ນາງ ແສງສະຫວັນ ຈັນທະວົງສາ ຫຼື ເບເບ ເປັນອີກຄົນໜຶ່ງທີ່ມັກໃຊ້ເວລາຫວ່າງຂອງໂຕເອງໃນການເຮັດ “ທຽນຫອມ” ເພື່ອຫາລາຍໄດ້ເສີມ ຈົນໄດ້ຮັບຄວາມນິຍົມຈາກຜູ້ຊົມໃຊ້, ເນື່ອງຈາກທຽນຫອມທີ່ເຂົາເຮັດອອກມານັ້ນມີຄຸນນະພາບ ແລະ ມີກິ່ນຫອມທີ່ຫຼາກຫຼາຍ, ນອກຈາກນັ້ນ ເບເບ ຍັງເອົາຖືເອົາການຜະລິດທຽນຫອມ ເປັນງານທີ່ລະອຽດອ່ອນ ບໍ່ຕ່າງຫຍັງກັບການປຸງແຕ່ງອາຫານ ທີ່ທຸກຄົນລ້ວນມີສູດ ແລະ ການປຸງແຕ່ງທີ່ບໍ່ຄືກັນ ແລະ ການທີ່ຈະເຮັດທຽນຫອມອອກມາວາງຈຳໜ່າຍໄດ້ ຕ້ອງຜ່ານຂັ້ນຕອນການຄົ້ນຄິດ ຫຼາຍຫຼົບຫຼາຍຕ່າວ ຈົນກວ່າຈະໄດ້ສູດ ແລະ ກິ່ນທີ່ຖືກໃຈ.
ເບເບ ບອກວ່າ ຜະລິດຕະພັນ “ທຽນຫອມພັນລະນາ” ທີ່ເຂົາຜະລິດຂຶ້ນມາ ມີຖານລູກຄ້າທຸກເພດທຸກໄວ, ນອກຈາກຈະໃຊ້ທຽນຫອມໄວ້ສ້າງບັນຍາກາດໃນຫ້ອງຂອງຕົນເອງແລ້ວ ຍັງສາມາດໃຫ້ເປັນຂອງຂວັນກັບຄົນທີ່ທ່ານຮັກ ແລະ ທຽນຫອມຍັງສາມາດໃຊ້ໄດ້ ໃນທຸກເທດສະການ ບໍ່ວ່າຈະເປັນປີໃໝ່ລາວ, ວາເລັນທາຍ, ຄຣິສມາສ ແລະ ຍັງມີອີກຫຼາຍໆເທດສະການ.
ນອກຈາກວຽກປະຈຳແລ້ວ ການເຮັດທຽນຫອມ ຖືເປັນອີກອາຊີບເສີມໜຶ່ງ, ເລີ່ມຕົ້ນຈາກການທີ່ຮຽນຈົບມາໃໝ່ໆ ແລ້ວຢາກເຮັດຜະລິດຕະພັນອອກມາເປັນຂອງຕົນເອງ ແລະ ຈາກການລອງຜິດລອງຖືກ, ຊອກຮຽນຮູ້ຈາກອິນເຕີເນັດ ຈົນມາຮອດປີ 2019 ຈຶ່ງໄດ້ກໍຕັ້ງ ພັນລະນາ ຂຶ້ນມາ ເຊິ່ງມີຄວາມໝາຍ ໃນວັດຈະນານຸກົມວ່າ: “ການອະທິບາຍ” ເຊິ່ງສະຕິກເກີ ຂອງທຽນແຕ່ລະກິ່ນ ຈະສື່ເຖິງ ການອະທິບາຍ ຕົວຕົນຂອງມັນເອງ, ທຽນຫອມພັນລະນາ ຈະຖືກອອກແບບມາ ແບບລຽບງ່າຍເພື່ອໃຫ້ເຂົ້າກັບທຸກສະຖານທີ່.
ປັດຈຸບັນ ທຽນຫອມຮ້ານເຮົາມີ 10 ກິ່ນຄລາສສິກ, ມີວາງຂາຍຕະຫຼອດຄື: ກິ່ນຫົວສີໄຄ, ກິ່ນໃບເສຈ, ກິ່ນກຸຫຼາບ, ກິ່ນລາເວັນເດີ, ກິ່ນກາເຟ, ກິ່ນວະນິລາ, ກິ່ນຊັອກໂກແລັດ, ກິ່ນຄັບເຄັກ, ກິ່ນມັສຄ໌, ກິ່ນໄມ້ຈັນ, ນອກຈາກນັ້ນ, ໃນຊ່ວງເທດສະການທ້າຍປີ ຈະມີກິ່ນພິເສດ ສະເພາະລະດູການ ວາງຈຳນ່າຍ ສຳລັບປີນີ້ ຈະແມ່ນກິ່ນໃດ ຖ້າຕິດຕາມນຳກັນເດີ້, ໃນອະນາຄົດ ພັນລະນາ ກໍຈະສືບຕໍ່ຄິດຄົ້ນ, ປະສົມປະສານກິ່ນຫອມໆ ທີ່ແປກໃໝ່ ມາໃຫ້ລູກຄ້າໄດ້ລອງຢ່າງແນ່ນອນ.
ຈາກການເຮັດທຽນຫອມພັນລະນາ ມັນໄດ້ສ້າງມິດຕະພາບໃໝ່ໆ ແລະໄດ້ຮຽນຮູ້ຈາກຄົນຫຼາກຫຼາຍຊ່ວງອາຍຸ, ຫຼາຍອາຊີບ, ນອກນັ້ນຍັງເຮັດໃຫ້ໄດ້ຮູ້ວ່າ ກິດຈະກຳເລັກໆນ້ອຍໆ ໃນຍາມວ່າງ ກໍສາມາດກາຍເປັນອາຊີບທີ່ສ້າງລາຍຮັບໃຫ້ກັບເຮົາໄດ້, ອີກຢ່າງໜຶ່ງທີ່ສຳຄັນຄື ເຮັດໃຫ້ຮູ້ຈັກການວາງແຜນ ໃນການເຮັດທຸລະກິດ.
Hits: 40
