ເມື່ອເອີ່ຍເຖິງທ່ານ ເກຍ ອູ໊ສິດທິເດດ ຫຼື “ເຮຍເກຍ” ຫຼາຍທ່ານຄົງຮູ້ຈັກດີ ໂດຍສະເພາະກໍແມ່ນປະຊາຊົນໃນບ້ານ ຄໍາປ່າແໜ ແລະ ບ້ານ ປ່າກ້ວຍ ເມືອງຈໍາພອນແຂວງສະຫວັນນະເຂດທີ່ຈົດຈໍາໄດ້ດີທີ່ສຸດ ເພາະທ່ານເປັນຜູ້ໜຶ່ງທີ່ຍື່ນມື ແລະ ສະຫຼະແຮງຊັບສ່ວນຕົວຫຼາຍພັນລ້ານກີບເພື່ອໄປຊ່ວຍເຫຼືອ, ພັດທະນາ, ປັບປຸງຊີວິດການເປັນຢູ່ຂອງພວກເຂົາເຈົ້າຫຼາຍຮ້ອຍຊີວິດຫຼຸດພົ້ນອອກຈາກອາຊີບຂໍທານໃຫ້ມີທີ່ຢູ່ອາໄສຖາວອນ, ມີອາຊີບທີ່ໝັ້ນຄົງ, ມີຊັບສິນເປັນຂອງຕົນເອງ, ມີຊີວິດການເປັນຢູ່ທີ່ດີຂຶ້ນພ້ອມທັງສາມາດເຂົ້າເຖິງການສຶກສາ ແລະ ສາທາລະນະສຸກໄດ້ສະດວກສະບາຍຫຼາຍຂຶ້ນ.
ທ່ານ ເກຍ ອູ໊ສິດທິເດດ ໄດ້ເລົ່າໃຫ້ຟັງເຖິງປະຫວັດຄວາມເປັນມາ, ການຕໍ່ສູ້ຊີວິດເພື່ອຫາລ້ຽງຕົນເອງ ແລະຄອບຄົວຈົນກວ່າຈະມີວັນນີ້ວ່າ:
ຊຸມປີ 1964 ຕົນເອງໄດ້ປົບໜີສົງຄາມ ແລະ ຫຼົບຊ້ອນຢູ່ດົງປ່າຕືບເຂດຊາຍແດນລາວ-ຫວຽດນາມ ຢູ່ເມືອງເຊໂປນ ແຂວງສະຫວັນນະເຂດ ເພາະຢ້ານເຮືອບິນຝ່າຍກົງກັນຂ້າມຖິ້ມລະເບີດໃສ່ ໃນນັ້ນເວລານັ້ນຕົນເອງມີອາຍຸ 7 ປີ ແລະ ໄດ້ຮຽນໜັງສືຢູ່ໃນປ່າ ເປັນເວລາ 10 ປີ (ຈົບຊັ້ນປ4) ພໍ່ແມ່ໃນເວລານັ້ນແມ່ນມີອາຊີບເຮັດໄຮ່ເຮັດສວນລ້ຽງຊີບ,
ປີ 1974 ສົງຄາມຍຸຕິຈຶ່ງໄດ້ອອກມາຢູ່ບ້ານ ທ່າໂຂ່ງ ເມືອງ ເຊໂປນ ຄອບຄົວພໍ່ແມ່ຂອງຕົນເອງຈຶ່ງໄດ້ປະກອບອາຊີບຄ້າຂາຍເຄື່ອງຍ່ອຍ,
ຕົກມາຮອດຊຸມປີ 1976 ຕົນເອງຈຶ່ງຍົກຍ້າຍເຂົ້າຢູ່ສະຫວັນນະເຂດ ມາເຮັດວຽກເປັນກໍາມະກອນຮັບຈ້າງ,
ປີ 1978 ໄດ້ເຮັດທຸລະກິດຮັບຈ້າງຂົ້ວໝາກກາເຟໃຫ້ບໍລິສັດການຄ້າແຂວງ, ພ້ອມຊື້ເຄື່ຶງຍ່ອຍທີ່ຈໍາເປັນຝາກເມືອໃຫ້ພໍ່ແມ່ຄ້າຂາຍທີ່ເຊໂປນ,
ປີ 1985 ໄດ້ເຮັດອາຊີບຕົ້ມເຫຼົ້າ 90 ສະໜອງໃຫ້ໂຮງໝໍແຂວງ ແລະ ລ້ຽງໝູ, ລ້ຽງງົວໄປພ້ອມກັນ,
ປີ 1987 ໄດ້ຕັ້ງໂຮງຊອຍໄມ້ເຮັດເຟີນີເຈີ,
ປີ 1990 ໄດ້ຂະຫຍາຍເປັນໂຮງງານເລື່ອຍໄມ້ຫຼັກ 4,
ປີ 1989 ໄດ້ຊື້ໂຮງງານນໍ້າກ້ອນຈາກລັດ,
ປີ 1996 ຕົນເອງຈຶ່ງຢຸດເຊົາທຸລະກິດໂຮງເລື່ອຍເນື່ອງຈາກຕົນເອງຍັງມີພາລະຕ້ອງໄດ້ມາບໍລິຫານປັບປຸງໂຮງງານນໍ້າກ້ອນຕາມເງື່ອໄຂສັນທີ່ໄດ້ຕົກລົງກັບລັດ ໄດ້ປ່ຽນຊື່ມາເປັນໂຮງງານນໍ້າດື່ມ ແລະນໍ້າກ້ອນໂລມາຄໍາ.
