ຫ້ອງວ່າການສຳນັກງານນາຍົກລັດຖະມົນຕີແຈ້ງການໂດຍອີງຕາມການຊີ້ນຳຂອງກອງປະຊຸມນາຍົກ, ຮອງນາຍົກລັດຖະມົນຕີຮຽກທຸກພາກສ່ວນທັງສູນກາງ,ທ້ອງ ຖິ່ນຮ່ວມມືກັນຍົກລະດັບຄວາມຮັບຜິດຊອບການຄວບຄຸມ, ປ້ອງກັນພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໄວຣັດໂຄໂລນາໃຫ້ຮັບປະກັນ ແລະທັນສະພາບການ.
ຕາມການແຈ້ງການຫ້ອງວ່າການສໍານັກງານນາຍົກລັດຖະມົນຕີເລກທີ 98/ຫສນຍ ລົງວັນທີ 27 ມັງກອນ 2020 ໃຫ້ຮູ້ວ່າ:
ການລະບາດຂອງໄວຣັດໂຄໂລນາມີຜົນກະທົບໃນວົງກວ້າງທັງຕໍ່ສັງຄົມ ແລະເສດຖະກິດລັດຖະບານລາວຖືການປ້ອງກັນຄວບຄຸມ ແລະແກ້ໄຂບັນຫາດັ່ງກ່າວນີ້ເປັນບັນຫາສຳຄັນ ແລະເລັ່ງດ່ວນຮຽກທຸກພາກສ່ວນທັງສູນກາງ, ທ້ອງຖິ່ນຮ່ວມມືກັນຍົກລະດັບຄວາມຮັບຜິດຊອບການຄວບຄຸມ, ປ້ອງກັນພະຍາດດັ່ງກ່າວໃຫ້ຮັບປະກັນ ແລະທັນສະພາບການ.
ໂດຍມອບໃຫ້ທ່ານລັດຖະມົນກະຊວງສາທາລະນະສຸກ, ຫົວໜ້າຄະນະກຳມະການ ແລະຄວບຄຸມພະຍາດຕິດຕໍ່ລະດັບຊາດສືບຕໍ່ດຳເນີນການປ້ອງກັນຄວບຄຸມພະຍາດຢ່າງໃກ້ສິດ ແລະລາຍງານສະພາບໃຫ້ລັດຖະບານເປັນປະຈຳພ້ອມກັນນັ້ນກໍ່ສ້າງຕັ້ງຈຸດແຈ້ງປະສານງານຂອງຄະນະໃຫ້ບັນດາຂະແໜງການ ແລະທ້ອງຖິ່ນເພື່ອຮັບແຈ້ງສະພາບຮ່ວມມືຊ່ວຍເຫຼືອຈາກພາກສ່ວນຕ່າງໆນອກນັ້ນໃຫ້ແຕ່ງຕັ້ງຄະນະສະເພາະກິດໂດຍມອບໃຫ້ ທ່ານ ສົມດີ ດວງດີ ຮອງນາຍົກລັດຖະມົນຕີເປັນຫົວໜ້າແລະຄະນະກຳມະການ ແລະຄວບຄຸມພະຍາດຕິດຕໍ່ລະດັບຊາດເປັນຄະນະຊ່ວຍວຽກເພື່ອປະສານກັບຂະແໜງການ ແລະທ້ອງຖິ່ນປະເມີນຜົນກະທົບຂອງການລະບາດພະຍາດໄວຣັດໂຄໂລນາຕໍ່ປະເທດພ້ອມທັງກຳນົດມາດຕະການຮັບມືແຕ່ລະດ້ານໂດຍສະເພາະບັນດາການທີ່ພົວພັນເຖິງການກວດກາຢູ່ຈຸດທີ່ມີຄວາມສ່ຽງຕາມຊາຍແດນ, ການກະກຽມຈຸດບໍລິການສາທາລະນະສຸກສະເພາະໃນແຕ່ແວງ,ແຈ້ງເຕືອນປະຊາຊົນ, ເກັບກຳສະຖິຕິນັກສຶກສາ ແລະນັກທ່ອງທ່ຽວທີ່ມາຈາກ ສປ ຈີນ, ຄວບຄຸມລາຄາ, ຄົ້ນຄວ້າການວາງແຜນ ແລະກະກຽມງົບປະມານ.
ນອກຈາກນັ້ນມອບໃຫ້ກະຊວງການຕ່າງປະເທດເປັນເຈົ້າການປະສານງານແລກປ່ຽນຂໍ້ມູນຂ່າວສານກັບບັນດາປະເທດເພື່ອນມິດ ແລະອົງການອະນາໄມໂລກຢ່າງໃກ້ຊິດ ເພື່ອຕິດຕາມທ່າອ່ຽງການລະບາດພະຍາດ ແລະຍາດແຍ່ງການຊ່ວຍເຫຼືອໂດຍສະເພາະໃນການສົ່ງຊ່ຽວຊານທີມແພດ ພ້ອມດ້ວຍອຸປະກອນເຄື່ອງມື, ຢາ, ວັກຊິນປ້ອງ ກັນໃນກໍລະນີທີ່ມີການລະບາດໃຫຍ່ພ້ອມນີ້ໃຫ້ສະຖານທູດ ແລະກົງສູນລາວປະຈຳ ສປ ຈີນ ຕິດຕາມຢ່າງໃກ້ສິດທັງອຳນວຍຄວາມສະດວກ ແລະຊ່ວຍເຫຼືອພົນລະເມືອງລາວ, ນັກທ່ອງທ່ຽວ, ນັກທຸລະກິດ ແລະນັກສຶກສາລາວທີ່ກຳລັງດຳລົງຊີວິດ ແລະລາຍງານສະພາບໃຫ້ເປັນປະຈຳ.
ປະຈຸບັນນັກສຶກສາລາວທີ່ຢູ່ແຂວງຫູເປີ່ຍ 49 ຄົນ, ຍິງ 20 ຄົນ ກຸ່ມນັກສຶກສາເຫຼົ່ານີ້ຂຶ້ນກັບການຄຸ້ມຄອງຂອງສະຖານກົງສູນໃຫຍ່ຊ່າງຊາທີ່ຢູ່ໃນຄວາມປອດໄພທຸກຢ່າງທັງໄດ້ຮັບການເອົາໃຈໃສ່ຈາກບັນດາໂຮງຮຽນ ແລະການຈັດຕັ້ງພັກ-ລັດຂອງແຂວງຫູເປີ່ຍເປັນຢ່າງດີ.
ແຫຼ່ງຂໍ້ມູນ: ຂຽນໂດຍ: ແພງຕາ,ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