ໃນໄລຍະ5 ປີຜ່ານມາ ດ້ານເສດຖະກິດ-ສັງຄົມຂອງເມືອງຈໍາປາສັກ ສືບຕໍ່ຂະຫຍາຍຕົວຢ່າງຕໍ່ເນື່ອງ ໂດຍສະເລ່ຍໃນລະດັບ 6,7%ຕໍ່ປີ ລວມຍອດຜະລິດຕະພັນ 5 ປີ ປະຕິບັດໄດ້ 3.746 ຕື້ກີບ ທຽບໃສ່ແຜນການລື່ນ 5%, ສະເພາະປີ2019 ປະຕິບັດໄດ້ 900 ຕື້ກວ່າກີບສະເລ່ຍລາຍຮັບຕໍ່ຄົນບັນລຸໄດ້ 13,7 ລ້ານກີບຕໍ່ຄົນຕໍ່ປີ ຫຼື ເທົ່າກັບ 1.600 ກວ່າໂດລາສະຫະລັດ.
ກອງປະຊຸມໃຫຍ່ຜູ້ແທນອົງຄະນະພັກເມືອງຈຳປາສັກຄັ້ງທີ VIII ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 13 ມັງກອນ 2020, ທີ່ສະໂມສອນຂອງເມືອງ, ໃຫ້ກຽດເຂົ້າຮ່ວມຂອງ ທ່ານ ບຸນຖອງ ດີວິໄຊ ເຈົ້າແຂວງແຂວງຈໍາປາສັກ, ມີທ່ານ ນິພອນ ວຽງປະເສີດ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ, ມີບັນດາຄະນະປະຈໍາພັກແຂວງ, ຄະນະບໍລິຫານງານພັກແຂວງ, ເລຂາພັກເມືອງ, ເຈົ້າເມືອງ,ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ພາຍໃນກອງປະຊຸມ ທ່ານ ຄໍາຕັນ ຊົມພັນດອນ ເຈົ້າເມືອງເມືອງຈຳປາສັກ ໃຫ້ຮູ້ວ່າ:
ການດຳເນີນກອງປະຊຸມໃຫຍ່ ຄັ້ງທີ VIII ຂອງຜູ້ແທນອົງຄະນະພັກເມືອງຈຳປາສັກມີຄວາມໝາຍຄວາມສຳຄັນຫຼາຍ ເພາະໄດ້ຈັດຕັ້ງປະຕິບັດຕາມກົດລະບຽບຂອງພັກກໍຄືຫຼັກການ ແລະ ທິດນຳໃນການກໍ່ສ້າງພັກໃຫ້ມີຄວາມເຕີບໃຫຍ່ເຂັ້ມແຂງພ້ອມທັງມີຄວາມປອດໃສ, ເຂັ້ມແຂງ, ໜັກແໜນ.
ຜູ້ແທນກອງປະຊຸມໃຫຍ່ຈະໄດ້ພ້ອມກັນຄົ້ນຄວ້າຮັບຮອງເອົາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກເມືອງສະໄໝທີ VIII, ຄັດເລືອກເອົາຄະນະບໍລິຫານງານພັກເມືອງຊຸດໃໝ່ ເພື່ອເປັນແກນນຳຂອງອົງຄະນະພັກທີ່ຈະນຳພາຜັນຂະຫຍາຍມະຕິຂອງພັກ ແລະ ປະຕິບັດແຜນພັດທະນາເສດຖະກິດ-ສັງຄົມຕະຫຼອດສະໄໝທີ VIII ແຕ່ປີ 2020-2024 ໃຫ້ປະກົດຜົນເປັນຈິງຕາມທ່າແຮງທີ່ບົ່ມຊ້ອນຂອງເມືອງເມືອງຈຳປາສັກເປັນຕົ້ນ ທ່າແຮງດ້ານການທ່ອງທ່ຽວດ້ານວັດທະນະທຳ, ວັດຖຸບູຮານ ໂດຍສະເພາະແມ່ນວັດພູຈຳປາສັກເຊິ່ງແມ່ນມໍລະດົກໂລກຂອງລາວທີ່ສາມາດດຶງດູດນັກທ່ອງທ່ຽວເຂົ້າມາທ່ຽວໃນແຕ່ລະປີເປັນຈຳນວນຫຼາຍ.
ທ່ານ ຄໍາຕັນ ຊົມພັນດອນ ຍັງໃຫ້ຮູ້ຕື່ມວ່າ:
ໃນໄລຍະ 5 ປີທີ່ຜ່ານມາ (2015-2019) ທົ່ວເມືອງມີຄວາມເປັນລະບຽບຮຽບຮ້ອຍ ມີສະຖຽນລະພາບທາງດ້ານການເມືອງທີ່ໜັກແໜ້ນຮັບປະກັນຄວາມສະຫງົບໂດຍພື້ນຖານ, ນອກຈາກນີ້ ດ້ານເສດຖະກິດ-ສັງຄົມ ກໍ່ສືບຕໍ່ຂະຫຍາຍຕົວຢ່າງຕໍ່ເນື່ອງ ໂດຍສະເລ່ຍຢູ່ໃນລະດັບ 6,7% ຕໍ່ປີ, ລວມຍອດຜະລິດຕະພັນ 5 ປີ ປະຕິບັດໄດ້ 3.746 ຕື້ກີບ ທຽບໃສ່ແຜນການລື່ນ 5%, ສະເພາະປີ2019 ປະຕິບັດໄດ້ 900 ຕື້ກວ່າກີບ, ສະເລ່ຍລາຍຮັບຕໍ່ຄົນບັນລຸໄດ້ 13,7 ລ້ານກີບຕໍ່ຄົນຕໍ່ປີ ຫຼື ເທົ່າກັບ 1.600 ກວ່າໂດລາສະຫະລັດ.
ທັງນີ້, ສໍາລັບໂຄງປະກອບເສດຖະກິດກວມຫຼາຍກ່ວາໝູ່ແມ່ນ ຂະແໜງກະສິກຳ 45,05%, ຮອງລົງມາແມ່ນອຸດສະຫະກຳ 35,17%, ບໍລິການ 19,78%, ການລະດົມທຶນເພື່ອພັດທະນາຂອງເມືອງ ເຂົ້າໃສ່ການພັດທະນາບັນລຸ 415 ຕື້ກວ່າກີບ, ທຽບໃສ່ແຜນການປະຕິບັດໄດ້ລື່ນ 2,57%, ໃນນັ້ນທຶນຂອງລັດ 43,6ຕື້ກີບ, ເອກະຊົນພາຍໃນ ແລະ ຕ່າງປະເທດ 148,2 ຕື້ກີບ,
ທຶນຊ່ວຍເຫຼືອເພື່ອການພັດທະນາ 93 ຕື້ກວ່າກີບ, ສິນເຊື່ອທະນາຄານ 130ຕື້ກວ່າກີບ ເຮັດໃຫ້ໂຄງປະກອບເສດຖະກິດຂອງເມືອງຫັນປ່ຽນໄປຕາມທິດທີ່ຕັ້ງໜ້າຕາມທ່າແຮງບົ່ມຊ້ອນຂອງທ້ອງຖິ່ນ ທ່ານ ເຈົ້າເມືອງເມືອງຈໍາປາສັກ ກ່າວ.
ແຫຼ່ງຂໍ້ມູນ: Champasak RADIO Station 100.7 Mhz