ປັດຈຸບັນນີ້ໂຮງງານແຫ່ງນີ້ສາມາດຜະລິດນໍ້າດື່ມໄດ້ 570,000/ວັນ, ນໍ້າກ້ອນ 300,000 ກິໂລ/ວັນ,ໃນວັນທີ 5 ເມສາ 2014 ໂຮງງານແຫ່ງນີ້ໄດ້ຮັບໃບຢັ້ງຢືນຄຸນນະພາບມາດຕະຖານສາກົນ ISO22000 ເປັນແຫ່ງທໍາອິດຂອງ ສປປ ລາວ, ປີ 2006 ໄດ້ສ້າງຕັ້ງບໍລິສັດອຸດົມຊັບແຮ່ຊາຍ, ປີ 2010 ໄດ້ສ້າງຕັ້ງບໍລິສັດອຸດົມຊັບກໍ່ ສ້າງ-ຂົວທາງ.
ທ່ານ ເກຍ ໃຫ້ຮູ້ຕື່ມອີກວ່າ: ຜ່ານມາຕົນເອງໄດ້ເຮັດທຸລະກິດການຜະລິດຈາກນ້ອຍຄ່ອຍຂະຫຍາຍຕົວຂຶ້ນມາ ຍາມໃດຕົນກໍໃຫ້ຄວາມສໍາຄັນຂອງການຜະລິດທີ່ມີຄຸນນະພາບ ແລະ ຄວາມຍືນຍົງຂອງທຸລະກິດແບບຄອບຄົວ.
ຫຼາຍສິບປີຜ່ານທີ່ຕົນເຮັດທຸລະກິດຍັງໄດ້ຕິດພັນກັບການຊ່ວຍເຫຼືອສັງຄົມຫຼາຍສິ່ງຫຼາຍຢ່າງມາໂດຍຕະຫຼອດ.
ໃນຫຼາຍປີຜ່ານມາກໍໄດ້ຮັບການຍ້ອງຍໍຈາກອົງການຈັດຕັ້ງຂອງພັກ-ລັດຖະບານຫຼາຍຂັ້ນ, ໃນວັນທີ 25 ພະຈິກ 2015 ທາງຂັ້ນເທິງເພິ່ນໄດ້ປະດັບຫຼຽນນາມມະຍົດນັກພັດທະນາດີເດັ່ນແຫ່ງຊາດໃຫ້ແກ່ຂ້າພະເຈົ້າ.
ໃນປີ 2016-2018 ທາງໂຮງງານໂລມາຄໍາ ໄດ້ເຂົ້າມີສ່ວນນຳອົງການຈັດຕັ້ງຂອງພັກ-ລັດເພື່ອລຶບລ້າງຄວາມທຸກຍາກຂອງປະຊາຊົນບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດຜ່ານການເຮັດທຸລະກິດ ແລະ ການປະກອບສ່ວນຊ່ວຍເຫຼືອສັງຄົມ.
