ທ້າວກຸບວດເປັນເນນ ຫລືຈົວ ຢູ່ວັດບ້ານຫວ້ຍ, ເມືອງໂຂງ ແຂວງສີທັນດອນ ເມື່ອອາຍຸ 12 ປີ. ເມື່ອອາຍຸໄດ້ 19 ປີ ມາບວດເປັນຄູບາຢູ່ວັດກາງໂຂງ (ວັດພວງແກ້ວ).
ເຈົ້າອາວາດວັດກາງໂຂງເວລານັ້ນ ແມ່ນພຣະຫລັກຄຳຫນູເປັນເຈົ້າອາວາດໃຫຍ່ ແຕ່ເນື່ອງຈາກຊະລາພາບ ຈື່ງ
ໄດ້ມອບຫມາຍໃຫ້ພຣະຫລັກຄຳ ກັນຫາ ສຸວັນນະຈູມຄຳວ່າການແທນ.
ເຈົ້າເມືອງໆໂຂງ ເວລານັ້ນແມ່ນ ພະນະທ່ານ ກຸ ອະໄພ ເປັນເຈົ້າເມືອງ.
ພະນະທ່ານ ກຸ ອະໄພ ແມ່ນລູກຊາຍຂອງຍາຫມ່ອມພວງແກ້ວ.ຍາຫມ່ອມພວງແກ້ວແມ່ນຜູ້ມີຄວາມເຫລື້ອມໃສໃນພຣະພຸດທະສາສະໜາ ຈຶ່ງສະລະທຶນນະຊັບສ່ວນຕົວສ້າງ ແລະບຸລະນະວັດກາງໂຂງ ແລ້ວຈຶ່ງໃສ່ຊື່ວ່າ: ວັດກາງໂຂງພວງແກ້ວ ອະຣຸໂນທັຍວໍຣະວິຫານ.
ເນນ ກຸສຸວັນນະເມທີ ບວດເປັນຄູບາ ຢູ່ວັດກາງໂຂງໂດຍແມ່ນພຣະຫລັກຄຳ ກັນຫາ ສຸວັນນະຈູມຄຳເປັນພຣະ
ອຸປັດຊາ.
(ສຸວັນນະຈູມຄຳ ມີເຊື້ອສາຍກະສັດມາຈາກທາງຝັ່ງເບື້ອງຂະເຫມນ ແຕ່ມີຄວາມຂັດແຍ່ງເລື່ອງລາຊະບັນລັງ ຈື່ງອົບພະຍົບຄອບຄົວມາເປັນໄພ່ຢູ່ເມືອງໂຂງ ແລ້ວຈື່ງຕັ້ງນາມສະກຸນວ່າ: ສຸວັນນະຈູມຄຳ).
ຍາຫມ່ອມ ຫລືຍາແມ່ພວງແກ້ວເຫັນວ່າ ຄູບາ ກຸ ສຸວັນນະເມທີ ມີຄວາມສະຫລຽວສະຫລາດ ແລະມີໄຫວພິກປະຕິພານສູງ ຈື່ງສະເຫນີໃຫ້ໄປຮຽນຕໍ່ທີ່ປະເທດໄທຍ໌ ພ້ອມດຽວກັນນັ້ນທັງພຣະຫລັກຄຳທັງສອງທ່ານກໍຊຸກຍູ້ເຫັນດີຕາມຍາແມ່ພວງແກ້ວ.
ຄູບາ ກຸ ສຸວັນນະເມທີ ເລືອກໄປຮຽນທີ່ພະນົມເປັນ ປະເທດກຳປູເຈັຍ.
ຈະແມ່ນໄປປະເທດໄທຍ໌ ຫລືປະເທດກຳປູເຈັຍ ກໍລ້ວນແຕ່ແມ່ນດ້ວຍທຶນນະຊັບຂອງແມ່ພວງແກ້ວ, ພຣະອາ ຈານຫລັກຄຳ ຫນູ ແລະພຣະອາຈານຫລັກຄຳ ສຸວັນນະຈູມຄຳທັງສິ້ນ.
