ກໍລະນີມີສື່ສັງຄົມອອນລາຍອອກຂ່າວຜ່ານທາງເຟສບຸກເມື່ອບໍ່ດົນມານີ້ວ່າ:
ມີນັກທ່ອງທ່ຽວຕ່າງປະເທດຈໍານວນໜຶ່ງເດີນທາງມາຈາກນະຄອນຫລວງລອນດອນ ປະເທດອັງກິດ ດ້ວຍສາຍການບີນຫວຽດນາມ, ແລ້ວມາພັກຢູ່ຫວຽດນາມ ແລະອີກຈໍານວນ 5 ຄົນ ເດີນທາງມາສະໜາມບີນສາກົນຫລວງພະບາງ ນັ້ນແມ່ນຄວາມຈິງ , ແຕ່ໃນຈໍານວນທີ່ເດີນທາງມາເຖິງສະໜາມບິນສາກົນ ຫລວງພະບາງ ແລ້ວກວດພົບວ່າເປັນພະຍາດໂກວິດ 19 ນັ້ນ ໃນກໍລະນີນີ້ບໍ່ແມ່ນຄວາມຈິງ ແຕ່ຢ່າງໃດ.
ຈຶ່ງຮຽກຮ້ອງໃຫ້ພາກສ່ວນອອກຂ່າວລັກສະນະນີ້ ຢຸດສ້າງຄວາມບໍ່ສະຫງົບ ໂດຍບໍ່ສຶກສາຂໍ້ມູນທີ່ລະອຽດແລ້ວຈື່ງອອກຂ່າວ ເພາະຈະເຮັດສັງຄົມເກີດຄວາມສັບສົນ, ແຕກຕື່ນ ແລະຂາດຄວາມເຊື່ອໝັ້ນຕໍ່ການປະຕິບັດໜ້າທີ່ຂອງທາງການລາວ ພ້ອມທັງຢັ້ງຢືນວ່າ: ປັດຈຸບັນ ລາວ ຍັງບໍ່ພົບກໍລະນີຜູ້ຕິດເຊື້ອພະຍາດໂຄວີດ19 ເທື່ອ.
ດຣ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງ ສາທາລະນະສຸກ ໄດ້ຖະແຫລງຕໍ່ສື່ມວນຊົນໃນຕອນແລງ ວັນທີ 12 ມີນາ 2020 ຢູ່ກະຊວງສາທາລະນະສຸກ ກ່ຽວກັບວຽກງານປ້ອງກັນ ແລະສະກັດກັ້ນການລະບາດຂອງພະຍາດໂຄວິດ19 ວ່າ:
ຕໍ່ເຫດການນີ້ ເຈົ້າໜ້າທີ່ກ່ຽວຂ້ອງ ຂອງລາວໄດ້ປະສານສົມທົບກັບ ເຈົ້າໜ້າທີ່ກ່ຽວຂ້ອງຂອງຫວຽດນາມ ແລະໄດ້ຮັບຄໍາຕອບວ່າ ມີ 2 ຄົນ ຢູ່ໃນຖ້ຽວບີນດັ່ງກ່າວ ໄດ້ເດີນທາງໄປແຂວງຫລວງພະບາງ ແທ້ ພາຍຫລັງເດີນ ທາງເຖີງສະໜາມບີນສາກົນ ແຂວງຫລວງພະບາງ ແລ້ວ ເຈົ້າໜ້າທີ່ຂອງລາວ ກໍ່ໄດ້ກວດຫາເຊື້ອພະຍາດ ຈາກບຸກຄົນດັ່ງກ່າວແລ້ວແຕ່ບໍ່ພົບວ່າເປັນພະຍາດໂຄວິດແຕ່ຢ່າງໃດ.
ປັດຈຸບັນ ເຈົ້າໜ້າທີ່ກ່ຽວຂ້ອງ ຂອງລາວ ຍັງຕິດຕາມເຝົ້າລະວັງບຸກຄົນຈໍານວນນີ້ຢ່າງໃກ້ຊິດຈົນກວ່າຈະຄົບກໍານົດເຝົ້າລະວັງ 14 ວັນ.
ສະນັ້ນ, ຈຶ່ງຮຽກຮ້ອງໃຫ້ສັງຄົມຢ່າຟ້າວແຕກຕື່ນຕໍ່ເຫດການທີ່ເກີດຂື້ນ ແລະເຊື່ອໝັ້ນໃນການປະຕິບັດໜ້າທີ່ ຂອງເຈົ້າໜ້າທີ່ກ່ຽວຂ້ອງ ຂອງລາວ ເພາະການກວດຫາເຊື້ອພະຍາດ ລວມເຖີງການປະຕິບັດວຽກງານອື່ນໆແມ່ນ ປະຕິບັດຕາມມາດຖານສາກົນກໍ່ຄືອົງການ ອະນາໄມໂລກ ວາງອອກທຸກຂັ້ນຕອນແລະບໍ່ມີການປົກປິດຂໍ້ມູນຄວາມຈີງແຕ່ຢ່າງໃດ.
ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃຫ້ຮູ້ຕື່ມວ່າ: ກໍລະນີທີ່ມີນັກສຶກສາລາວ ທີ່ກັບມາຈາກຫວຽດນາມ ຈໍານວນ 6 ຄົນ ແລະ 2 ຄົນມີອາການໄຂ້ເຂົ້າກັບນິຍາມເປັນພະຍາດໂຄວິດ19 ແລະມີຊາວຫວຽດນາມ ຊື່ນາງ ໝາຍ ເຮັດວຽກຢູ່ສວນຢາງພາລາ ເມືອງບາຈຽງຈະເລີນສຸກ ແຂວງຈໍາປາສັກ ເດີນທາງກັບຈາກຫວຽດນາມ ແລ້ວຕິດພະຍາດໂຄວິດ ມາແຕ່ຫວຽດນາມ ນັ້ນບໍ່ແມ່ນຄວາມຈີງເຊັ່ນດຽວກັນ, ນັ້ນເປັນພຽງການສ້າງຄວາມບໍ່ສະຫງົບຂອງກຸ່ມຄົນບໍ່ຫວັງດີຈໍານວນໜຶ່ງທີ່ຫວັງຈະມ້າງເພທໍາລາຍລະບອບໃໝ່ ເຮັດໃຫ້ສັງຄົມບໍ່ເຊື່ອໝັ້ນຕໍ່ການປະຕິບັດໜ້າທີ່ຂອງລາວ ເຊີ່ງປັດຈຸບັນ ບຸກຄົນຈໍານວນນີ້ໄດ້ຮັບການກວດຫາເຊື້ອພະຍາດໂຄວິດ19 ແລ້ວ ແລະບໍ່ພົບວ່າເປັນພະຍາດນີ້ແຕ່ຢ່າງໃດ.
ໂອກາດນີ້ ດຣ ລັດຕະໄຊ ເພັດສຸວັນຮຽກຮ້ອງໃຫ້ປະຊາຊົນລາວບັນດາເຜົ່າທຸກຄົນ ຫລີກລ່ຽງການເດີນທາງໄປປະເທດທີ່ມີການແຜ່ລະບາດຂອງພະຍາດໂຄວິດ19 ໂດຍສະເພາະ ປະເທດໃກ້ຄຽງ, ລ້າງມືໃສ່ສະບູ ແລະນໍ້າສະອາດ ຫລື ເຈວລ້າງມືເປັນປະຈໍາ, ເມື່ອມີອາການໄອ ແລະ ຈາມ ຕ້ອງປິດປາກ ແລະດັງດ້ວຍເຈ້ຍອານາໄມ ຫລື ກົກແຂນ,ຈາກນັ້ນຖີ້ມເຈ້ຍອານາໄມລົງຖັງຂີ້ເຫຍື້ອທັນທີ, ຫລີກລ່ຽງການສໍາຜັດໃກ້ຊິດກັບຄົນທີ່ມີອາການໄຂ້, ໄອ, ເຈັບຄໍ ຫລື ຫາຍໃຈຍາກ ຄວນຫລີກລ່ຽງການສຳຜັດຕາ, ດັງ ແລະປາກ ຖ້າບໍ່ໄດ້ລ້າງມື ຫລີກລ່ຽງການສໍາຜັດກັບສັດທີ່ເຫງົາ ຫລື ສັດບໍ່ມີເຈົ້າຂອງ ໂດຍສະເພາະແມ່ນຢູ່ຕະຫລາດສົດ.
ຖ້າຈໍາເປັນແມ່ນຕ້ອງລ້າງມືໃຫ້ສະອາດທຸກຄັ້ງພາຍຫລັງສໍາຜັດສັດຕ່າງໆ, ຫລີກລ່ຽງການເດີນທາງໄປສະຖານທີ່ແອອັດ, ການສໍາຜັດກັບບຸກຄົນອື່ນໆ ແລະບໍ່ຄວນໄປເຮັດວຽກ ຫລື ໄປໂຮງຮຽນ ຖ້າທ່ານຮູ້ສຶກບໍ່ສະບາຍ, ຖ້າມີອາການ ໄຂ້, ໄອ, ເຈັບຄໍ ຫາຍໃຈຍາກ ຕ້ອງເບີ່ງແຍງບຸກຄົນ ທີ່ມີອາການສະແດງອອກດັ່ງກ່າວ, ຄວນໃສ່ຜ້າອັດປາກ, ດັງແລະຕ້ອງຮັບປະກັນວ່າຕົນເອງຮູ້ວິທີການໃສ່ ແລະຖີ້ມຜ້າອັດປາກ-ດັງຢ່າງຖືກຕ້ອງ, ຫາກມີອາການໄຂ້, ໄອ, ເຈັບຄໍ ຫລື ຫາຍໃຈຍາກ ໃຫ້ໂທຫາ ໂທລະສັບສາຍດ່ວນ 166 ຕະຫລອດ 24 ຊົ່ວໂມງ.
ແຫຼ່ງຂໍ້ມູນ: ໂດຍ: ເດດອາລຸນ ແກ້ວວິໄລ, ຂປລ