ໃນເວລາທີ່ຄົນເຮົາເກີດຄວາມຜິດພາດ ມັກໄດ້ຍິນຄຳເວົ້າທີ່ວ່າ “ຄົນເຮົາຊະນະແດ່ແພ້ແດ່ບໍ່ເປັນຫຍັງ” ຈາກນັ້ນ ກໍເດີນໜ້າຕໍ່ໄປດ້ວຍວິທີການແບບເກົ່າ ໂດຍລືມໄປວ່າ ສິ່ງສຳຄັນທີ່ສຸດ ເມື່ອເກີດຄວາມຜິດພາດຂຶ້ນແລ້ວ ຄືການຮຽນຮູ້ຈາກຄວາມຜິດພາດ ເພື່ອທີ່ຈະບໍ່ໄດ້ເຮັດຜິດຊ້ຳໆ ແລ້ວພັດທະນາຕົນເອງ ໃຫ້ກ້າວໄປຮອດຈຸດໝາຍທີ່ຕັ້ງໃຈໄວ້.
ບັນຫາບໍ່ແມ່ນອຸປະສັກ ທີ່ມີແຕ່ເຮັດໃຫ້ເຮົາທຸກ ແຕ່ໃນຄວາມເປັນຈິງແລ້ວ ບັນຫາມັນໄດ້ສ້າງໂອກາດດີໆໃຫ້ກັບເຮົາຢູ່ເລື້ອຍໆ, ຖ້າເຮົາເບິ່ງມູມມອງທີ່ກົງກັນຂ້າມກັບມັນ ດັ່ງ 3 ສິ່ງດີໆທີ່ເກີດຂຶ້ນຫຼັງຄວາມຜິດພາດດັ່ງນີ້:
ອຸປະສັກ ແລະ ຄວາມລົ້ມເຫຼວເຮັດໃຫ້ເຮົາຢືນຢູ່ກັບຕົນເອງໄດ້ຫຼາຍຂຶ້ນ: ສິ່ງໃດເກີດຂຶ້ນແລ້ວ ສິ່ງນັ້ນດີສະເໜີ ບໍ່ວ່າຈະເປັນເລື່ອງຄວາມຜິດພາດ ຫຼື ຄວາມສຳເລັດ ພຽງແຕ່ຕົວເຮົານັ້ນຕ້ອງເກັບກ່ຽວທຸກປະສົບການ ມາເປັນບົດຮຽນ ທີ່ໃຊ້ເສີມສ້າງພຸມຄຸ້ມກັນໃຫ້ກັບຕົນເອງຕໍ່ໄປໃນອານະຄົດ, ຢ່າຢ້ານຄວາມຜິດພາດ ຫຼື ຈົມຢູ່ກັບຄວາມຜິດພາດດົນເກີນໄປ, ຫາກພົບກັບຂໍ້ຜິດພາດ ໃຫ້ພະຍາຍາມລຸກຂຶ້ນຢ່າງເຂັ້ມແຂງ ແລ້ວກ້າວເດີນຕໍ່ໄປຢ່າງສະຫງ່າງາມ, ແນ່ນອນວ່າການພົບກັບເລື່ອງເຫຼົ່ານີ້ ຈະເຮັດໃຫ້ຫຼາຍໆຄົນໝົດກຳລັງໃຈ ຫຼືທໍ້ແທ້ ແຕ່ຄວາມເປັນຈິງນັ້ນ ກໍຍັງມີຫຼາຍໆຄົນໃຊ້ຄວາມຜິດພາດເຫຼົ່ານັ້ນ ເຮັດໃຫ້ຕົນເອງຮັບກັບສະຖານະການຕ່າງໆໄດ້ຫຼາຍຂຶ້ນ ຈົນເຮັດໃຫ້ແຂງແກ່ນ ກວ່າຄົນທີ່ບໍ່ເຄີຍຜິດພາດເລີຍ.
ການເກີດຄວາມຜິດພາດເຮັດໃຫ້ເຮົາເປັນຜູ້ໃຫຍ່ຂຶ້ນ: ການໄດ້ພົບກັບບັນຫາ ແລະ ອຸປະສັກຕ່າງໆ ລວມທັງສິ່ງທີ່ເຄີຍຜິດພາດມານັ້ນ ຈະກາຍເປັນປະສົບການທີ່ດີ ທີ່ເຮັດໃຫ້ເຮົາໃຫຍ່ຂຶ້ນ ແລະ ມີຄວາມພ້ອມຫຼາຍກວ່າເກົ່າ, ເພາະການເຮັດສິ່ງທີ່ຜິດພາດ ເປັນເລື່ອງທີ່ມະນຸດທົ່ວໄປຫຼີກລ້ຽງບໍ່ໄດ້ ໃຫ້ຄິດສາວ່າຄວາມຜິດພາດນັ້ນເປັນບົດຮຽນ ແລະ ເປັນຄຳແນະນຳທີ່ດີ ອີກທັງຍັງເຮັດໃຫ້ຊີວິດຂອງເຮົາດີຂຶ້ນໄດ້ ເພາະຄວາມຜິດພາດມັນໄດ້ສອນສິ່ງໃໝ່ໆ ແລະ ເຮັດໃຫ້ເຮົາເບິ່ງໂລກໄດ້ກວ້າງຂຶ້ນ.
ຄວາມຜິດພາດສ້າງໂອກາດໃຫ້ເຮົາ: ຫຼາຍໆເທື່ອທີ່ຊີວິດ ໄດ້ຮັບໂອກາດດີໆ ຫຼື ປ່ຽນຊີວິດຂອງເຮົາໄປ, ຂໍ້ຜິດພາດເປັນຜົນດີຫຼາຍຢ່າງ ຕໍ່ກັບການຮຽນຮູ້, ການເຮັດຜິດພາດ ສາມາດຊ່ວຍໃຫ້ເຮົາກັບມາຕັ້ງຫຼັກ, ຕັ້ງສະມາທິ ໃນສິ່ງທີ່ເຮົາກຳລັງເຮັດໃຫ້ຫຼາຍຂຶ້ນ ແລະ ຈະເຮັດໃຫ້ກະຕືລືລົ້ນ ແລະ ພະຍາຍາມເຮັດໜ້າທີ່ຂອງເຮົາໃຫ້ດີຂຶ້ນ ເພື່ອເຮັດໃຫ້ເກີດຄວາມພິດພາດທີ່ນ້ອຍທີ່ສຸດ.
ຂັດຈາກບາງສ່ວນຂອງໜັງສື John C. Maxwell ຂຽນໄວ້ກ່ຽວກັບເລື່ອງປະໂຫຍດຈາກບັນຫາ ແລະ ອຸປະສັກຕ່າງໆ.
Hits: 1