ແຮງບັນດານໃຈທີ່ເຮັດໃຫ້ທ່ານນໍາໃຊ້ເງິນສ່ວນຕົວຫຼາຍພັນລ້ານເຂົ້າມາຊ່ວຍເຫຼືອປະຊາຊົນທຸກຍາກ? ດັ່ງທີ່ກ່າວມາຂ້າງເທິງເວລາຕົນຍັງນ້ອຍໄດ້ຮັບການບອກສອນຈາກຄອບຄົວໃຫ້ຮູ້ຈັກຄວາມກະຍູຕໍ່ຄອບຄົວ ແລະ ຍາດຕິພີ່ນ້ອງ ແລະ ເວລາຮຽນໜັງສືນັ້ນຄູອາຈານ, ການຈັດຕັ້ງເພິ່ນໄດ້ອົບຮົມບົ່ມສອນໃຫ້ມີຄວາມຮັກຊາດມີຄວາມເສຍສະຫຼະຕ້ອງໄດ້ສະແດງອອກເຖິງພຶດຕິກໍາຂອງທາດແທ້ດ້ວຍຄວາມປູກຝັງດັ່ງກ່າວ ເມື່ອຕົນເອງມີທ່າແຮງເງື່ອນໄຂ ຈຶ່ງບໍ່ຄ່ອຍປະຕິເສດເລື່ອງການຊ່ວຍເຫຼືອໃຫ້ຜູ້ເລັກຜູ້ໜ້ອຍມາຕະຫຼອດ.
ໃນວັນທີ 16 ທັນວາ 2015 ໄດ້ມີໜັງສືປຸກລະດົມຂອງທ່ານເຈົ້າເມືອງໆຈໍາພອນໂດຍຜ່ານການເຊັນເຫັນດີຂອງທ່ານເຈົ້າແຂວງ ຂ້າພະເຈົ້າຈິ່ງສະໝັກໃຈເຂົ້າມີສ່ວນຮ່ວມໃນການລຶບລ້າງຄວາມທຸກຍາກຂອງປະຊາຊົນ (ຄົນຂໍທານ)ບ້ານຄໍາປ່າແໜ ແລະ ບ້ານປ່າກ້ວຍ ເມືອງຈໍາພອນ ແຂວງສະຫວັນນະເຂດ.
ໃນວັນທີ 1 ມັງກອນ 2016 ໄດ້ເຊັນບົດບັນທຶກກັບເມືອງຊ່ວຍເຫຼືອປະຊາຊົນ 27 ຄອບຄົວເປົ້າໝາຍເບື້ອງຕົ້ນ (ເປັນເວລາໜຶ່ງປີ), ໄລຍະທີ 2 ໄດ້ເຊັນບົດບັນທຶກໃນວັນທີ 1 ມັງກອນ 2017 ຫາ 31 ທັນວາ 2018 ລວມການຊ່ວຍເຫຼືອສອງບ້ານໃນ 3 ປີ ໃຫ້ກັບ 111 ຄອບຄົວ, 600 ກວ່າຄົນ ລວມເປັນມູນຄ່າ 15 ຕື້ກວ່າກີບ ເຊິ່ງເປັນທຶນຂອງຄອບຄົວຂ້າພະເຈົ້າ, ນອກນີ້ຍັງມີທຶນຈາກການຈັດຕັ້ງພັກ-ລັດຖະບານ ແລະບໍລິສັດຫ້າງຮ້ານພາຍ ໃນ-ຕ່າງປະເທດລວມ 7 ຕື້ກວ່າກີບ.
ໃນການຊ່ວຍເຫຼືອປະຊາຊົນໃນສອງບ້ານ 3 ປີຜ່ານມາຂອງຂ້າພະເຈົ້າໄດ້ຕັ້ງເປົ້າໝາຍໄວ້ຕ້ອງການໃຫ້ປະຊາຊົນໄດ້ຫັນປ່ຽນຈາກການດໍາລົງຊີວິດ ຫາກິນແບບເລື່ອນລອຍໃຫ້ມາອອກແຮງງານເຮັດກິນຢູ່ກັບທີ່.
