ໃນວັນທີ 1 ກັນຍາ 2022 ຢູ່ສູນຂໍ້ມູນຂ່າວ ສານການສຶກສາ ແລະ ກິລາ ໄດ້ຈັດພິທີເປີດສົກຮຽນໃໝ່ 2022-2023 ໃນທົ່ວປະເທດຢ່າງເປັນທາງການ ໂດຍການກ່າວເປີດພິທີຂອງທ່ານ ຮອງສາສະດາຈານ ດຣ. ພຸດ ສິມມາລາວົງ, ລັດຖະມົນຕີ ກະຊວງສຶກສາທິການ ແລະ ກິລາ.
ທ່ານ ພຸດ ສິມມາລາວົງ ມີຄຳເຫັນວ່າ: ສົກຮຽນ 2022-2023 ນີ້, ທົ່ວຂະແໜງສຶກສາ ແລະ ກິລາ ແມ່ນຈະໄດ້ສຸມໃສ່ປະຕິບັດແຜນພັດທະນາການສຶກສາ ແລະ ກິລາ 5 ປີຄັ້ງທີ IX (2021 2025) ໂດຍສະເພາະເສີມຂະຫຍາຍສິ່ງທີ່ພວກເຮົາເຮັດໄດ້ດີ ແລະ ແກ້ໄຂຂໍ້ຄົງຄ້າງໃນສົກຮຽນຜ່ານມາ ເປັນຕົ້ນແມ່ນອັດຕາການເຂົ້າຮຽນ, ຄຸນນະພາບການຮຽນ- ການສອນ ແລະ ຄຸນນະພາບຂອງຜູ້ຮຽນ.
ແນວໃດກໍຕາມ, ສົກຮຽນນີ້ ແມ່ນມີຄວາມສະດວກຫຼາຍດ້ານ ຖ້າທຽບກັບ 2 ສົກຮຽນທີ່ຜ່ານມາ ເຊິ່ງມີການລະບາດຂອງພະຍາດ ໂຄວິດ-19. ແຕ່ເມື່ອຫວນຄືນເບິ່ງປະຫວັດການສຶກສາແລ້ວ, ເຮົາຈະເຫັນວ່າການສຶກສາບໍ່ເຄີຍຢຸດຕິ ບໍ່ວ່າຈະຢູ່ໃນພາວະທີ່ສັງຄົມມີຄວາມສະດວກ ຫລື ຫຍຸ້ງຍາກ, ແຕ່ນັກຮຽນ-ນັກສຶກສາ ກໍຕ້ອງໄດ້ຮັບການສຶກສາຢ່າງຕໍ່ເນື່ອງ.
ນາງ ບາງເພັດ ສີປະເສີດ, ຄູສອນປະຖົມຊັ້ນ ປ1 ໂຮງຮຽນສິນໄຊ ກ່າວວ່າ, ປີນີ້ເປັນປີທີ່ພິເສດ ເຊິ່ງທາງໂຮງຮຽນໄດ້ມີການຈັດພິທີເປີດສົກຮຽນໃໝ່ ແລະ ໄດ້ເລີ່ມເປີດຮຽນເປັນປົກກະຕິແລ້ວ, ຊ່ວງເວລາພັກ ເຮັດໃຫ້ເຮົາມີເວລາກະກຽມຫຼາຍໆຢ່າງ, ທີ່ຜ່ານມາ ຊ່ວງເດືອນ 8 ທາງໂຮງຮຽນ ກໍຈະໄດ້ມີການກະກຽມອຸປະກອນ ການຮຽນ-ການສອນ, ການແຕ່ງບົດສອນໃຫ້ກັບນັກຮຽນ ຖືວ່າກຽມພ້ອມທຸກຢ່າງ ທີ່ຈະກັບມາເປີດສົກຮຽນໃນຄັ້ງນີ້.
ທ້າວ ສົມຫວັງ ອາຍຸ 9 ປີ, ນັກຮຽນຫ້ອງປໍ 4/2 ໂຮງຮຽນສິນໄຊ ເວົ້າວ່າ: ຮູ້ສຶກດີໃຈຫຼາຍ ທີ່ໄດ້ກັບມາເຂົ້າໂຮງຮຽນອີກຄັ້ງ ພໍ່ກັບແມ່ ໄດ້ກຽມປື້ມ ແລະ ຊຸດນັກຮຽນໃໝ່ໃຫ້, ດີໃຈທີ່ໄດ້ມາພົບໝູ່ອີກເທື່ອໜຶ່ງ, ຊ່ວງເວລາຢູ່ບ້ານ ບໍ່ໄດ້ມາໂຮງຮຽນເທື່ອ ພໍ່ແມ່ກໍຈະສອນພາສາອັງກິດໃຫ້ ນ້ອງເປັນຄົນມັກຮຽນ ວິຊາພາສາອັງກິດຫຼາຍ, ປີນີ້ນ້ອງມີຄວາມຕັ້ງໃຈວ່າ ຈະຕັ້ງໃຈຮຽນໃຫ້ຫຼາຍກວ່າເກົ່າ, ຈະຊ່ວຍເຫຼືອໝູ່ຄູ່ ແລະ ຈະເປັນຄົນຄຳຮູ້ ຂອງພໍ່ແມ່ ແລະ ອ້າຍ-ເອື້ອຍຄູ.
ສ່ວນນາງ ອາທິຕາ ຈັນທະວົງສັກ ນັກຮຽນຊັ້ນມໍ 4/1 ໂຮງຮຽນສິນໄຊ ກ່າວວ່າ ນ້ອງມີຄວາມຕື່ນເຕັ້ນຫຼາຍ ທີ່ໄດ້ກັບມາຮຽນເຊິ່ງໜ້າກັບຄູ ແລະ ໄດ້ມາຮຽນຮ່ວມກັບໝູ່ເພື່ອນອີກຄັ້ງ, ການກັບມາຮຽນຄັ້ງນີ້ ນ້ອງໄດ້ກະກຽມຫຼາຍໆຢ່າງ ບໍ່ວ່າຈະເປັນ: ປື້ມ, ປິກ, ສໍ ແລະຊຸດນັກຮຽນ ທີ່ສຳຄັນຄືກຽມຄວາມພ້ອມ ເພື່ອການຮຽນໃຫ້ຫຼາຍຂຶ້ນ.