ເມື່ອສຳເລັດການສຶກສາ ໄດ້ຮັບປະກາດສະນິຍະບັດຊັ້ນສູງ ສາຂາວິຊາພຸທທະປັດຊະຍາ ແລະອັກສອນສາດ (ພາ ສາປາລີ ແລະມະຄົດ) ເວລານັ້ນເພິ່ນທຽບຊັ້ນໃຫ້ເປັນມະຫາເກົ້າປະໂຫຍກ ແລະພຣະສົງລາວເປັນລຸ້ນທຳອິດທີ່ໄດ້ມານຳກັນຈາກປະເທດກຳປູເຈຍ ຊື່ງມີສະເດັດເຈົ້າເພັດຊະຣາດ ແລະພຣະເຈົ້າຊີວິດແຫ່ງປະເທດກຳປູເຈຍເປັນຜູ້ມອບ ແລະຢັ້ງຢືນຜົນສຳເລັດຂອງຄະນະສົງລາວ ໃນຄັ້ງປະຖົມມະເລີກນີ້ຢ່າງເປັນທາງການ.
ມະຫາ ກຸ ສຸວັນນະເມທີ ບາດກ້າວເດີນທຳອິດຂອງຊີວິດ ເມື່ອມາເຖີງປິຕຸພູມດອນໂຂງ ໂດຍສະເພາະຢູ່ວັດກາງໂຂງແຂວງ ສີທັນດອນ ທ່ານຄິດເຖິງເລື່ອງໄດ້ຄວາມຮູ້ມາແລ້ວຈະເຮັດແນວໃດ? ເພື່ອແບ່ງປັນໃຫ້ຄົນອື່ນໄດ້ຄວາມຮູ້ນຳ, ຄູບາ ກຸ ໄດ້ສະເຫນີແຜນການສ້າງໂຮງຮຽນພຣະປາລີຍັດຕິທັມຂຶ້ນ ຕໍ່ພຣະຫລັກຄຳ ແລະຍາດໂຍມຜູ້ທີ່ເຫລື້ອມໃສໃຈສັດທາໃນພຣະພຸທທະສາສະຫນາ.
ໃນນັ້ນທາງຝ່າຍສົງໂດຍມີພຣະຫລັກຄຳທັງສອງທ່ານ ແລະຝ່າຍຄະຣາວາດ ອັນມີແມ່ພວງແກ້ວ ແລະເຈົ້າເມືອງກຸອະໄພເປັນຫລັກ ພ້ອມດ້ວຍຍາດໂຍມພໍ່ແມ່ປະຊາຊົນໄດ້ພ້ອມກັນ ສ້າງໂຮງຮຽນພຣະປາລີຍັດຕິທຳສົ່ງຂຶ້ນ ແລະສຳເລັດໃນມື້ ໙ ຄຳ່ກົງກັບວັນຈັນທີ ໒໘ ເປັນມື້ສະ ຫຼອງ.
ໃນມື້ດັ່ງກ່າວນີ້ ຍັງເປັນການຫົດສົງເຖຣາພິເສກອີກດ້ວຍຄືຫົດສົງຄູບາ ກຸ ສຸວັນນະເມທີ ຂຶ້ນເປັນພຣະອາຈານ ມະຫາກຸ ມະຫາເກົ້າປະໂຫຍກອີກດ້ວຍ.
ຈາກຜົນສຳເລັດດັ່ງກ່າວ ເພື່ອຕອບສະຫນອງພຣະສົງ ທີ່ມີຄວາມຮູ້ຄວາມສາມາດໃນການເຜີຍແຜ່ພຸດທະສາ
ສະຫນາໃນເຂດພາກໃຕ້ໃຫ້ທົ່ວເຖີງ ແລະຕອບສະຫນອງ ໄດ້ຄວາມມຸ່ງມາດປາດຖະຫນາຂອງພຣະສົງ ທີ່ຕ້ອງ ການຢາກຮຽນສູງຂຶ້ນໄປເລື້ອຍໆ.
ພຣະອາຈານມະຫາ ກຸ ສຸວັນນະເມທີ ຈຶ່ງໃດ້ເຮັດຫນັງສືຂຶ້ນຫາສັງຄະນາຍົກ, ສົມເດັດພຣະສັງຄະຣາຊ ແລະລັດຖະບານ ເພື່ອສ້າງໂຮງຮຽນພຣະປາລີຍັດຕິທັມແຫ່ງທີ່ສອງໃນພຣະຣາຊອານາຈັກລາວຂຶ້ນ ແລະກໍໄດ້ສຳເລັດຕາມຄວາມມຸ່ງມາດປາດຖະຫນາ ຄືໂຮງຮຽນພຣະປາລີຍັດຕິທັມແຫ່ງທີສອງ ໄດ້ເກີດຂຶ້ນທີ່ວັດຫລວງເມືອງປາກເຊ ໂດຍແມ່ນພຣະອາຈານມະຫາ ກຸສຸວັນນະເມທີ ໄດ້ເປັນຜູ້ອຳນວຍການໃຫຍ່ຂອງໂຮງຮຽນດັ່ງກ່າວ.
