ທີ່ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ດຣ. ສູ ຕົງຢູ (Dr. Qu Dongyu) ຜູ້ອຳນວຍການໃຫຍ່ ອົງການອາຫານ ແລະ ການກະເສດ(FAO) ຊຶ່ງມີສຳນັກງານໃຫຍ່ຕັ້ງຢູ່ທີ່ ນະຄອນຫລວງໂຣມ, ປະເທດ ອີຕາລີ, ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 18-20 ກຸມພານີ້.
ໂອກາດນີ້, ທ່ານ ທອງລຸນ ສີລຸລິດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ສປປ ລາວ ຂອງ ທ່ານ ດຣ. ສູ ຕົງຢູ (Dr. Qu Dongyu) ພ້ອມດ້ວຍຄະນະ ໃນຄັ້ງນີ້, ເປັນການຮັດແໜ້ນສາຍພົວພັນຮ່ວມມື ລະຫວ່າງ ສປປ ລາວ ແລະ ອົງການ FAOໃຫ້ແໜ້ນແຟ້ນຂຶ້ນກວ່າເກົ່າ.
ພ້ອມນີ້ ໄດ້ມີການແລກປ່ຽນປຶກສາຫາລື ກ່ຽວກັບບັນດາໂຄງການຮ່ວມມືໃນໄລຍະຜ່ານມາ ແລະ ແນວທາງ ການຮ່ວມມືໃນຕໍ່ໜ້າ ໂດຍສະເພາະແມ່ນຂໍ້ລິເລີ່ມຈາກມືສູ່ມື (Hand-in-Hand Initiative) ຂອງ ຜູ້ອຳນວຍການໃຫຍ່ຄົນໃໝ່ ຊຶ່ງຈຸດປະສົງແມ່ນເພື່ອນຳເອົາການຊ່ວຍເຫລືອຈາກບັນດາຄູ່ຮ່ວມພັດທະນາ ມາສູ່ບັນດາປະເທດທີ່ມີຄວາມຈຳເປັນ.
ທ່ານ ນາຍົກລັດຖະມົນຕີ ຍັງໄດ້ສະແດງຄວາມຂອບໃຈມາຍັງອົງການ ທີ່ໄດ້ປະກອບສ່ວນໃນການລະດົມຂົນ ຂວາຍທຶນ ເຂົ້າໃນປັບປຸງ ແລະ ພັດທະນາວຽກງານໃນຂົງເຂດກ່ຽວຂ້ອງ ໂດຍຜ່ານບັນດາໂຄງການຕ່າງໆ ທີ່ໄດ້ປະຕິບັດຮ່ວມກັບຂະແໜງການພາກລັດຂອງລາວ ລວມເຖິງບັນດາໂຄງການຊ່ວຍເຫລືອທີ່ຈະເກີດຂຶ້ນໃນອະນາຄົດ.
ແຫຼ່ງຂໍ້ມູນ: ຂປລ