ເພື່ອສືບຕໍ່ປະກອບສ່ວນ ແລະ ປະຕິບັດໜ້າທີ່ປະທານຮ່ວມ ຂອບການຮ່ວມແມ່ນໍ້າຂອງ-ແມ່ນໍ້າລ້ານຊ້າງ (2018-2020), ສປປ ລາວ ຈະໄດ້ເປັນເຈົ້າພາບຈັດກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ໃນວັນທີ 20 ກຸມພາ 2020 ທີ່ ນະຄອນຫລວງວຽງຈັນ, ສປປ ລາວ.
ໂດຍການເປັນປະທານຮ່ວມຂອງ ທ່ານ ລັດຖະມົນຕີຕ່າງປະເທດ ແຫ່ງ ສປປ ລາວ ແລະ ທ່ານ ທີ່ປຶກສາແຫ່ງລັດ, ລັດຖະມົນຕີຕ່າງປະເທດ ແຫ່ງ ສປ ຈີນ.
ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ສ້າງຕັ້ງຂຶ້ນໃນ ເດືອນມີນາ 2016 ໂດຍການຕົກລົງເຫັນດີຂອງຜູ້ນຳຈາກ 5 ປະເທດແມ່ນໍ້າຂອງ(ກໍາປູເຈຍ, ສປປ ລາວ, ມຽນມາ, ໄທ ແລະ ຫວຽດ ນາມ) ໃນຂະນະທີ່ ສປ ຈີນ ໃນນາມຄູ່ຮ່ວມພັດທະນາ ຊຶ່ງມີກົນໄກການຮ່ວມມືໃນ 3 ເສົ້າຄໍ້າ ປະກອບມີ:
ການເມືອງ-ຄວາມໝັ້ນຄົງ; ການພັດທະນາເສດຖະກິດ; ສັງຄົມ-ວັດທະນະທໍາ ແລະ ການໄປມາຫາສູ່ຂອງປະຊາຊົນ ໃນພາກພື້ນແມ່ນໍ້າຂອງ.
ຂອບການຮ່ວມມືດັ່ງກ່າວ ປະກອບມີ 5 ຂົງເຂດບູລິມະສິດ ຄື: ການບໍລິຫານຊັບພະຍາກອນນໍ້າ; ການພັດທະນາກະສິກໍາ ແລະ ລຶບລ້າງຄວາມທຸກຍາກ; ການເຊື່ອມໂຍງ ແລະ ເຊື່ອມຈອດ; ການສ້າງຂີດຄວາມສາມາດໃນການຜະລິດ ແລະ ເສດຖະກິດຂ້າມຊາຍແດນ.
ແຫຼ່ງຂໍ້ມູນ: ຂປລ
