ສປປ ລາວ ຕັ້ງເປົ້າໝາຍດຶງດູດນັກທ່ອງທ່ຽວເຂົ້າມາປະເທດໃນປີ 2020 ນີ້ ໃຫ້ໄດ້ 4,7 ລ້ານເທື່ອຄົນ ແລະ ຄາດວ່າຈະສ້າງລາຍຮັບໄດ້ປະມານ 900 ລ້ານໂດລາສະຫະລັດ, ຊຶ່ງໃນປີ 2019 ຜ່ານມາ ມີນັກທ່ອງທ່ຽວຕ່າງປະເທດເຂົ້າມາທ່ຽວຈໍານວນ 4,58 ລ້ານເທື່ອຄົນເພີ່ມຂຶ້ນປະມານ 9% ຖ້າທຽບໃສ່ປີ 2018.
ອີງຈາກຂໍ້ມູນຂອງກົມການຕະຫຼາດການທ່ອງທ່ຽວກະຊວງຖະແຫຼ່ງຂ່າວ ວັດທະນທໍາ ແລະທ່ອງທ່ຽວໃຫ້ຮູ້ວ່າ:
ປີ 2019 ຜ່ານມາ ເປັນປີທ່ອງທ່ຽວລາວ-ຈີນ, ຊຶ່ງລັດຖະບານລາວໄດ້ວາງຄາດໝາຍດຶງດູດນັກທ່ອງທ່ຽວຕ່າງປະເທດເຂົ້າມາທ່ຽວລາວໃຫ້ໄດ້ 4,5 ລ້ານຄົນ,ໃນນີ້ເປັນນັກທ່ອງທ່ຽວຈີນ ບໍ່ໃຫ້ຫຼຸດ 1 ລ້ານຄົນ,
ໂດຍໄດ້ຈັດກິດຈະກໍາຫຼາຍ ຮູບແບບ ເພື່ອດຶງດູດນັກທ່ອງທ່ຽວດ້ວຍຮູບແບບຊຶ່ງມີທັງການສະແດງສິລະປະ ລາວ-ຈີນ, ວາງສະແດງຮູບພາບ ແລະເທສະການອາຫານ, ຈັດງານສັບປະດາ ວັດທະນະ ທຳຈີນ, ການຈັດງານບຸນປະ ເພນີໃນແຕ່ລະແຂວງ ແລະກິດຈະກໍາອື່ນໆອີກ.
ຜ່ານການຈັດຕັ້ງປະຕິບັດປີ ທ່ອງທ່ຽວລາວ-ຈີນ ເຫັນວ່າ ສະຖິຕິນັກ ທ່ອງທ່ຽວເດີນທາງເຂົ້າມາທ່ຽວ ສປປ ລາວ ຈໍານວນທັງໝົດ 4,58 ລ້ານຄົນ, ເພີ່ມຂຶ້ນຈາກສະຖິຕິການທ່ອງທ່ຽວປີ 2018 ປະມານ 9% ໃນນີ້ຈໍານວນນັກທ່ອງທ່ຽວຈາກ ສປ ຈີນ ເພີ່ມຂຶ້ນແບບກ້າວກະໂດດທີ່ 27% ຫຼື ເປັນຈໍານວນ 1.02 ລ້ານເທື່ອຄົນ,
ນັກທ່ອງທ່ຽວຈາກປະເທດໄທຊຶ່ງເປັນແຫຼ່ງນັກທ່ອງທ່ຽວຫຼັກທີ່ເຂົ້າມາທ່ອງທ່ຽວລາວເພີ່ມຂຶ້ນ 6%, ນັກທ່ອງ ທ່ຽວຈາກປະເທດຫວຽດນາມ ເພີ່ມຂຶ້ນ 11%, ນັກທ່ອງທ່ຽວຈາກອາເມ ລິກາ ເພີ່ມຂຶ້ນ 22%, ນັກທ່ອງທ່ຽວຈາກຝຣັ່ງເພີ່ມຂຶ້ນ 11%, ນັກທ່ອງ ທ່ຽວຈາກອັງກິດເພີ່ມຂຶ້ນ 22% ແລະ ນັກທ່ອງທ່ຽວຈາກເຢຍລະມັນເພີ່ມຂຶ້ນ 13%.
ແນວໃດກໍຕາມເຖິງຕົວເລກນັກທ່ອງທ່ອງຈາກຫຼາຍປະເທດຈະເພີ່ມຂຶ້ນ ແຕ່ ບາງປະເທດກັບຫຼຸດລົງເຊັ່ນ:
ນັກທ່ອງທ່ຽວຈາກ ສ.ເກົາຫຼີ ຫຼຸດລົງ 1%, ນັກທ່ອງທ່ຽວຈາກເດັນມາກຫຼຸດລົງ 27%, ນັກທ່ອງທ່ຽວຈາກສະວິສເຊີແລນຫຼຸດລົງ 18% ແລະ ນັກທ່ອງທ່ຽວຈາກຟິນແລນຫຼຸດລົງ 28%.
ສໍາລັບໃນປີ 2020 ນີ້, ລັດຖະບານລາວຕັ້ງເປົ້າໝາຍຕ້ອນຮັບນັກທ່ອງ ທ່ຽວຕ່າງປະເທດໃຫ້ໄດ້ທັງໝົດ 4,7 ລ້ານເທື່ອຄົນ ແລະຄາດວ່າຈະສ້າງລາຍຮັບຈາກການທ່ອງທ່ຽວໄດ້ປະມານ 900 ລ້ານໂດລາສະຫະລັດ (ຕົວເລກດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມແຫ່ງຊາດປະຈໍາປີ 2020 ຂອງນາຍົກລັດຖະມົນຕີ).
ແຫຼ່ງຂໍ້ມູນ: ໜັງສືພິມເສດຖະກິດ-ສັງຄົມ
