້ໄຂຂຶ້ນຢູ່ທີ່ສະໂມສອນ ຄະນະກວດກາສູນກາງພັກ (ຫຼັກ6) ໃນວັນທີ 8 ມັງກອນ 2020.
ໂດຍພາຍໃຕ້ການເປັນປະທານຂອງ ສະຫາຍ ປອ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງ, ມີບັນດາສະຫາຍຮອງປະທານ, ຄະນະພັກ-ຄະນະກວດກາສູນກາງພັກ, ຄະນະພັກ, ຄະນະປະຈຳ, ບັນດາປະທານ-ຮອງປະທານ ຄະນະກວດກາກະຊວງ-ອົງການ, ແຂວງ-ນະຄອນຫຼວງ, ຫົວໜ້າ-ຮອງຫົວໜ້າກົມ ພ້ອມດ້ວຍສະມາຊິກພັກ-ພະນັກງານ ທົ່ວຄະນະກວດກາສູນກາງພັກ-ອົງການກວດກາລັດຖະບານ ເຂົ້າຮ່ວມ.
ສະຫາຍ ສີໃນ ມຽງລາວັນ ຮອງເລຂາຄະນະພັກ, ຮອງປະທານ ຄະນະກວດກາສູນກາງພັກ-ອົງການກວດກາລັດຖະບານ ໄດ້ຂຶ້ນຜ່ານຮ່າງບົດສະຫຼຸບຕີລາຄາ ການເຄື່ອນໄຫວວຽກງານຕິດຕາມ-ກວດກາ ແລະ ສະກັດກັ້ນ- ຕ້ານການສໍ້ລາດບັງຫຼວງໃນປີ 2019, ທິດທາງແຜນການວຽກງານກວດກາ ປີ 2020.
ເຊິ່ງໄລຍະ 1 ປີຜ່ານມາ ຄະນະພັກ, ອົງການກວດກາພັກອົງການກວດກາລັດແຕ່ລະຂັ້ນ ໄດ້ສຸມໃສ່ຈັດຕັ້ງ ປະຕິ ບັດວຽກງານຕິດຕາມ, ກວດກາຕາມພາລະບົດບາດ ແລະ ໜ້າທີ່ຂອບເຂດສິດຂອງຕົນ,
ໂດຍສະເພາະແມ່ນຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດ ຄັ້ງທີ III ແລະ ແຜນການວຽກງານກວດກາປະຈໍາປີ 2020, ເຊິ່ງໄດ້ເປັນການປະກອບສ່ວນເຮັດໃຫ້ບັນດາອົງການຈັດຕັ້ງຂັ້ນ ຕ່າງໆທັງສູນກາງ ແລະ ທ້ອງຖິ່ນມີຄວາມໜັກແໜ້ນທາງດ້ານການເມືອງແນວຄິດ ເຂັ້ມແຂງທາງດ້ານການຈັດຕັ້ງ ແລະ ສະ ກັດກັ້ນ-ຕ້ານການສໍ້ລາດບັງຫຼວງໃນທຸກຮູບແບບ.
ຈາກນັ້ນ ບັນດາສະຫາຍທີ່ເຂົ້າຮ່ວມກອງປະຊຸມ ຍັງໄດ້ຮັບຟັງການເຜີຍແຜ່ເອກະສານສໍາຄັນ ຕ່າງໆກ່ຽວກັບວຽກງານກວດກາເປັນຕົ້ນແມ່ນ:
ບົດລາຍງານ ກ່ຽວກັບການປັບປຸງກົງຈັກ ການຈັດຕັ້ງ-ພະນັກງານ,ບົດລາຍງານວຽກງານຕິດຕາມ-ກວດກາພັກ, ບົດລາຍງານກ່ຽວກັບການກວດກາຕາມຜົນການກວດສອບ ແລະ ຕິດຕາມ-ກວດກາ ການລົງທຶນຂອງລັດເລີ່ມແຕ່ຫົວທີ.
ນອກນີ້ ຜູ້ແທນກອງປະຊຸມແຕ່ລະພາກສ່ວນຈະໄດ້ຜັດປ່ຽນ ກັນປະກອບຄຳຄິດຄຳເຫັນຕາມ ການເຈາະຈິ້ມຂອງປະທານກອງປະຊຸມ.
ເຊິ່ງກອງປະຊຸມດັ່ງ ກ່າວຈະໄດ້ດຳເນີນໄປເປັນເວລາ 3 ວັນ ຄື: 8-10 ມັງກອນ 2020 ຈຶ່ງຈະອັດລົງ.
ໂດຍ: ແສງເດືອນ Lao people’s Army News