ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການໃນວັນທີ 19 ເດືອນມີນາ ນີ້ວ່າ: ເຫັນດີໃຫ້ໂຈະກິດຈະກຳຈຳນວນໜຶ່ງໃນການສະເຫຼີມສະຫຼອງບຸນປີໃໝ່ລາວ ທົ່ວປະເທດ.
ບັນດາກິດຈະກໍາທີ່ໃຫ້ໂຈະລວມມີ: ການຈັດງານປະກວດນາງສັງຂານ, ການຈັດງານຕະຫຼາດນັດມວນຊົນ, ການຫົດນໍ້າຕາມຖະໜົນຫົນທາງ, ການຕົບພະທາດຊາຍ, ການແຫ່ວໍທີ່ເປັນຂະບວນມວນຊົນ ແລະ ອື່ນໆທີ່ມີມວນຊົນເຂົ້າຮ່ວມຢ່າງຫຼວງຫຼາຍ ເພາະຈະມີຄວາມ ສ່ຽງ ແລະ ຄວາມຫຍຸ້ງຍາກໃນການປ້ອງກັນການລະບາດ ຂອງພະຍາດ COVID-19.
ການສະເຫຼີມສະຫຼອງບຸນປີໃໝ່ລາວປີນີ້ຈະມີພຽງກິດຈະກຳທີ່ກ່ຽວພັນເຖິງຮີດຄອງປະເພນີອັນດີງາມເຊັ່ນ:
ການບາສີສູ່ຂວັນໃນຄອບຄົວ ແລະ ການນຳເອົາພະລົງເພື່ອຫົດສົງ, ໃນແຕ່ລະວັດຕ້ອງມີເຈົ້າໜ້າທີ່ຄວບຄຸມເພື່ອຈຳກັດຄົນບໍ່ໃຫ້ແອອັດຫຼາຍ ໂດຍໃຫ້ເຂົ້າຫົດສົງພະເປັນຈຸ ເຊິ່ງແຕ່ລະຈຸບໍ່ໃຫ້ເກີດ 40 ຄົນ.
ແຈ້ງການຍັງໄດ້ລະບຸຕື່ມວ່າ:
ເນື່ອງຈາກວ່າ ບຸນປີໃໝ່ປີນີ້ແມ່ນກົງກັບ ວັນທີ 13 ຫາ ວັນທີ 16 ເດືອນເມສາ ສະນັ້ນເພື່ອຮັບປະກັນຄວາມຕໍ່ເນື່ອງຂອງວຽກງານ ຈຶ່ງເຫັນດີໃຫ້ກຳນົດເອົາວັນທີ 11 ເມສາ ເຊິ່ງກົງກັບວັນເສົາ ເປັນມື້ເຮັດວຽກທາງລັດຖະການ ເພື່ອທົດແທນການພັກວຽກໃນວັນທີ 17 ເມສາ ເຊິ່ງກົງກັບວັນສຸກ.
ໃນຂະນະດຽວກັນ ພາກສ່ວນກ່ຽວຂ້ອງຕ້ອງເອົາໃຈໃສ່ຊີ້ນຳການຜະລິດສະບຽງອາຫານ, ການສະໜອງເຄື່ອງອຸປະໂພກ ແລະ ບໍລິໂພກໃຫ້ພຽງພໍກັບຄວາມຕ້ອງການຂອງສັງຄົມ ລວມທັງຕິດຕາມ ແລະ ຄຸ້ມຄອງລາຄາສິນຄ້າໃນທ້ອງຕະຫຼາດ ເພື່ອບໍ່ໃຫ້ມີການສວຍໂອກາດຂຶ້ນລາຄາ, ກັກຕຸນສິນຄ້າ ແລະ ສະບຽງອາຫານ.
ແຫຼ່ງຂໍ້ມູນ: ຂ່າວ: ສີລັດດາ, ວຽງຈັນທາຍ