ສໍາລັບຮູບແບບວິທີການເຮັດຂອງຕົນໄດ້ເຊີນທີ່ປຶກສາຂອງໂຄງການຕັ້ງທີມງານເຮັດຕົວຈິງຢູ່ທ້ອງຖິ່ນ ເຊິ່ງຂ້າ ພະເຈົ້າເປັນຜູ້ນໍາທີມເຮົດຕົວຈິງ, ໃຫ້ທີມງານເຮັດວຽກລັກສະນະຄ້າຍຄືກັນກັບການເຮັດທຸລະກິດຂອງຕົນ, ໃນແຕ່ລະມື້ທີມງານຕ້ອງໄດ້ລົງໄປຫາປະຊາຊົນແຕ່ລະຄອບຄົວເພື່ອປຶກສາຫາລືແກ້ໄຂວຽກຕົວຈິງໃນສະພາບຄວາມເປັນຈິງຂອງແຕ່ລະຄອບຄົວຕ້ອງເຮັດຫຼາຍໆໜ້າວຽກໄປພ້ອມກັນ ເພື່ອໃຫ້ເກີດຜົນປະໂຫຍດອັນໄວແກ່ປະຊາຊົນດ້ວຍຄວາມເຊື່ອໝັ້ນ ແລະ ເພິ່ງພໍໃຈໃນການຫັນປ່ຽນ.
ຂ້າພະເຈົ້າຫຼີກໃຫ້ການຊ່ວຍເຫຼືອແບບອຸປະຖໍາ, ພວກເຮົາເນັ້ນການສ້າງພື້ນຖານໂຄງລ່າງຫຼາຍສິ່ງຫຼາຍຢ່າງທີ່ຈໍາເປັນໃຫ້ກັບປະຊາຊົນເພື່ອໃຫ້ເຂົາເຈົ້າໄດ້ມີບ່ອນອອກແຮງງານເຮັດກິນຢູ່ກັບທີ່ໃຫ້ສາມາດກຸ້ມຢູ່ກຸ້ມກິນແບບຍືນຍົງ.
ວັນທີ 29 ເມສາ 2019 ທີ່ຫ້ອງປະຊຸມໃຫຍ່ ຫ້ອງວ່າການປົກຄອງແຂວງສະຫວັນນະເຂດໄດ້ຈັດພິທີສະຫຼຸບ, ປະເມີນຜົນການຈັດຕັ້ງປະຕິບັດໃນໄລຍະ 3 ປີ ການມີສ່ວນຮ່ວມຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ ໃນໂຄງການລຶບລ້າງຄວາມທຸກຍາກຂອງປະຊາຊົນ (ຄົນຂໍທານ) ຢູ່ບ້ານຄຳປ່າແໜ ແລະ ບ້ານປ່າກ້ວຍ ແຂວງສະຫວັນນະເຂດເຫັນວ່າ:
ມີປະສິດທິຜົນສູງດຽວນີ້ປະຊາຊົນມີຊັບສິນຫຼາຍສິ່ງຫຼາຍຢ່າງເປັນຂອງຕົນເອງເຊິ່ງຫຼາຍຄອບຄົວບໍ່ເຄີຍມມີມາກ່ອນ, ປະຊາຊົນໄດ້ຫັນມາອອກແຮງງານຢູ່ກັບທີ່ເພີ່ມພູນຜະລິດຜົນ ພ້ອມນີ້ຍັງຮູ້ເລື່ອງການປູກ, ການລ້ຽງ, ຮູ້ການຊື້, ການຂາຍ,ຮູ້ໂພສະນາການ, ໄດ້ເຂົ້າເຖິງການສຶກສາ, ສາທາລະນະສຸກ ແລະ ຫັນມານັບຖືສາສະໜາພຸດເຂົ້າວັດຟັງທໍາ. ປັດຈຸບັນປະຊາຊົນໄດ້ມີຊີວິດການເປັນຢູ່ດີຂຶ້ນກວ່າເກົ່າຫຼາຍ.
ລາງວັນນັກພັດທະນາດີເດັ່ນອາຊຽນ ປະຈຳ ສປປ ລາວ 2019 ໃນສາຂາ SME ແລະ ນາມມະຍົດ “ນັກພັດທະນາດີເດັ່ນແຫ່ງຊາດ” ຈາກການຊ່ວຍເຫຼືອ ແລະ ພັດທະນາສັງຄົມທີ່ທ່ານໄດ້ຮັບທ່ານມີຄວາມພາກພູມໃຈແນວໃດ? ແລະ ປັດຈຸບັນທ່ານໄດ້ຮັບລາງວັນໃດແດ່ ແລະ ໄດ້ຮັບການຍ້ອງຍໍຈາກລັດຖະບານຈັກໃບ?
