ກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກຮ່ວມກັບຫ້ອງວ່າການປົກຄອງນະຄອນຫຼວງວຽງຈັນຈັດກອງປະຊຸມໂຄສະນາເຜີຍແຜ່ວິທີປ້ອງກັນການຕິດເຊື້ອພະຍາດໂຄວິດ-19 ໃຫ້ແກ່ບັນດາຜູ້ປະກອບການດ້ານໂຮງແຮມ ຮ້ານອາຫານ ຂະແໜ່ງການທ່ອງທ່ຽວ ແລະ ຂະແໜ່ງການກ່ຽວຂ້ອງເພື່ອໃຫ້ຮູ້ກ່ຽວກັບພະຍາດໂຄວິດ-19
ແລະ ຮູ້ເຖິງວິທີປ້ອງກັນຕົນເອງໄດ້ຈັດຂຶ້ນ ທີ່ຫ້ອງວ່າການປົກຄອງນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມທັງບັນດາຜູ້ປະກອບການຂະແໜ່ງການອື່ນໆ.
ທ່ານ ດຣ ພູທອນ ເມືອງປາກ ໄດ້ກ່າວວ່າ:
ການລະບາດຂອງພະຍາດໂຄວິດ-19 ມີທ່າອ່ຽງແຜ່ຂະຫຍາຍອອກສູ່ຫຼາຍປະເທດໃນໂລກ ເຊິ່ງແມ່ນພະຍາດໜຶ່ງທີ່ຕິດຕໍ່ຈາກສັດສູ່ຄົນ ແລະ ພັດທະນາຈາກຄົນສູ່ຄົນໃນຂົງເຂດອາຊີກໍມີການຂະຫຍາຍໄປຫຼາຍປະເທດ.
ໃນ ສປປ ລາວ ກໍໄດ້ມີມາດຕະການຢ່າງເຂັ້ມຂຸ້ນເພື່ອປ້ອງກັນ ແລະ ຄວບຄຸມພະຍາດດັ່ງກ່າວ.
ສະນັ້ນ, ເພື່ອໃຫ້ທຸກພາກສ່ວນມີສ່ວນຮ່ວມໃນການປ້ອງກັນ ແລະ ສະກັດກັ້ນການແຜ່ລາມຂອງພະຍາດດັ່ງກ່າວໄດ້ ວິທີທີ່ດີທີ່ສຸກກໍຄືການຫຼີກລ່ຽງເຂົ້າໄປໃນພື້ນທີ່ມີການລະບາດ, ການອະນາໄມສ່ວນບຸກຄົນດ້ວຍວິທີການປ້ອງກັນຕົນເອງບໍ່ໃຫ້ຕິດເຊື້ອ ແລະ ການອະນາໄມສະຖານທີ່ບໍ່ໃຫ້ເປັນແຫຼ່ງແຜ່ເຊື້ອ.
ການເຜີຍຈັດຕັ້ງການເຜີຍແຜ່ໃນການປ້ອງກັນການຕິດເຊື້ອໂຄວິດ-19 ໃຫ້ຜູ້ປະກອບການໂຮງແຮມ ຮ້ານອາ ຫານບັນດາສູນການຄ້າ ສະຖານີຂົນສົ່ງທາງບົກ ແລະ ອາກາດ ເພື່ອໃຫ້ຜູ້ເຂົ້າຮ່ວມໄດ້ນໍາເອົາຂໍ້ມູນຄວາມເປັນມາ ແລະ ອັນຕະລາຍ ວິທີປ້ອງກັນການຕິດເຊື້ອ ຮູ້ວິທີການຂ້າເຊື້ອທີ່ຖືກຕ້ອງໃນຂອບເຂດທີ່ຕົນຮັບຜິດຊອບ ແລະ ການສາທິດຕົວຈິງຈາກແພດໝໍໃນການໃຊ້ອຸປະກອນການແພດທີ່ຖືກຕ້ອງເພື່ອນໍາໄປໂຄສະນາຕໍ່ໄປ.
ແຫຼ່ງຂໍ້ມູນ: ວຽງຈັນໃໝ່