ຢູ່ໂຮງຮຽນປະຖົມສົມບູນ ບ້ານໃຫຍ່ ເມືອງທົ່ງມີໄຊ ແຂວງໄຊຍະບູລີ ໄດ້ເປີດພິທີດຳເນີນການສອບເສັງນັກຮຽນເກັ່ງ ແລະ ຖາມ-ຕອບ ຄວາມຮູ້ວິທະຍາສາດສາຍສາມັນສຶກສາຂັ້ນເມືອງຂຶ້ນຢ່າງເປັນທາງການ ໂດຍເປັນກຽດເຂົ້້າຮ່ວມ ຂອງທ່ານ ອາລຸນສັກ ລິນທະວົງ ຮອງເລຂາຄະນະບໍລິຫານງານພັກເມືອງ ຮອງເຈົ້າເມືອງໆທົ່ງມີໄຊ, ທ່ານ ທອງລ່ຽນ ແກ້ວມະນີ ກຳມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຜູ້ອຳນວຍການໂຮງຮຽນອ້ອມຂ້າງເມືອງ, ຄູ-ອານຈານຕະຫຼອດຮອດນັກສອບເສັງ ນັກ ຖາມ-ຕອບຄວາມຮູ້ວິທະຍາສາດເຂົ້າຮ່ວມ.
ໃນພິທີ ທ່ານອາລຸນສັກ ລິນທະວົງ ຮອງເລຂາຄະນະບໍລິຫານພັກເມືອງ ຮອງເຈົ້າເມືອງໆທົ່ງມີໄຊໄດ້ກ່າວເປີດພິທີ ຢ່າງເປັນທາງການເຊິ່ງທ່ານໄດ້ກ່າວວ່າ:
ການຈັດຕັ້ງການສອບເສງນັກຮຽນເກັ່ງສາຍສາມັນສຶກສາໄດ້ມີຕົວແທນນັກຮຽນເກັ່ງມາຈາກໂຮງຮຽນປະຖົມ 10 ແຫ່ງ, ມັດທະຍົມຕົ້ນ 4 ແຫ່ງ ແລະ ມັດທະຍົມຕອນປາຍ 2 ແຫ່ງ.
ການສອບເສັງໄດ້ແບ່ງເປັນ 2 ສາຍຄື ສາຍຊັ້ນປະຖົມສຶກສາຂັ້ນ ປ3 – ປ5 ຈະໄດ້ສອບເສັງ 4 ວິຊາ ຄື:
ພາສາລາວ,ຄະນິດສາດ, ໂລກອ້ອມຕົວ ແລະ ພາສາອັງກິດ ສາຍຊັ້ນມັດທະຍົມສຶກສາຕອນນຕົ້ນມ4 ແລະ ຊັ້ນມັດທະຍົມຕອນປາຍມ6 ສອບເສັງ 4 ວິຊາຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ.
ໃນນີ້ຕ້ອງຮັບຮູ້ວ່າ ເກນຄະແນນ ນັກຮຽນເກັ່ງນັບແຕ່ສູນກາງລົງຮອດທ້ອງຖິ່ນແມ່ນໄດ້ກໍານົດໄວ້ໃນຄະແນນ 7-10 (ຖ້າສອບເສັງໄດ້ຄະແນນ 6,99 ລົງມາ ຖືວ່າບໍ່ແມ່ນເກນຄະແນນ ຂອງນັກຮຽນເກັ່ງ) ນອກຈາກການສອບເສັງຄັດເລືອກນັກຮຽນເກັ່ງແລ້ວ ປີນີ້ຄະນະຮັບຜິດຊອບໄດ້ຈັດໃຫ້ມີການແຂ່ງຂັນຖາມ-ຕອບ ຄວາມຮູ້ວິທະຍາສາດຊັ້ນປະຖົມສຶກສາ ແລະ ຊັ້ນມັດທະຍົມແຕ່ລະໂຮງຮຽນມີ 1 ທີມ
ເຊິ່ງຖືວ່າເປັນວິທີໜຶ່ງໃນການທົດສອບຄວາມຮູ້,ຄວາມສາມາດ, ຄວາມສະຫຼາດ ແລະ ໄຫວພີກ ທີ່ນັກຮຽນຈະຕ້ອງກ້າສະແດງອອກ ເພື່ອໃຫ້ສົມກັບວ່າເປັນຕົວແທນນັກຮຽນເກັ່ງຈາກໂຮງຮຽນທີ່ຜ່ານການຄັດເລືອກມາແລ້ວນັ້ນ ເພື່ອມາວັດຜົນໃນລະດັບເມືອງ ພ້ອມທັງເປັນການຄັດເລືອກເອົານັກຮຽນເກັ່ງຊັ້ນປະຖົມ, ມັດທະຍົມສຶກສາຕອນຕົ້ນຂັ້ນ ມ4 ແລະ ມັດທະຍົມສຶກສາຕອນປາຍຂັ້ນ ມ7
ໄປຮ່ວມແຂ່ງຂັນຢູ່ຂັ້ນແຂວງ ເພື່ອເຮັດໃຫ້ການສອບເສັງ ແລະ ຖາມ-ຕອບວິທະຍາສາດມີປະສິດທິຜົນສູງ ແລະ ຮັບປະກັນໃຫ້ໄດ້ດ້ານຫຼັກການຂອງການສອບເສັງມີຄວາມຖືກຕ້ອງ ແລະ ຄວາມຍຸດຕິທໍາ ທ່ານຍັງໄດ້ຮຽກຮ້ອງມາຍັງຄະນະຮັບຜິດຊອບໃນການສອບເສັງ, ຄະນະກໍາມະການຕ້ອງໄດ້ເອົາໃຈໃສ່ຊີ້ນໍາ ປະຕິບັດລະບຽບ ແລະ ວາລະການສອບເສັງຢ່າງເຄັ່ງຄັດ
ສໍາລັບນັກສອບເສັງທັງໝົດຈົ່ງພ້ອມກັນ ປະຕິບັດກົດລະບຽບການສອບເສັງໃຫ້ເຂັ້ມງວດ, ເອົາໃຈໃສ່ໃນການຄົ້ນຄິດ ໃສ່ບົດສອບເສັງ ຂອງຕົນຢ່າງເລິກເຊິ່ງ ເພື່ອເຮັດໃຫ້ຜົນການສອບເສັງອອກມາໄດ້ຄະແນນດີ, ສົມກັບຄວາມຕັ້ງໃຈທີ່ຕົນເອງ, ຜູ້ປົກຄອງ ແລະ ການຈັດຕັ້ງຄາດຫວັງເອົາໄວ້, ການສອບເສັງ, ການຖາມຕອບຄັ້ງນີ້ແມ່ນຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.
ແຫຼ່ງຂໍ້ມູນ: ທົ່ງມີໄຊ ວັນໃໝ່