ຈາກຄວາມມານະອົດທົນ ແລະຄວາມມີສະຕິສະຫລຽວສະຫລາດ ພຣະອາຈານ ມະຫາ ກຸ ຈຶ່ງໃດ້ສ້າງນັກທັມ
ກາຍມາເປັນມະຫາ 1-2-3-4ໂຫຍກ ແຜ່ອອກໄປຫລາຍໃນທົ່ວປະເທດ.
ເຖິງຈະຜະລິດລູກສິດລູກຫາອອກຫລາຍປານໃດກໍ່ຕາມ ນະທີ່ໂຮງຮຽນພຣະປາລີຍັດຕິທັມແຫ່ງນະຄອນປາກເຊແຕ່ກໍບໍ່ພຽງພໍກັບຄວາມຮຽກຮ້ອງຕ້ອງການໃນທົ່ວປະເທດ ສະນັ້ນພຣະອາຈານມະຫາກຸຈື່ງສ້າງໂຮງຮຽນຂື້ນອີກແຫ່ງທີ່ ໓ ທີ່ວັດຈັນນະຄອນຫລວງວຽງຈັນ, ເພື່ອຕອບສະຫນອງໃຫ້ແກ່ພຣະສົງອົງຄະເຈົ້າ ທີ່ຕ້ອງການຮຽນມາ ຈາກເຂດແຂວງທາງພາກເຫນືອ ແລະຝາກນຳ້ຂອງກຳ້ຂວາ.
ໃນເວລາຕໍ່ມາ ໂຮງຮຽນພຣະປາລີຍັດຕິທັມກາງໂຂງ ຕອບສະຫນອງຕໍ່ຄວາມຕ້ອງການຂອງລູກຫລານຊາວເກາະດອນຕ່າງໆບໍ່ພຽງພໍ, ນີ້ກໍແມ່ນດ້ວຍສະຕິປັນຍາ ແລະແຮງສັດທາ ແລະເຫລື້ອມໃສຕໍ່ຄວາມບໍລິສຸດຜຸດຜ່ອງຂອງພຣະອາຈານມະຫາກຸ ສຸວັນນະເມທີ ໂຮງຮຽນພຣະປາລີຍັດຕິທັມແຫ່ງທີສີ່ ແຫ່ງສຸດທ້າຍໃນຊີວິດຂອງພຣະອາຈານມະຫາກຸ ເປັນຜູ້ນຳພາກໍ່ສ້າງ ແລະສຳເລັດຈົນໄດ້ເປີດຮຳ່ຮຽນ ແລະສິດສອນຢ່າງຕໍ່ເນື່ອງເລື້ອຍໆມາ ຈົນເຖິງວາລະແຫ່ງການກຸດຫຽ້ນໄປຕາມການເວລາແຫ່ງສັດຈະທຳຂອງມະນຸດໂລກ.
ຈາກຈຸດເລີ່ມຕົ້ນຂອງສີ່ໂຮງຮຽນນີ້ ຈຶ່ງໄດ້ແຜ່ຂະຫຍາຍອອກໄປທົ່ວພຣະຣາຊອານາຈັກລາວໃນເວລາຕໍ່ມາຈົນເທົ້າທຸກວັນນີ້.
(ລາຍລະອຽດທຸກຂັ້ນຕອນ ແລະການເວລາຕ່າງໆ ຂໍໃຫ້ທ່ານລໍຖ້າອ່ານປື້ມອັດຕະຊີວະປະຫວັດຂອງພະນະທ່ານມະຫາກຸສຸວັນນະເມທີ ບູລຸດຜູ້ມີໄຟແຫ່ງຄວາມເປັນທັມ ຊື່ງຂຽນ, ເກັບກຳ, ຮຽບຮຽງໂດຍທອງສະຫວັນ ວົງຫາເທບ).
ເຟສບຸກ:
