ນັກເຕະເຍົາວະຊົນລາວ ກຽມເຂົ້າຮ່ວມແຂ່ງຂັນລາຍການໃຫຍ່ທີ່ປະເທດໄທສໍາລັບ WIG NAGA ສົ່ງເຂົ້າຮ່ວມ 3 ຮຸ່ນ ກັບ MAZDA ສົ່ງເຂົ້າຮ່ວມ 2 ຮຸ່ນ ເຊິ່ງເປັນ 2 ທີມເຍົາວະຊົນຕົວແທນຈາກ ສປປ ລາວ ກຽມເຂົ້າຮ່ວມການແຂ່ງຂັນບານເຕະ 7 ຄົນລາຍການ SAT FOOTBALL THAILAND CHAMPIONSHIP 2022 ຫຼື ລາຍການແຊັມພົບແຊັມ.
ລາຍການດັ່ງກ່າວ ທີມຈາກ ສປປ ລາວ ສົ່ງເຂົ້າຮ່ວມ 2 ທີມຄື: LAOS WIG NAGA ສົ່ງເຂົ້າຮ່ວມ 3 ຮຸ່ນອາຍຸປະກອບດ້ວຍ 9, 10 ແລະ 11 ປີ, ສ່ວນ LAOS MAZDA ສົ່ງເຂົ້າຮ່ວມ 2 ຮຸ່ນອາຍຸປະກອບມີ ບໍ່ເກີນ 8 ປີ ແລະ 13 ປີ ເຊິ່ງໃນແຕ່ລະຮຸ່ນແມ່ນມີທີມເຂົ້າຮ່ວມ 8 ທີມ ຄັດເອົາທີມຊະນະເຂົ້າຮອບ 4 ທີມ ແລະ ຮອບຊີງຊະນະເລີດ ຕາມລໍາດັບ.
ຂະນະທີ່ ທ່ານ ຕົ້ນຈັກກິດ ນ້ອຍສົມສີ ຜູ້ຊ່ວຍຄູຝຶກ WIG NAGA ໄດ້ໃຫ້ຮູ້ວ່າ: ສໍາລັບ WIG NAGA ເລີ່ມຝຶກຊ້ອມມາໄດ້ 3 ອາທິດ ເຊິ່ງອາທິດທີ 4 ພວກເຮົາເລີ່ມຊ້ອມເຊົ້າແລງ ແລະ ໄດ້ດືງນັກເຕະຈາກເຊໂນ ຮ່ວມທີມນຳອີກ 7 ຄົນ ມາຮອດປັດຈຸບັນແມ່ນມີຄວາມພ້ອມ ແລະ ພວກເຮົາຈະສົ່ງເຂົ້າຮ່ວມ 3 ຮຸ່ນຄື: 9, 10 ແລະ 11 ປີ ໂດຍການເດີນທາງໄປຊຸດນີ້ມີ 36 ຄົນ ( ຄູຝຶກ 7 ທ່ານ ) ກໍານົດອອກເດີນທາງວັນທີ 19 ຕຸລາ 2022. ນອກນັ້ນ, ກໍຍັງທີມ MAZDA GB ທີມຕົວແທນຈາກລາວ ເດີນທາງໄປຮ່ວມອີກດ້ວຍໃນ 2 ຮຸ່ນອາຍຸປະກອບດ້ວຍ 8 ປີ ແລະ 13 ປີ.
ສໍາລັບ ການແຂ່ງຂັນບານເຕະ 7 ຄົນລາຍການ SAT FOOTBALL THAILAND CHAMPIONSHIP 2022 ຫຼື ລາຍການແຊັມພົບແຊັມ ຈັດຂຶ້ນລະຫວ່າງວັນທີ 22-23 ຕຸລາ 2022 ທີ່ສະໜາມ ອົງການບໍລິຫານສ່ວນຈັງຫວັດຊຽງຣາຍ ແຂວງຊຽງຣາຍ ປະເທດໄທ ເປັນເຈົ້າພາບ ໂດຍມີການຊີງໄຊເຖິງ 6 ຮຸ່ນນັບແຕ່ 8-13 ປີ ເຊິ່ງໃນແຕ່ລະຮຸ່ນແມ່ນມີ 8 ທີມເຂົ້າຮ່ວມຊີງໄຊ ລວມທັງໝົດມີເຖິງ 48 ທີມ.