ຂ້າພະເຈົ້າມີຄວາມຮູ້ສຶກເປັນກຽດ ແລະ ພາກພູມໃຈທີ່ສຸດຜ່ານການເຮັດທຸລະກິດການຜະລິດມາຫຼາຍສິບປີ ຕົນເອງໄດ້ສ້າງຕັ້ງທຸລະກິດແບບຄອບຄົວ ແລະ ຍັງໄດ້ຮັກສາສິດເປັນເຈົ້າຂອງທຸລະກິດແບບຄອບຄົວຫຼາຍບ່ອນ, ສ້າງໃຫ້ຕົນໄດ້ມີໂອກາດ,ເງື່ອນໄຂຊ່ວຍເຫຼືອສັງຄົມມາໂດຍຕະຫຼອດ ຈຶ່ງເຮັດໃຫ້ຕົນໄດ້ຮັບການຍ້ອງຍໍສັນລະເສີນຫຼາຍໆຂັ້ນຈາກພັກລັດ ແລະ ອົງກອນຕ່າງໆ.
ຕົນເອງຖືວ່າການໄດ້ຮັບນາມມະຍົດອັນເປັນກຽດສັກສີ, ເປັນຄຸນງາມຄວາມດີ, ເປັນມູນມໍລະດົກໄວ້ໃຫ້ແກ່ຄອບຄົວວົງຕະກຸນຂອງຂ້າພະເຈົ້າຕະຫຼອດໄປ.
ເຫດຜົນ ແລະ ມາດຖານທີ່ໄດ້ຮັບລາງວັນທຸລະກິດຂະໜາດນ້ອຍ ແລະ ກາງດີເດັ່ນ ລາງວັນປະກອບສ່ວນຕໍ່ສັງຄົມຍ້ອນວ່າ:
ເນັ້ນພັດທະນາທຸລະກິດຄອບຄົວແບບຢືນຍົງ, ໃຫ້ຄວາມສຳຄັນກັບບຸກຄະລາກອນ, ຜະລິດສິນຄ້າໄດ້ຄຸນນະພາບ ແລະ ມາດຕະຖານ, ໃຫ້ຄວາມສຳຄັນໃນການປະກອບສ່ວນຊ່ວຍເຫຼືອສັງຄົມມາໂດຍຕະຫຼອດ, ເຊິ່ງຕົນເອງຜ່ານມາໄດ້ມີໂອກາດເຂົ້າມີສ່ວນຮ່ວມນຳອົງການຈັດຕັ້ງພັກ-ລັດຖະບານແກ້ໄຂຄວາມທຸກຍາກ ຂອງປະຊາຊົນ 2 ບ້ານຄື: ບ້ານຄໍາປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງ ສະຫວັນນະເຂດ, ໂດຍຕົນເອງ ແລະ ທີມງານໄດ້ສຸມທຶນ ເຮື່ອແຮງ, ໃຫ້ການຊ່ວຍເຫຼືອດ້ວຍຄວາມບໍລິສຸດໃຈ, ຈິງໃຈຕໍ່ປະຊາຊົນ ແລະ ການຈັດຕັ້ງ,ບໍ່ໄດ້ມີສິ່ງໃດແອບແຝງທັງສິ້ນ ພຶດຕິກໍາຂອງຕົນເຮັດຜ່ານມານັ້ນໄດ້ສະແດງອອກເຖິງຕົວຕົນຂອງຂ້າພະເຈົ້າເອງ.
ນອກຈາກລາງວັນອາຊຽນປະຈຳປີ 2019 ຜ່ານມາ, ຂ້າພະເຈົ້າຍັງໄດ້ຮັບຫຼຽນພັດທະນາດີເດັ່ນແຫ່ງຊາດໃນປີ 2015 ພ້ອມນັ້ນຍັງໄດ້ຮັບການຍ້ອງຍໍຫຼາຍຂັ້ນບໍ່ວ່າຈະເປັນຫຼຽນພັດທະນາຕ່າງໆຊັ້ນ1-2-3 ແລະ ທ່ານຍັງໃຫ້ຮູ້ຕື່ມວ່າໃນວັນທີ 2 ພະຈິກ 2019 ນີ້ ທ່ານຍັງຈະໄດ້ເດີນທາງໄປຮັບລາງວັນ ASIAN BUSSINESS AWARDS (ABA) 2019 ຢູ່ບາງກອກ ປະເທດໄທເປັນເຈົ້າພາບຕື່ມອີກ ແລະ ໃນວັນທີ 8 ພະຈິກ 2019 ທີ່ເນປີດໍ ມຽນມາຮັບລາງວັນ “ນັກພັດທະນາຊົນນະບົດໃນການລຶບລ້າງຄວາມທຸກຍາກຂອງປະຊາຊົນ”.
