ທີ່ສະໜາມບິນສາກົນວັດໄຕ ເຍົາວະຊົນຂອງສະໂມສອນ ລ໋ອບ ສະເຕດ້ຽມ ແລະ ສະໂມສອນ ນະຄອນຫຼວງ ຈຳນວນ 11 ຄົນ ຮ່ວມຄັດເລືອກຊີງທຶນການສຶກສາ ແລະ ຝຶກກິລາບານເຕະ ລຸ້ນໂຄຕ້າຂອງໂຄງການ U.S. COLLEGE SPORTS CAMP ASIA TRY OUT ເຊິ່ງເປັນໂຄງການທີ່ເລືອກເອົານັກກິລາດີເດັ່ນທີ່ດີທີ່ສຸດ 1 ຄົນ ໃນແຕ່ລະຮຸ່ນ ໄປຝຶກບານເຕະ ແລະ ສຶກສາຕໍ່ທີ່ ສະຫະລັດອາເມຣິກາ ເຊິ່ງຈະຈັດຂຶ້ນທີ່ສະໜາມກີລາແຫ່ງຊາດປະເທດໄທ ນະຄອນຫຼວງບາງກອກ ປະເທດໄທ ລະຫວ່າງວັນທີ 15-16 ກຸມພາ 2020.
ສຳລັບທ້າວ ຄູນທະວີ ທອງມະນີ ກໍເປັນໜຶ່ງນັກກິລາທີ່ຕິດ 1 ໃນ 11 ຄົນ ບອກວ່າ: ຫຼານໄດ້ເຕະມາຕັ້ງແຕ່ອາຍຸ 7 ປີ ປັດຈຸບັນ ກໍອາຍຸ 13 ປີແລ້ວ ຮູ້ສືກເປັນກຽດ ແລະ ພາກພູມໃຈຫຼາຍ ທີ່ໄດ້ຕາງໜ້າເຍົາວະຊົນລາວ ເຂົ້າຮ່ວມກິດຈະກຳດັ່ງກ່າວ ແລະ ຂໍຂອບໃຈມາຍັງໂຮງຮຽນນິລະດາ ແລະ ຄອບຄົວ
ໂດຍສະເພາະແມ່ນພໍ່ ເຊິ່ງຍາມໃດກໍໄດ້ທຸ້ມເທສົ່ງເສີມຕະຫຼອດມາ ຂໍໃຫ້ເຊື່ອໝັ້ນວ່າ ລູກຈະຕັ້ງໃຈ ແລະ ທຸ້ມເທຢ່າງສຸດຄວາມສາມາດ ສົມດັ່ງເຫື່ອແຮງພໍ່ທີ່ໄດ້ຊຸກຍູ້ລູກມີປະສົບການໄລຍະທີ່ຜ່ານມາ ກໍຄື ກຽມສະພາບຮ່າງກາຍ, ເທັກນິກທັກສະທີ່ຮຽນມາ ເພື່ອນຳໃຊ້ໃຫ້ເກີດເປັນໂຫຍດສູງສຸດ ກໍຄື ເຂົ້າຮ່ວມຍາດໂຄຕ້າໃນຄັ້ງນີໃຫ້ໄດ້.
ສ່ວນທ້າວ ດູລະໄນ ແກ້ວມະນິວົງ ກໍໄດ້ບອກວ່າ:
ຫຼານຮູ້ສືກດີ ແລະ ພາກພູມໃຈຫຼາຍທີ່ຖືກເລືອກໃຫ້ໄປເຂົ້າຮ່ວມຄັດເລືອກຊີງທຶນການສຶກສາໃນຄັ້ງນີ້ ສະນັ້ນ ເພື່ອເຮັດໃຫ້ປະສົບຜົນສຳເລັດ ໃຫ້ໄດ້ຕິດ 1 ໃນ 3 ກໍຈະນຳໃຊ້ຄວາມສາມາດຂອງຕົນເອງທີ່ໄດ້ຮຽນຮູ້ມາແຕ່ນ້ອຍ ກໍຄື ທັກສະໃນການຈັບບານ ສົ່ງບານ ແລະ ສະແດງເທັກນິກ, ທັກສະຕ່າງໆ ເພື່ອສະແດງໃນກິດຈະກຳໃນຄັ້ງນີ້ ໃຫ້ເພີ່ນໄດ້ເຫັນ ແລະ ຮັບຮູ້ ວ່າເດັກນ້ອຍຄົນລາວ ກໍມີຄວາມສາມາດບໍ່ແພ້ເດັກນ້ອຍຄົນຈາກຊາດໃດໆ.
ຂະນະທີ່ ທ້າວ ຄູນຮຸ່ງເຮືອງ ພົມມາວິຈິດ ນັກເຕະຮຸ່ນສືບທອດ ອາຍຸ 12 ປີ ຂອງສະໂມສອນ ລ໋ອບສະເຕດ້ຽມ ກໍໄດ້ບອກວ່າ:
ນີ້ເປັນຄັ້ງທຳອິດຂອງຫຼານ ທີ່ໄດ້ເຂົ້າຮ່ວມກິດຈະກຳດີໆແບບນີ້ ສະນັ້ນ ເພື່ອບໍ່ໃຫ້ເສຍໂອກາດ ກໍຈະນຳໃຊ້ບົດຮຽນທີ່ຄູຝືກໄດ້ຖ່າຍທອດໃຫ້ທັງໝົດ ນຳໄປສະແດງຢ່າງສຸດຄວາມສາມາດ ເພື່ອໃຫ້ໄດ້ຮັບໂຄຕ້າໄປສືກສາຕໍ່ທີ່ອາເມລິກາ ຂໍກຳລັງໃຈຈາກຄອບຄົວ ເພື່ອສົ່ງແຮງໃຈມາເຊຍລູກດ້ວຍ ແລ້ວ ລູກຈະເຮັດໃຫ້ພໍ່ແມ່ບໍ່ຜິດ ຫວັງ.
ແຫຼ່ງຂໍ້ມູນ: Lao su su ລາວ ສູ້ ສູ້