ພາກເອກະຊົນ! ຈັດກິດຈະກຳ “ສັກລຸ້ນໂຊກ” ປຸກລະດົມປະຊາຊົນໄປສັກວັກຊີນ

ບໍລິສັດ ຟ້າໃຫຍ່ ມີເດຍ ຫຼື Bigblue agency Laos ໄດ້ຈັດໂຄງການຮ່ວມກັບ InsideLaos ໂດຍມີວັດຖຸປະສົງເພື່ອປຸກລະດົມໃຫ້ປະຊາຊົນໃນ ສປປ ລາວ ໄປສັກວັກຊີນປ້ອງກັນໂຄວິດ-19

ທັງນີ້, ການສັກວັກຊີນປ້ອງກັນໂຄວິດ-19 ກໍ່ເພື່ອຈະເຮັດໃຫ້ການພູມຕ້ານທາຍໝູ່ (ຕາມຂໍ້ມູນທີ່ອີງມາຈາກ WHO / ກົມອະນາໄມໂລກ, ປະຊາກອນໃນແຕ່ລະປະເທດຕ້ອງໄດ້ສັກວັກຊີນຢ່າງໜ້ອຍ 70%)

ໂດຍຜູ້ທີ່ຮັບວັກຊີນແລ້ວສາມາດ ໄປຮ່ວມກິດຈະກຳ ກັບເພຈອິນໄຊລາວ ໂດຍການຖ່າຍຮູບຄູ່ກັບບັດຢັ້ງຢືນການສັກວັກຊີນ ແລ້ວໄປຄອມເມັ້ນໃນໂພສທີ່ເຮັດກິດຈະກຳ ໂດຍເພຈຈະມີການສຸ່ມຈັບຂໍ້ມູນຂອງຜູ້ຮ່ວມຫຼິ້ນກິດຈະກຳອາທິດລະລາງວັນ ລາງວັນລະ 500,000 ກີບ ເປັນເວລາ 12 ອາທິດ

ທ່ານ ສັນທະລັກ ຈ່າສານ ປະທານບໍລິສັດບິກບລູ ເອເຈນຊີ ກ່າວວ່າ “ພວກເຮົາມີຄວາມຕັ້ງໃຈ ທີ່ຈະນຳເງິນຂອງບໍລິສັດບາງສ່ວນ ມາໃຊ້ເພື່ອເປັນການຄືນທຶນສູ່ສັງຄົມ ໂດຍມອບໃຫ້ກັບ ຄົນທີ່ໄດ້ສັກວັກຊີນ ເພື່ອເປັນການເຊີນຊວນໃຫ້ ຄົນມາສັກວັກຊີນໃຫ້ຫຼາຍທີ່ສຸດໂຄງການນີ້ໄດ້ຮ່ວມມືກັບ ເພຈຂ່າວອິນໄຊລາວ ໃນການເຮັດກິດຈະກຳເພື່ອສັງຄົມດັ່ງກ່າວ ພວກເຮົາຫວັງວ່າ ປະຊາຊົນຄົນລາວເຮົາຈະເຫັນຄວາມສຳຄັນ ຂອງການສັກວັກຊີນເພີ່ມຫຼາຍຂຶ້ນ ແລະ ໃນສ່ວນອື່ນທີ່ເຮົາໄດ້ເຮັດໂຄງການນີ້ ຄື ພວກເຮົາໄດ້ມີການຂຶ້ນປ້າຍ ປຸກລະດົມເຊີນຊວນໃຫ້ມີການສັກວັກຊີນອີກດ້ວຍ ສຸດທ້າຍພວກເຮົາຫວັງວ່າ ໂຄງການດັ່ງກ່າວອາດຈະມີປະໂຫຍດຕໍ່ສັງຄົມບໍ່ຫຼາຍກໍໜ້ອຍ”

ແນວໃດກໍ່ຕາມ, ຫຼັງຈາກກິດຈະກຳນີ້ ໄດ້ເຜີຍແຜ່ອອກໄປ ກໍ່ເຫັນໄດ້ວ່າມີປະຊາຊົນມາຮ່ວມຫລີ້ນເປັນຈຳນວນຫຼາຍ