ຕົ້ນປີນີ້, ເດັກຍິງຈຳນວນປະມານ 360.000 ຄົນ ທີ່ມີອາຍຸລະຫວ່າງ 10-14 ປີ ໂດຍບໍ່ຈຳແນກສະຖານະການເຂົ້າຮຽນ ໄດ້ຮັບການສັກວັກແຊັງ ກັນມະເຮັງປາກມົດລູກ,
ເຊິ່ງເປັນວັກແຊັງ ປ້ອງກັນເດັກຍິງ ຈາກການເປັນພະຍາດມະເຮັງປາກມົດລູກ ເມື່ອພວກເຂົາເຕີບໃຫຍ່ ເປັນແມ່ຍິງເຕັມໂຕ ແມ່ນໄດ້ຮັບການບັນຈຸເຂົ້າໃນຕາຕະລາງວັກແຊັງ ກັນພະຍາດແຫ່ງຊາດ.
ວັກແຊັງກັນພະຍາດດັ່ງກ່າວ ແມ່ນໄດ້ຮັບການສະໜອງທຶນ ຈາກອົງການ ກາວີ-ພັນທະມິດວັກແຊັງ ແລະ ລັດຖະບານແຫ່ງ ສປປ ລາວ.
ພ້ອມກັນນີ້ ອົງການອະນາໄມໂລກ, ອົງການອຸຍນີເຊັບ ແລະ ຄູ່ຮ່ວມພັດທະນາອື່ນໆ ໄດ້ໃຫ້ການສະໜັບສະໜຸນ ກະຊວງສາທາລະນະສຸກ ແລະ ກະຊວງສຶກສາທິການ ແລະ ກິລາ ໃນການຈັດຕັ້ງປະຕິບັດ.
ໃນຂະນະທີ່ວຽກງານ ໃຫ້ບໍລິການວັກແຊັງກັນພະຍາດ ກຳລັງມີບາດກ້າວທີ່ດີ, ຄວາມຕ້ອງການໃນການຮັບວັກແຊັງກັນພະຍາດຍັງຕໍ່າ ໃນບາງເຂດ ຂອງ ສປປ ລາວ ໂດຍສະເພາະໃນເຂດທີ່ມີຊຸມຊົນ ທີ່ເປັນກຸ່ມຊົນເຜົ່າ ແລະ ເຂດຫ່າງໄກສອກຫລີກ ເຊິ່ງຄວາມຮັບຮູ້ຕໍ່ກັບຜົນປະໂຫຍດ ຂອງການວັກແຊັງກັນພະຍາດຍັງຕໍ່າ.
ທ່ານ ດຣ ຮາເວີດ ໂຊເບລ ຮັກສາການ ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ໄດ້ໃຫ້ຮູ້ຫວ່າງບໍ່ດົນນີ້ວ່າ:
ອົງການອະນາໄມໂລກ ກຳລັງເຮັດວຽກຢ່າງ ໃກ້ຊິດກັບ ສະຖານທີ່ບໍລິການ ດ້ານສຸຂະພາບ, ຜູ້ນຳບ້ານ ແລະ ອາສາສະໝັກສຸຂະພາບບ້ານ ແນ່ໃສ່ເພີ່ມຈຳນວນການຮັບວັກ ແຊັງກັນພະຍາດໃນເມືອງ ທີ່ມີຈຳນວນການສັກວັກແຊັງ ກັນພະຍາດຍັງຕໍ່າ.
ເຊິ່ງພວກເຮົາ ຈະສາມາດເຜີຍແຜ່ຂໍ້ມູນທີ່ວ່າ “ວັກແຊັງໄດ້ຜົນ ກັນພະຍາດໃຫ້ທຸກຄົນ ໄດ້ຢາກັນພະຍາດ ກັນໄດ້ທຸກຄົນ” ແລະ ສະໜອງໂອກາດຢ່າງເທົ່າທຽມ ໃນການເຂົ້າເຖິງວັກແຊັງ ກັນພະຍາດເຖິງແມ່ນວ່າ ຈະມີການ ລະ ບາດ ຂອງພະຍາດໂຄວິດ -19 ກໍຕາມ.
ແຫຼ່ງຂໍ້ມູນ: ຂປລ