ທ່ານ ດວງຕາ ສຸລີວົງ ເຈົ້າເມືອງຈັນທະບູລີ ໄດ້ໃຫ້ຮູ້ວ່າ: ການຈັດງານງານບຸນອອກພັນສາປະວໍລະນາ ຫຼື ບຸນຊ່ວງເຮືອ ປະຈໍາປີ 2022 ທີ່ທ່າວັດຈັນ ເມືອງຈັນທະບູລີນະຄອນຫຼວງວຽງຈັນ ແມ່ນຈະເນັ້ນຮັກສາ ແລະ ເສີມຂະຫຍາຍງານບຸນປະເພນີທີ່ເຄີຍສືບທອດກັນມາແຕ່ບູຮານ ແລະ ມີຫຼາກຫຼາຍກິດຈະກຳເພື່ອດຶງດູດຜູ້ເຂົ້າມາທ່ຽວຊົມ ໄລຍະເວລາ 4 ວັນ.
ສຳລັບກິດຈະກຳການເຄື່ອນໄຫວ ໃນງານບຸນອອກພັນສາປະວໍລະນາ ແລະ ບຸນຊ່ວງເຮືອຈະປະກອບມີ: ກິດຈະກຳທາງດ້ານສາດສະໜາ ແລະ ຮີດຄອງປະເພນີ, ມີພິທີສູດອອກພັນສາ ປະວໍລະນາ, ພິທີຕັກບາດຖວາຍສັງຄະທານຕາມປະເພນີລາວ, ມີພິທີວຽນທຽນ, ໄຫຼເຮືອໄຟໂຄກ ສ່ວນຢູ່ທ່າວັດຈັນຈະມີການລອຍກະໂທງ ແຕ່ບໍ່ອານຸຍາດໃຫ້ອອກໄປໄຫຼຢູ່ກາງຂອງ.
ສຳລັບກິຈະກຳການຊ່ວງເຮືອ ຈະມີການແຂ່ງເຮືອທີ່ທ່າວັດຈັນ ປະຈຳປີ 2022 ຄາດຄະເນເຮືອເຂົ້າຮ່ວມການແຂ່ງຂັນ ປະມານ 26 ລຳ ໃນນັ້ນປະເພດເຮືອ 12 ສີພາຍ ມີປະມານ 8 ລຳ ເຮືອປະເພນີ ຍິງ 55 ສີພາຍ ປະມານ 4 ລຳ ແລະ ເຮືອປະເພນີ ຊາຍ 55 ສີພາຍ 10 ລຳ.