ຄວາມພູມໃຈຂອງທ່ານທີ່ໄດ້ມີສ່ວນຮ່ວມໃນການຊ່ວຍເຫຼືອປະຊາຊົນຜູ້ທຸກຍາກ, ໃຫ້ສາມາດເພິ່ງຕົນເອງໄດ້?
ຂ້າພະເຈົ້າມີຄວາມຮູ້ສຶກພາກພູມໃຈທີ່ມີສ່ວນຮ່ວມນຳອົງການຈັດຕັ້ງຂອງພັກ – ລັດຖະບານ ແລະຂໍຢັ້ງຢືນອີກເທື່ອໜຶ່ງວ່າ:
ການມີສ່ວນຮ່ວມໃນການຊ່ວຍເຫຼືອປະຊາຊົນຂອງຂ້າພະເຈົ້າໃນຄັ້ງນີ້ແມ່ນເຮັດດ້ວຍຄວາມຈິງໃຈ, ບໍລິສຸດໃຈ, ບໍ່ມີສິ່ງແອບແຝງໃດໆທັງນັ້ນ, ສິ່ງທີ່ຂ້າພະເຈົ້າເຮັດມານັ້ນມັນໄດ້ເກີດເປັນຮູບປະທຳ, ພຶດທິກຳດັ່ງກ່າວເປັນການອະທິບາຍເຖິງຕົວຕົນຂອງຂ້າພະເຈົ້າ, ພວກເຮົາໄດ້ພ້ອມກັນເຮັດບັນລຸເປົ້າໝາຍ ແລະ ຄາດໝາຍຕາມກຳນົດເວລາໃນ 18 ໜ້າວຽກທີ່ໄດ້ເຊັນໄວ້.
ໃນຄວາມຮູ້ສຶກ ແລະ ຄວາມເຂົ້າໃຈທີ່ຂ້າພະເຈົ້າໄດ້ເຮັດຜ່ານມາ 3 ປີ ເຫັນປະຊາຊົນມີການປ່ຽນແປງແທ້, ທາງດ້ານແນວຄວາມຄິດ ແລະ ການດຳລົງຊີວິດດີຂຶ້ນ, ໃນຕໍ່ໜ້າກ້າວໄປເຖິງບັນລຸເປົ້າໝາຍມາດຕະຖານພົ້ນທຸກ, ຄຳວ່າ: “ຫາກິນແບບເລື່ອນລອຍ” ( ຂໍທານ) ຂ້າພະເຈົ້າຄິດວ່າຈະກາຍເປັນອະດີດ…..
ທ່ານມີຄະຕິແນວໃດ ໃນການເຮັດວຽກເພື່ອໃຫ້ເປັນບົດຮຽນໃຫ້ກັບນັກທຸລະກິດຜູ້ໜຸ່ມນ້ອຍ?
ສໍາລັບຄະຕິປະຈໍາໃຈຂອງຂ້າພະເຈົ້າແມ່ນ:
- ຕ້ອງມີຄວາມຢາກໃນສິ່ງທີ່ເຮົາມັກ.
- ເຮັດຫຍັງກໍຕາມຕ້ອງເນັ້ນເລື່ອງຄຸນນະພາບແລະຖືເອົາປະສິດທິຜົນເປັນຫຼັກ.
- ຕ້ອງສູ້ຊົນເພື່ອໃຫ້ມີສິດໄດ້ເປັນເຈົ້າຂອງຄະຕີປະຈຳໃຈຕົນ: ຂະຫຍັນ, ອົດທົນ, ປະຢັດ, ສັດຊື່..
ແຫຼ່ງຂໍ້ມູນ: ເວບໄຊວາລະສານທາເກັດ
